زواج الصالونات والزواج عن حب ايهما تؤيد ؟

زواج الصالونات والزواج عن حب ايهما تؤيد ؟

رغم اننا نعيش فى زمن سريع الايقاع وكل يوم فى جديد الا ان الزواج مازال محتفظا بعادات وتقاليد توارثها الاجيال وتندرج تحت بند الاصول .واعتقد ان الزواج حاليا عباره عن نوعين الزواج عن حب وزواج الصالونات .
زواج الصالونات يتهمه البعض بانه يتم على اساس نظرية اسمها _انت وبختك_بمعنى انك تتزوج بناء على انطباعاتك من خلال لقاء واحد مع عروستك المستقبليه ويكون كلام من حولك مصدر من مصادر الضغط على قرارك سواء كان بالسلب او بالايجاب وحتى لاتتهم كلامى بالكلكعه اسهلهالك .ا

ارجوك لا تندهش اذا علمت انه حتى الان يوجد ما يسمى بالخاطبه بمعنى ان فلان مثلا عايز عروسه يسأل الخاطبه فهلا بالتاكيد معاها فهرس لبنات المنطقه وما حولها ومش بعيد تلاقيها بتعمل جرد شهرى لهن . وهى ست محبوبه من الجميع وتؤدى عملها متناسيه تماما المثل الشهير _امشى فى جنازه ولا تمشى فى جوازه_ولو حصل وسمعت حد بيقول كده يكون ردها السريع مثل شهير ايضا _يا بخت من وفق راسين فى الحلال _المهم انه بعد ان يختار العريس عروسه من اجندة الخاطبه تذهب لكى تحيط اهل العروسه علما بانه عريس جاى يا اولاد الحلال . ويذهب العريس ليجد اهل عروسة المستقبل مرحبين مهللين ولابسين على سنجة عشره ثم يجلس فى الصالون _جواز صالوناتى بقى_ورغم انه لايوجد سابق معرفه بينه وبين اهل عروسة المستقبل الا انه لابد ان يسمع كل 5ثوانى كلمة يا مرحب شرفتونا وهو يرد مرحب بيك يا عمى وبعد انتهاء وصلة الترحيب تدخل عروسة المستقبل بالمشاريب والتى لابد وحتما تكون مكسوفه على الاخر وعينها فى الارض _دى تعليمات حماته مستقبلا_ثم يبدأ العريس رحلة اختلاس النظرات لعروسته وهى مكسوفه جدا وابا عن جدا كمان ويتبادل حماه الحديث مع اى شخص اخر لكى يخلو له جو الفحص بس برضه كل شويه لازم يقول يا مرحب كأنه بيقول نحن هنا .وتنتهى الزياره والرد طبعا بيكون مع الارشيف قصدى الخاطبه والتى تظل تدعى ربنا يهديهم لبعض علشان تاخد الحلاوه من الطرفين .ا

الطريقه التانيه للزواج تكون من خلال قصة حب تعيشها مع حبيبتك والقصه تبقى مليانه هدايا ودباديب وشوية حب مع شوية زعل يعنى تقدر تقول كوكتيل من المشاعر الى ان تقرر ان تتوج هذه القصه بالزواج بعد ان تاكدت بانها فعلا هى اغلى الاحباب وعيشتك من غيرها هتبقى هباب ..........ا

السؤال بقى ايهما تؤيد الزواج عن حب ولا الزواج الصالوناتى ؟ وخد بالك انا تعمدت انى اتجاهل احدث انواع الزواج عن طريق النت لانى مش مستوعب انى ابعت بياناتى لعروستى عن طريق النت وهى برضه تبعت عن طريق النت لحد ما ربنا يكرمنا ونتجوز ونخلف ايميل صغير ومش بعيد يكون متفيرس كمان بجد مينفعش لانه لو حصل لا قدر الله واتجوزت عن طريق مواقع الزواج على النت هفضل ليل نهار اضرب مراتى بكابل الداته

