زواج الصالونات والزواج عن حب ايهما تؤيد ؟
رغم اننا نعيش فى زمن سريع الايقاع وكل يوم فى جديد الا ان الزواج مازال محتفظا بعادات وتقاليد توارثها الاجيال وتندرج تحت بند الاصول .واعتقد ان الزواج حاليا عباره عن نوعين الزواج عن حب وزواج الصالونات .
زواج الصالونات يتهمه البعض بانه يتم على اساس نظرية اسمها _انت وبختك_بمعنى انك تتزوج بناء على انطباعاتك من خلال لقاء واحد مع عروستك المستقبليه ويكون كلام من حولك مصدر من مصادر الضغط على قرارك سواء كان بالسلب او بالايجاب وحتى لاتتهم كلامى بالكلكعه اسهلهالك .ا
زواج الصالونات يتهمه البعض بانه يتم على اساس نظرية اسمها _انت وبختك_بمعنى انك تتزوج بناء على انطباعاتك من خلال لقاء واحد مع عروستك المستقبليه ويكون كلام من حولك مصدر من مصادر الضغط على قرارك سواء كان بالسلب او بالايجاب وحتى لاتتهم كلامى بالكلكعه اسهلهالك .ا
ارجوك لا تندهش اذا علمت انه حتى الان يوجد ما يسمى بالخاطبه بمعنى ان فلان مثلا عايز عروسه يسأل الخاطبه فهلا بالتاكيد معاها فهرس لبنات المنطقه وما حولها ومش بعيد تلاقيها بتعمل جرد شهرى لهن . وهى ست محبوبه من الجميع وتؤدى عملها متناسيه تماما المثل الشهير _امشى فى جنازه ولا تمشى فى جوازه_ولو حصل وسمعت حد بيقول كده يكون ردها السريع مثل شهير ايضا _يا بخت من وفق راسين فى الحلال _المهم انه بعد ان يختار العريس عروسه من اجندة الخاطبه تذهب لكى تحيط اهل العروسه علما بانه عريس جاى يا اولاد الحلال . ويذهب العريس ليجد اهل عروسة المستقبل مرحبين مهللين ولابسين على سنجة عشره ثم يجلس فى الصالون _جواز صالوناتى بقى_ورغم انه لايوجد سابق معرفه بينه وبين اهل عروسة المستقبل الا انه لابد ان يسمع كل 5ثوانى كلمة يا مرحب شرفتونا وهو يرد مرحب بيك يا عمى وبعد انتهاء وصلة الترحيب تدخل عروسة المستقبل بالمشاريب والتى لابد وحتما تكون مكسوفه على الاخر وعينها فى الارض _دى تعليمات حماته مستقبلا_ثم يبدأ العريس رحلة اختلاس النظرات لعروسته وهى مكسوفه جدا وابا عن جدا كمان ويتبادل حماه الحديث مع اى شخص اخر لكى يخلو له جو الفحص بس برضه كل شويه لازم يقول يا مرحب كأنه بيقول نحن هنا .وتنتهى الزياره والرد طبعا بيكون مع الارشيف قصدى الخاطبه والتى تظل تدعى ربنا يهديهم لبعض علشان تاخد الحلاوه من الطرفين .ا
الطريقه التانيه للزواج تكون من خلال قصة حب تعيشها مع حبيبتك والقصه تبقى مليانه هدايا ودباديب وشوية حب مع شوية زعل يعنى تقدر تقول كوكتيل من المشاعر الى ان تقرر ان تتوج هذه القصه بالزواج بعد ان تاكدت بانها فعلا هى اغلى الاحباب وعيشتك من غيرها هتبقى هباب ..........ا
السؤال بقى ايهما تؤيد الزواج عن حب ولا الزواج الصالوناتى ؟ وخد بالك انا تعمدت انى اتجاهل احدث انواع الزواج عن طريق النت لانى مش مستوعب انى ابعت بياناتى لعروستى عن طريق النت وهى برضه تبعت عن طريق النت لحد ما ربنا يكرمنا ونتجوز ونخلف ايميل صغير ومش بعيد يكون متفيرس كمان بجد مينفعش لانه لو حصل لا قدر الله واتجوزت عن طريق مواقع الزواج على النت هفضل ليل نهار اضرب مراتى بكابل الداته
23 comments:
صباح الفل يا صالح
كل عام وأنت طيب وبتكتب حاجات حلوة وبتحقق أماني حلوة :)) ا
