Tuesday, September 11, 2007

الحلم ده حلمنا ..وللأسف ده الواقع ! ا


الحلم ده حلمنا ...وللأسف ده الواقع ..! ا

بنحلم باقتصاد مصرى قوى قادر على تحقيق احلامنا ونبقى نمر اقتصادى وندخل غابة النمور الاسيويه ولا هى جت على المصريين وقفلوا الحديقه الاقتصاديه وللاسف الواقع ان الجنيه المصرى من يوم مغطس مظهرش تانى ولا يوجد حاليا لا اقتصاد ولا حتى احصا وكل حاجه فى مصر بقت صينى الواحد خايف يخلف عيل يلاقيه شبه جاكى شان! ا


بنحلم بمحاسبة كل فاسد فى مصر وكل من تاجر بارواح واحلام المصريين وكل من تخيل ان مصر عزبه وهو صاحبها لكن للاسف الناس دى هما الصفوه دلوقتى ومش فاضل غير انهم يتكرموا على مجهوداتهم فى حرق دم الناس !مع ان رائحة فسادهم ازكمت انوف الناس وربنا يستر لتبقى دى انفلونزا الفساد!ا


بنحلم بانتخابات برلمانيه نزيهه بمعنى الكلمه ونتائج استفتاءات حقيقيه حتى نشعر بان راينا له قيمه وللاسف لا وجود لهذا الحلم فى ظل وجود ترزية القوانين والمطبخ الحكومى للنتائج ولو ان الاستفتاء الاخير مكنش متسبك حلو! ا


بنحلم بان كل خريج يلاقى فرصة عمل وفى اى مجال (مش شرط التخصص يا اسيادنا)المهم انه يشتغل لكن للاسف الواحد مننا يتخرج بعد ميطلع عينه وعين اهله فى المصاريف ومفيش شغل نستنى ويظهر علينا كبر السن وبرضه مفيش شغل ليكونوا محوشين الوظائف دى لاحفادنا! ا


بنحلم بصحافه حكوميه شجاعه ولو حتى عدد فى السنه تقول كده غلط ولو مره واحده بس لكن الواقع للاسف غير كده لان النفاق الصحفى الحكومى لحكومته تعدى كل الحدود بيتكلموا فى وادى والناس عايشه فى وادى تانى خالص وبيهللوا لكل همسه يهمسها وزير او رئيس وخايفين نفتح جرنانهم مره نلاقيهم كاتبين (افتتح الوزير فلان _رضى الله
عنه_المرحله العاشره من الكوبرى اللى مش عايز يخلص! ا


-بنحلم بحاجات كتير لكن كل يوم بيموت لنا اكتر من حلم واتساءل هل غلطتنا اننا بنحلم كده ولا الغلطه اننا ساكتين على حلمنا ! ا

2 comments:

mnoon said...

ان شاء الله احلامنا فى يوم حتحقق
مدام احنا عايزين نحققها يبقى حنحققها
وبعدين احنا بس نصمم وكل واحد يركز فى مجاله
وانا ان شاء الله حصلح إقتصاد البلد فى يوم وححاسب كل كبير وصغير

صالح سعيد said...

انا كده اطمنت على حال اقتصاد البلد طالما منى هتمسكه وربنا يستر ليبقى اقتصاد منزلى
وانا بدعى معاكى ان كل احلامنا تتحقق باذن الله
وشكرا على اهتمامك يا وزيرة
تحياتى اليكى