بالتفصيل حوار بين اثنين ...يقال عنهم مساطيل !ا

بالتفصيل ..حوار بين اثنين ..يقال عنهم مساطيل!ا

خميس .........لكن انت مقولتليش ايه رايك فى التغيير الدستورى ؟
جمعة..........ايه رايك انت تغير الحجر وتسكت ؟
خميس..........ايه يا عم جمعه بس مالك ؟
جمعة........ياعم مالى فى جيبى ولا اقوللك مالى ومالك ومال الشعب فى بنوك سويسرا
خميس ...........تصدق ان سويسرا طالبه هجره بس عايزين دكاتره امال احنا هنروح سويسرا امتى بس ؟
جمعة...........اكيد هنروح لما يطلبوا مرضى
خميس ............هى طالبه معاك تشاؤم ليه كده ليه هو الصنف ده اسمه ايه ؟
جمعة............اللى جابهولى قاللى ان اسمه الرفاق عاطلون
خميس............عشان كده الحجر مش عايز يشتغل
جمعة..........لكن على كده انت متفائل بمناسبة ايه ان شاء الله ؟
خميس ..........مش عارف بس حاسس انى عايش فى زمن (نظيف)والمرحله الجايه كلها (جمال)ودايما هنشوف (عز
جمعة.............والاحساس ده بيجيلك بعد الاكل ولا قبله ولا يمكن وانت بتاكل ؟
خميس ............لا بييجينى وانا بسمع اغنية الحلم العربى بس الغريب ان مدحت العدل اللى كتبها مبقاش بيكتب اغانى تفتكر ليه ؟
جمعة...........يمكن بعد مكتبها جاله احباط لان الحلم اللى كتب عنه طلع كابوس
جمعة بعصبيه................الله يخرب بيتك يا خميس احنا بنشرب ده كله وانت مش حاطط فحم على الحجر
خميس .............معلش يا جمعة انا محطتش فحم اصلى فكرت الصنف اشعال ذاتى

أجمل سنين حبنا

أجمل سنين حبنا ..

كنا زمان حبيبين
وكان مصيرنا البعد
بدموع عنينا قلنا
ملناش نصيب فى بعض
غصب عننا رضينا
ومرت السنين بينا
قلنا لو منسيناش
بكره الزمن ينسينا
وفى ليله جميله قابلتها صدفه
لا كنت عارف ولا هى عارفه
واتقابلت عيونا ثوانى
نسيت الدنيا وما فيها
مفتكرتش غير عنيها
رحت فى عالم تانى
كل كلمه انا حسيتها
هى بعنيها قالتها
رد قلبى بلهفه وشوق
لا هنسى ولا عمرى نسيتها

معنى كلمة شهيد ..مهداه إلى روح محمد الدرة

معنى كلمة شهيد ..مهداه إلى روح محمد الدرة

معنى كلمة شهيد
تبقى انت يادره
مت شهيد علشان
تبقى القدس حره
علشان كده هنضحى
هنموت الف مره
قتلوك فى لحظة غدر يهود
وظلم كبير من غير حدود
ومينفعش نحط ايدنينا
على خدنا والقدس يعود
لازم تبقى الايد فى الايد
وفى كل لحظه الف شهيد
والله اكبر تبقى هتافنا
ساعتها يبقى النصر اكيد
ملينا خلاص من المؤتمرات
وكلام زيه زى السكات
ولامتى هنفضل كده عايشين
اظن كفايه اوى اللى فات

نبدا قبل ما بكره يفوت
نمحى الظلم والجبروت
عشان الدره فى قبره يقول
فداكى يا قدس انى اموت

يرضيكي يا مصر ؟

يرضيكي يا مصر ؟

*********************

يرضيكى يا مصر
نبقى احنا شبابك وولادك
تندهى بنجيلك فى ميعادك
جواكى وحاسين ببعادك
احلامنا عايشه فى عتمه وليل