الموضوع جميل ..وضحكتني الفقرة الأخيرة ..مش متخيلة الصراحة :)!.. ياللا يا عم أول تعليق ..:)..ورغم اني عارفة وجهة نظرك في جواز الصالونات ..إلا أني عندي احساس وانت رايح تخطب إن شاء الله هتقول لهم بلاش صالون :)) .. ينفع المطبخ !.."مش طفاسة طبعا ..بس عشان يبقى اسمه جواز مطابخ..متسبك ومعمول بمزاج !هههههه ..ربنا يسعدك وتتجوز ويبقى أول عيالك أدهم ..أو بهية لو بنت - والله اسم مش بطال!- وتبعتهم حدايا أديهم درس إنجليش ..ماتخافش الحصة ليهم بخمسة جنيه والحسابة بتحسب!ا
عيد سعيد ..يا صالح يا سعيد..ونسمع يارب قريب أخبار حلوة :)..كل سنة وانت طيب
صباح الورد
خدت لفه صباحيه بالعجله فى مدونتك الجميله
واتعجب كيف استطعت التوقف 3 شهور
لعله خير
وعجبتنى قوى البنت بتاعه الحصبه المحليه
وكلام عمرو دياب للريس
لكن انت ليه مهمل الالف
لما دخلت اعلق
لقيتك كاتب حلموا معايا
والالف بتاع
احلموا
مش موجود
ولا انا ماخذ تش بالى كويس
اتشرفت بمعرفتك
ياااااااااااه
نسيت اعلق على الموضوع
اختك فرنسا عانس بجداره
ومش لقت لا جواز صالونات
ولا حتى انتريهات
ولا حتى كراسى خرازان
انا بصراحة اؤيد الطريقة التانية على الاقل شخص عرفته وعرفت اسلوب حياته ايه وبيحب ايه وبيكره ايه والاهم من كل ده فى اتفاق بينا
وكمان حب
يعنى محتاجه ايه تانى اكتر من كدا
لكن بتاع الصالون ده هو انا عارفاه مين ولا اخلاقه ايه
ما يمكن جاى يرسم الادب والاحترام
تحياتى على الموضوع الحساس ده
مروه جمعه
الشهيره بميرو
بالنسبه لجواز المطابخ انا معاكى لان الشاعر اللى قال الطريق الى قلب الرجل معدته ده راجل طيب وانا بحترمه بغض النظر عن طفاسته
وباذن الله لما ربنا يبعتلى ادهم ويا سين وبهيه هبعتهم لطنط ميرو ياخدوا درس انجليش بفايف باوند فى المانث الشهر يعنى وجود مورننج يا ميرو
فرنسا هانم
اشكرك واشكر العجله على هذه اللفه وانا فعلا توقفت لمدة 3شهور وده راجع لظروف قهريه الى جانب اننى اعترف اننى كنت رئيس مجلس ادارة الجهل بعالم التدوين لكن بعد التواصل الجميل بينكم لن اتوقف مره اخرى ولو تعبت هستلف منك العجله من غير رهن طبعا
اما بخصوص الزواج يا اخت فرنسا فده نصيب فى الاول والاخر وانا بدعيلك ربنا يكرمك بدوله قصدى عريس حلو
واشكرك على اهتمامك ورايك
قطة الصحراء
وانا معاكى فى رايك لان الاقنعه بقت اسهل حاجه عند الناس حاليا بالاسواق
ودى مشكله فعلا لان الزواج بالطريقه الاولى بيبقى عامل زى البطيخه منعرفش جواها ايه الا بطريقه واحده
بالسكينه
واشكرك على اهتمامك ورايك
ازيك يا صالح باشا
اسمح لي اتلامض واقولك على النوع الرابع واللي بقى ماشي دلوقتي زي الحلاوة
جواز الملتزمين
متستغربوش ـ دلوقتي بقى اللي عايز يتجوز يقول شوفوا لي واحده ملتزمة بمعنى تكون بتنتمي لجماعه اسلاميه ايا كانت وبتلبس خمار ومش بتحط مكياج
وكانه هيتجوز كل ده
وبعد الجواز غالبا بتطلع غير كده نهائي لان البنات عرفوا طلبات الشباب وطالما هو عايز الشكل متحرموش بس الاخلاق والطباع بتطلع بعد كده
انا طبعا بفضل قصه الحب لاني هدرس كويس اوي الانسان اللي بحبه واللي هيبقى جوزي ومفي شمانع الاهل يعرفوا والحكايه تكون رسمي
تحياتي لك