********************
ده حلم حياتنا تكونى جنه
ليه يكون الحلم بعيد عنا
ولامتى يا مصر هنستنى
جوانا حلم برئ وجميل

******************
احنا الل شاربين من نيلك
جايين يا مصر بنشكيلك
يدونا بس الفرصه نجيلك
فى مليون محفوظ وزويل

تلات خبطات ...وحوي يا وحوي ! ا

تلات خبطات ...وحوي يا وحوي! ا

كان الله فى عون الناس بجد داخلين على ثلاثة خبطات اقتصاديه قادره على نسف ميزانية كل بيت _ده لو كان فى اساسا _ومش عارف ازاى الناس هتتعامل معاهم فعلا موسم المدارس ومصاريفها الكثيره جدا وشهر رمضان ومستلزماته وقبل ما الناس هتشم نفسها هتلاقى عيد الفطر المبارك ويا ريت على كده وبس لا وايه كمان يصاحب هذه العاصفه ارتفاع جنونى فى الاسعار يعنى الناس ليها حق تمشى تكلم نفسها .
يعمل ايه الموظف الغلبان ابو مرتب اتعب منه وازاى يتعامل مع الموقف ده ولا الحكومه هتحل الموقف وتعمل موائد رحمن للموظفين الغلابه اعترافا منها بانها السبب فى حالة الموظفين اللى تصعب على شارون .
اللى يغيظك انك تقرا كل يوم فى جرايد حكومتنا النظيفه انباء عن ثبات الاسعار وتوفير السلع للناس ومراعاة مهدودى الدخل وتيجى تشترى تلاقى الاسعار نار الله الموقده وعلى راى المثل اسمع كلامك اصدقك اشوف اسعارك استعجب .
وعودهم الزائفه بالرخاء والنمو والحريه اصبحت مستفزه لمشاعر الناس لانهم كل ميقولوا الفقر بيزيد والاسعار بتزيد وضغط الناس الغلابه يرتفع وحكومتنا ولا على بالها وكان الناس بتأدن فى مالطه .
ويبدو اننا فى ظل هذا العصر ال_مبارك_ومجهودات حكومتنا الرشيده ال_نظيف_ه سنرى ايام عذاب اخر _جمال _وعلى كل مواطن مصرى ان ينسى يعنى ايه كلمة _عز؟؟؟! ا..كل سنة وانتم طيبين ..ورمضان كريم :)

الحلم ده حلمنا ..وللأسف ده الواقع ! ا

الحلم ده حلمنا ...وللأسف ده الواقع ..! ا

بنحلم باقتصاد مصرى قوى قادر على تحقيق احلامنا ونبقى نمر اقتصادى وندخل غابة النمور الاسيويه ولا هى جت على المصريين وقفلوا الحديقه الاقتصاديه وللاسف الواقع ان الجنيه المصرى من يوم مغطس مظهرش تانى ولا يوجد حاليا لا اقتصاد ولا حتى احصا وكل حاجه فى مصر بقت صينى الواحد خايف يخلف عيل يلاقيه شبه جاكى شان! ا

بنحلم بمحاسبة كل فاسد فى مصر وكل من تاجر بارواح واحلام المصريين وكل من تخيل ان مصر عزبه وهو صاحبها لكن للاسف الناس دى هما الصفوه دلوقتى ومش فاضل غير انهم يتكرموا على مجهوداتهم فى حرق دم الناس !مع ان رائحة فسادهم ازكمت انوف الناس وربنا يستر لتبقى دى انفلونزا الفساد!ا

بنحلم بانتخابات برلمانيه نزيهه بمعنى الكلمه ونتائج استفتاءات حقيقيه حتى نشعر بان راينا له قيمه وللاسف لا وجود لهذا الحلم فى ظل وجود ترزية القوانين والمطبخ الحكومى للنتائج ولو ان الاستفتاء الاخير مكنش متسبك حلو! ا