ايه يا عم صالح الجمال ده انت شكللك بتدور على عروسه يا مان وبما انك مدون خلاص يبقى نعمل بدال جواز الصالونات جواز مدونات ويبقى زيتنا فى دقيقنا والبوستات تتقابل عموما هو جواز الصالونات زيه زيه جواز الحب كلهم جواز ربنا يوفقك يا مان وبلاش يا عم جواز النت احسن كابل الداته بيلسع جدا يا مان ربنا يوفق الجميع
The Queen
الملكه
زواج الملتزمين انا شايفه زى زواج الاقنعه بمعنى انه الواحد او الواحده بيبقى لابس قناع غير شخصيته الاساسيه وبتبقى صدمه فعلا والا لتزام لازم يبقى داخلى قبل ميكون خارجى
وانا معاكى ان الزواج عن حب افضل لانه على الاقل هبقى عارف انا هتجوز مين مش رايح اخطب علامة استفهام
وشكرا على اهتمامك ورايك واتمنى انك تتلامضى فى كل ما اكتب فانا من المؤمنين بنظرية
اللماضه كنز لايفنى
عليوه
مساء الفل يا ابو على
انا يا باشا لو دورت يبقى هلاقى نفسى فى خانة الصالونات لكن تقدر تقول ان قلبى هو من يبحث مع انى عارف ان الحب شعور يدخل القلوب خبط لزق بدون استئذان وانا معاك ان كابل الداته يلسع بشده لانى اعرف واحد صاحبى خد كابلين على دماغه من مراته كسرتله الهارد بتاعه وبقى مهنج فى الدنيا بس عندى امل انه ممكن يتعمله سوفت وير
وشكرا على رايك يا زعيم
الاخ العزيز صالح
لن تتخيل سعادتى عندما دخلت مدونتك ووجدت بوست جديد
ارفض تماما عودتك لعدم التعاطى مع المدونة والمدونين انت كاتب جميل ونحن جميعا يسعدنا ان تتواصل معنا
الموضوع شائك استاذى .. فبعد ملاحظات كثيرة وجد ان كله جواز وكله للاسف بيفشل فى التعايش .. مش بجيبلك اكتئاب لكن يا عزيزى اصبح من الصعب جدا وجود طرفين متفاهمين وكمان قادرين على اتمام العهلاقة والتعامل معاها على انها شركة ..
على انها نبتة ضعيفة تحتاج جل الاهتمام من الطرفين وليس طرف واحد
الظروف والجوابات خلت الرجل غالبا مكحرت والبنت عايزة ترتاح وطلباتها كتير
لكن اكيد فى امثلة جميلة نعرفها حواليك لناس نجحو فى اتمام المعادلة دى والتعامل مع الحب بحرص وحب كشراكة منتجة هادفة للاستقرار
عارفة طولت عليك
بس الموضوع محتاج رغى وانت عارفنى ما اتوصاش
نورت مدونتك يا صالح
ربنا يوفقك
وكل سنة وانت طيب
هدى
هههههههه انت يا عم صالح جاى على الجرح على راى بنات جيلى هما فيييييييين
دلوقتى مفيش لا صالونات ولا انتريهات حتى
بس هقول لسيادتك وجهة نظرى فى الاتنين
الاول جواز الكنب
الحاجه الحلوه اللى فيه انك تقدر ترفض وتقبل لو اكتشفت اى عيوب فى الطرف ا لاخر وانت ضميرك مستريح من غير وجع قلب وكمان بما ان الواحد محبش فوقتها بنتبع ان القلب الخالى سهل قوى يقع فى الحب ده اذا كان الشخص اللى قاعد فى الصالون فعلا شخص مناسب ساعتها الحب هيدخل من اوسع الابواب بس ده ميمنعش نظريه البطيخه برضه
الجواز التانى اهل الهوا
ده صعب شويه خصوصا انه بيكون بدايته فى الضلمه ومحدش عارف هيتوج بتاج الزفاف ولا لا وتعب قلب واعصاب ويا سلام بقى لو جه العمده قالك جواز عتريس من فؤاده باطل
الجواز التالت بقى جواز الشبكه المزعومه
اؤيد رايك بشده فيه لان الواحد وقتها بيتعامل مع جهاز كمبيوتر اصم مجرد تشيل فيشة الكهربا بتنقطع كهربة الحب معاه
لذلك يا سيدى الفاضل
رايى هو كل شىء نصيب ومتفكروش يا بنات ان الجواز راحه على راى عمنا ابو عوف
وكل شىء فى الاول والاخر نصيب الله اعلم الظروف وقتها هتبقى ازاى
اختتم بقناعتى التامه فى الموضوع ده بمقولة