بنحلم بان كل خريج يلاقى فرصة عمل وفى اى مجال (مش شرط التخصص يا اسيادنا)المهم انه يشتغل لكن للاسف الواحد مننا يتخرج بعد ميطلع عينه وعين اهله فى المصاريف ومفيش شغل نستنى ويظهر علينا كبر السن وبرضه مفيش شغل ليكونوا محوشين الوظائف دى لاحفادنا! ا

بنحلم بصحافه حكوميه شجاعه ولو حتى عدد فى السنه تقول كده غلط ولو مره واحده بس لكن الواقع للاسف غير كده لان النفاق الصحفى الحكومى لحكومته تعدى كل الحدود بيتكلموا فى وادى والناس عايشه فى وادى تانى خالص وبيهللوا لكل همسه يهمسها وزير او رئيس وخايفين نفتح جرنانهم مره نلاقيهم كاتبين (افتتح الوزير فلان _رضى الله عنه_المرحله العاشره من الكوبرى اللى مش عايز يخلص! ا

-بنحلم بحاجات كتير لكن كل يوم بيموت لنا اكتر من حلم واتساءل هل غلطتنا اننا بنحلم كده ولا الغلطه اننا ساكتين على حلمنا ! ا

رسالة إلى الرئيس ..بكلمات عمرو دياب ! ا

رسالة للرئيس بكلمات عمرو دياب ! ا

سيادة الرئيس
ان السبب الرئيسى الذى جعلنى _ميال _لكتابة هذه الرساله _الليلادى _هو ان المواطن المصرى اصبح _عايش ومش عايش_بعد ان اصبح الظلم والفساد والفقر _كد ه عينى عينك_ويحدث هذا سيادتك فى ظل ان الحكومه عايشه فى دور _الملاك البرئ _الذى ليس له ذنب مع انها _ضحكت _على الشعب بوعودها الزائفه التى اصبحنا نسمعها على اساس_كلهم بيقولوا كده فى الاول
سيادة الرئيس
اننا كشعب فى ورطه ومش عارفين _نقول ايه_على هذه الايام الصعبه التى لم تعد مجرد _ايام وبنعيشها _واتساءل _لو كان يرضيك_سيادتك اننا نوصل للمرحله دى من الذل والهوان يبقى _العالم الله_ممكن يحصل ايه بعد كده لانه _صدقنى خلاص سيادتك الناس وصلت لمرحله _ميتحكيش عليها_..........
سيادة الرئيس
كل ما اتمناه انى اقول كل اللى فى نفسى لكل مسئول فى الحكومه من غير خوف ولو خفت لحظه يطمنى ويقوللى قول يا بنى _كمل كلامك

قلمين في ذكرى البرجين

قلمين في ذكرى البرجين

زى ما النهارده يوم فاصل فى تاريخي - عملت مدونة!-هو ايضا يوم فاصل فى تاريخ العالم فى ذكرى احداث 11سبتمبر واللى بسببها اتغيرت حاجات كتير وسياسات كتير .هذا اليوم الذى اختلفت فيه المشاعر والاراء واتساءل بعد مرور ست سنوات على هذا الحدث هل كان بن لادن عنده حق لما ضرب البرجين واللى بسببهم امريكا احتلت دولتين العراق وافغانستان ولا امريكا كده كده كانت جايه بس بتتلكك ؟ولا بن لادن غلطان لانه ضرب البرجين وخلع وسابنا احنا ندفع تمن الضربه دى وكل مافعله بعد ذلك تصريحات ناريه لاتودى ولا تجيب على طريقة _لن تنعم امريكا _مع ان الواضح انها تنعم ونص كمان واحنا اللى طالع عين ابونا . وهل مازالت النظره الامريكيه لكل ما هو عربى ومسلم كما هى نظره تحمل بداخلها الخوف والكراهيه ؟ام انهم تاكدوا انه من الخطا الحكم على العالم العربى الاسلامى من خلال تصريحات تنظيم اسمه القاعده وان المسلمين لا يعتبرون اسامه بن لادن اميرا لهم ؟اتمنى ان يكون ضرب البرجين بمثابة القلمين لامريكا ولنا كمان لكى تكف امريكا عن سياسة التدخل السافر فى شئون العالم كله بدون وجه حق ومساندتها المستفزه لاسرائيل وممارساتها الوحشيه تجاه ناس لا يملكون غير الحجاره سلاحا لهم .وقلمين لنا لكى نعرف مدى تفككنا وضعفنا وكيف وصل بنا الحال الى هذه المرحله من الذل والهوان .قلمين لكل الحكام العرب السبب الرئيسى فيما وصلنا اليه الذين اصبح كل همهم ازاى تحافظ على كرسى الحكم ليه ولابناؤه واحفاده كمان ونسيوا شعوبهم المطحونه المغلوبه على امرها

تجربه شخصيه للهروب من الجنه مصر سابقا

تجربه شخصيه للهروب من الجنه مصر سابقا! انظرا لان الوضع الاقتصادى فى مصر لا يسر الاعداء ولا حتى الاصدقاء فكرت انى اسافر الى ايطاليا لكى احقق جزء من احلامى لانى او اعتمدت على دخلى مصر ده لو كان فى اساسا عشان اتاهل اتجوز يعنى يبقى ان شاء الله هعمل فرحى فى دار المسنين وهيبقى قسط كمان مش كاش وعن طريق واحد صاحبى اصلح الله حاله وادخل النار امثاله اخدنى لواحد هو يعرفه فى القاهره اسمه الحاج (س)سالم يعنى وقاللى انه متخصص فى السفر لايطاليا رحنا للحاج س عارفينه طبعا فوجئت انه طلع ترزى استغربت جدا وقلت ربنا يسترها ليفصلى تاشيره متطلعش على مقاسى وعرفت انه وسيط لناس كبار رحب بينا الحاج سالم وسهل لى الموضوع وحسسنى انى قاعد معاه فى ميلانو سالنى المهنه فى الجواز ايه قلت له طالب سالنى بدهشه طالب ايه كنت هقوله طالب القرب من ايطاليا خفت ليزعل المهم انه طلب تغيير المهنه لتاجر ادوات صحيه وبالعافيه عملتها لكن منفعتش واخدت رفض من السفاره وكذلك جربت تاجر ادوات منزليه وتاجر قطع غيار ومفيش فايده لدرجة انى فكرت اعمل المهنه فى جواز سفرى شهبندر التجار ولان الحاج س مؤمن بان كل الطرق تؤدى الى روما حتى لو هروح مشى ارسلنى الى ليبيا على اساس انى اسافر من هناك عن طريق البحر ركبنا انا و150شاب مصرى معايا فى المركب فى مكان اسمه التلاجه فى قاع المركب وهو لايسع الا خمسين واحد بالعافيه وقلنا مش مهم يمكن ده اختبار لمدى تلاحم الشباب المصرى وفضلنا
فى العذاب ده ثلاث ليالى الى ان وصلنا حدود ايطاليا وللاسف لقينا الصليب الاحمر فى انتظارنا ومسكونا اتفقنا نقول اننا من فلسطين على اساس يتعاطفوا معانا جابولنا واحد فلسطينى عشان يتاكد من جنسيتنا سالنى اسمك ايه قلت له عمار قاللى وين سكنك قلت هدوه وبنوا الجدار العازل ومتعرفش صمم ليه انى مصرى قلت له ده اخر كلام عندك قاللى ده شغلى وانت هترجع مصر قلت له ولا يهمك ويا جبل ميهزك ريح وكالريح رجعنا كلنا مصر تانى رجعت وحالتى النفسيه تحت الصفر ومش طايق اكلم حد خالص خصوصا صاحبى اللى عرفنى سكة الحاج سالم عشان كده لما اتصل بيا بعد عودتى وقاللى اشوفك امتى قلت له يوم الخميس بعد صلاة الجمعه .. تفتكروا هييجى ؟؟

ا