محدش بيتجوز مرات حد
والسلام عليكم ورحمة الله وبركاته
سعيده بزيارة حضرتك جدا وكفايه عشان مستعجله هاخد لفه فى المدونه
:)
انا شايفه ان جواز الصالونات احسن من العلاقات الى بتحصل بين الاتنين لان بجد مش كلها بتنجح وبتكون بهدله قلب على الفاضى غير الذنوب بقى الة من ورا الموضوع ده
جواز الصالونات طريقه تعارف محترمه فى محيط عائلى .. تقدر تقول اه او لا زى متحس وفى كمان صلاة الاستخارة..انا اعرف جوازات بالشكل ده وبجد احلى قصص حب ممكن تشوفها
انما النوع التانى ده زى ماقلت وجع قلب وزنوب على الفاضى
:))
سلامى
بجد مدونه غايه في الروعه وانت كاتب رائع جدا والموضوع جميل اوى
انا شايفه ان جواز الصالونات ده
بالنسبالى حاجه صعبه لانه فى معظم الحالات بيبقي واحد جى يعاين البضاعه علشان لو عجبته يشيل انا مقتنعه اوى بالجواز عن حب ومش معنى كده انى امشي معاه واتفسح والكلام الفرغان ده لا بس على الاقل اكون عارفاه وعارفه طبعه واخلاقه ويكون بنا حب واحترام
اما جواز النت ده انا شايفه انه مينفعش اساسا لان في معظم الاحيان بيبقي مبنى على فيرس فى الرامات في تجارب نجحت بس دي بتبقى حالات نادره جدا
معلش طولت عليك بس بجد مدونتك رائعه وربنا يوفقك وتمتعنا بمواضيعك الجامده دى
rainbow
الاستاذه هدى عبد القادر
كل سنه وانتى طيبه
وصدقينى انا اسعد بهذا التواصل الجميل
ومعاكى فى ان التفاهم بقى شئ نادر بين الزوجين رغم ولكن نحمد لله انه مازال موجود
وشكرا على اهتمام سيادتك
ارق تحية
لماضه
تعرفى ان المثل ده حلو فعلا اللى هو محدش بيتجوز مرات حد
حاسس ان فيه ايمان عميق بالقسمه والنصيب وانا مؤمن بكده
لكن مؤمن برضه ان الزواج عن حب هو افضل انواع الزواج ومش مقتنع بحكاية ان الحب بييجى بعد الزواج
لانه بيبقى تعود اكثر منه حب
مع ان فى ناس هتعترض على كلامى
لكنى انا مؤمن بنظرية
الاختلاف فى الراى
لا يفسد للحب قضيه
shayma ازيك يا شيماء
كل سنه وانتى طيبه
كلمة ذنوب اتكررت فى ردك مرتين
مع انى اعتقد ان الحب بمعنى الكلمه بيبقى بعيد عن الذنب
لكن اتفق معك فى نقظة وجع قلب
فعلا هو بيتعب القلوب بس بيبقى تعب صحى من غيره يبقى حب ممل
والف شكر على اهتمامك ورايك
tota_fm
كل سنه وانتى طيبه
ويا رب اكون دايما عند حسن ظنك
وسعيد جدا برايك وبان مدونتى اعجبتك
وسعيد اكتر باتفاقك معى فى ان الجواز عن حب هو افضل انواع الزواج حاليا بالاسواق
بس بشرط يبقى حب بجد مش اى حاجه تانيه ومره تانيه الف شكر على اهتمامك
ارق تحية
بوست رائع بجد ,
قبل ده كله اسلم عليك ومدونة حلوة اوي بجدبعد ما الواحد قراها بمذمذة ,ما خلاص ازمة الامتحان ربنا فرجها والحمد لله
المهم انا ليا في الموضوع رأي متواضع عن الجواز
هو الحقيقة مابقاش بطيخةلكن اناناس
ليه بقي اناناس؟ اقولك علشان كل الناس تنزل السوق تجيب كنتالوب علي انه اناناس وكذلك في الجواز تلاقي الواحد يروح علي انه اناناس وفي الاخر يطلع كنتالوب
ليلي صادق
اذيك يا دكتوره ليلى
انتى كده هتخلينى اشك فى الاناناس اللى بحبه
ونورتينى بزيارتك
لان رايك يهمنى بجد
تقبلى تحياتى
موضوع رائع من كاتب أروع
يعنى ال حبايه دا كنتى تعرفيه من البدايه ما يمكن رسم عليكى الاحترام بردو فى البدايه وااهو النتيجه حبتيه يعنى مش شرط حب
Post a Comment