Saturday, August 15, 2009

كل سنه وانتم طيبين.....انتظرونى فى رمضان


كل سنه وانتم طيبين.....انتظرونى فى رمضان

رمضان كريم وكل سنه واخوانى المدونين والمدونات البنين منهم والبنات طيبين..تأخرت هذا المره كثيرا وقصرت اكثر فى حق مدونتى واللى اكيد هتعذرنى لانه الفتره اللى فاتت طلع عين اهلى وزمالك فيها ...لانه صعب انك تشطب شقه وتستعد للزواج وتتجوز وتشتغل شغلانه مطلوب منك فيها تركيز شديد فيها ..لان التشطيب كما اقول عنه دائما اسم على مسمى لانه بيشطب عليك فعلا ..ويا سلام بقى على التعامل مع الصنايعيه ..حاجه ولا فى الكوابيس قصدى الاحلام الصنايعى من دول تطلع عشان تقول له الله ينور رغم انه مضلمها اساسا يبص لجيبك ويقولك وعليك يا استاذ وتكرر هذا الموقف كثيرا لدرجة انى فكرت جديا اطلع لهم بالشورت ..وبعد ان تم تشطيب الشقه وجيوبى والحمد لله دخلت على مرحلة الاستعداد لفخ قصدى عش الزوجيه _عقبالكلم اشمعنى انا يعنى؟__وتزوجت والان اقضى ثانى شهر عسل لانى متفق على 120شهر وكاتبهم فى القايمه ..المهم انه فى وسط هذه المعمعه الزواجيه ربنا كرمنى بشغل اتمنى انه يعجبكم لما تشوفوه فى شهر رمضان الكريم ...
الجزء الخامس من مسلسل راجل وست ستات
سيت كوم فؤش لاحمد رزق ولطفى لبيب
سيت كوم بيت العيله لهاله فاخر وشيرين ورزان مغربى
كارتون القبطان عزوز لسامح حسين
طبعا انا مشارك فى حلقات فيهم ومش كاتبهم كلهم لانى مش صالح انور عكاشه
وده لينك جروب بيت العيله على الفيس بوك
بعتذر على التاخير وعلى تقصيرى الحاد والمنفرج فى حق مدونتى ..واتمنى ان الشغل يعجبكم فى رمضان
وكل سنه وانتوا طيبين ورمضان كريم

Thursday, April 30, 2009


اكسب حماتك واشترى حياتك


تزوج احمد من منى ..وكان لكل منهما سياسته الخاصه فى التعامل مع حماته ايمانا منهم بمبدأ اكسب حماتك واشترى حياتك

المشهد الاول
احمد يجلس مع حماته انعام _ام منى_بعد ان وضعت منى مولودها الاول

انعام : مبروك يا احمد يتربى فى عزك
احمد : ربنا يخليكى يا حماتى يا وش السعد
انعام : تفتكر الواد طالع لمين ؟
احمد : اكيد طالعلك ..ملامحه كلها براءه وانسانيه وحنيه وذكاء وده طبعك طبعا
انعام : تفتكر انا بريئه يا احمد ؟
احمد : طبعا يا حماتى انتى بريئه جدا ..ولو مش مصدقانى اعملى فيش وتشبيه عشان تتاكدى
انعام : انا منى بنتى طالعالى تمام ..نسخه منى ؟
احمد : وده اللى مصبرنى عليها لو مش طالعالك كنت زمانى عملت خلع من زمان
انعام : كلامك الحلو هيخلينى اتغر فى نفسى
احمد : حقك طبعا انك تتغرى ..وتتكبرى علينا ومتجيش البيت ده تانى صدقينى مش هزعل
لانه حقك انك تغورى _قصدى تتغرى _يا مرحب يا حماتى

قطع
المشهد الثانى
منى تجلس مع حماتها نعمات _ام احمد_ امام التليفزيون
نعمات : متشوفى يا منى كدخ مسلسل مهند بدأ ولا لسه ..اصله بيفكرنى بشبابى
منى : صدقينى يا طنط لو مش خايفه عليكى من ركوب الطياره كنت قولتلك روحى اعملى دور نور
نعمات : كل اللى يشوفنى يقوللى كده ..معرفش ليه ؟
منى : لانك اجمل من انجلينا جولى على الاقل يا حماتى انتى جمالك طبيعى ..التانيه كلها سليكون
نعمات : مقولتيش يعنى ايه رايك فى المسقعه اللى عملتهالك امبارح ؟
منى : منمتش لحظه من حلاوتها يا طنط ..انا رايى تطلعى كتاب اسمه احلى الاكلات من ايد نعمات وتنافسى الابله فضيله
نعمات : ايه فى التليفزيون ده ماتش الزمالك ..غيرى القناه الفريق ده مش عايز ينصفنى
منى : متزعليش نفسك يا طنط ..الزمالك ده فريق القرن وهو قاصد ينزل درجة تانيه عشان ياخد بتاره من بنى عبيد
نعمات : انا بقت مشكلتى فى الحياة حب الزمالك والحزب الوطنى
منى : طبعا الحزب الوطنى جميل وكله مصداقيه ..ده اجدع من حزب وداد بتاع عبد الحليم حافظ

قطع
المشهد الاخير

احمد يجلس مع منى لو حدهما بعد يوم شاق من المعاناه الحماتيه _نسبة الى حماة كل منهما
احمد : شوفيلك حل فى مامتك يا حبيبتى ..دى بالعه راديو
منى : صدقنى يا حبيبى مامتك قناة فضائيه متحركه قناة ترعى الملل مش بتتحداه
احمد : طب والحل يا حبيبتى ؟ انا بقيت باخد مهدئ للاعصاب قبل مكلم مامتك
منى : يبقى الوضع كما هو عليه يا حبيبى عشان الحياة تستمر
احمد : يعنى اصبر على مامتك اللى فاكره نفسها فاتن حمامه ؟
منى : ايوه يا حبيبى ..وانا برضه هصبر على انجلينا جولى قصدى مامتك يعنى

قطع

سيناريو
صالح سعيد
ايمان متولى

Saturday, March 21, 2009

جاءنا البيان الدامى

جاءنا البيان الدامى

قرر المذيع الهمام سعيدالحلوانى الذى يعمل بقناة عشنا وشفنا الاخبارية النزول للشارع لرصد هموم الناس وذلك ضمن حلقه من حلقات برنامجه _شفت بعينى محدش قاللى_وحدث معه الاتى
___________________________________
المشهد الاول
____________________
سعيد يمسك بمنظار روسى اصيل محاولا دون جدوى رؤية اخر طابور العيش امام احد الافران ..وبعد ان دب اليأس فى نفسه وفى منظاره يقرر اجراء حوار مع احد المواطنين الواقفين بالطابور الذى يرفع يافطه مكتوب عليها _وبشر الصابرين_
سعيد : انت واقف فى الطابور من امتى ؟
المواطن : من يوم الخميس بعد الفجر هو النهارده ايه ؟
سعيد :النهارده السبت وعليك خير
المواطن : هانت ..فات الكتير ما عاد غير الكتير جدا
سعيد :تفتكر ايه سبب ازمة رغيف العيش فى مصر ؟
المواطن_بخوف_.: لو قلت الحقيقه هتحمينى يا بيه ؟
سعيد _بحماس_ : طبعا قول متخافش احنا شعارنا ان خفت متقولش وان قلت يبقى تستاهل ..قول يا راجل
المواطن : مراتى يا بيه هى السبب فى الازمه دى
سعيد : ازاى يا حمش ؟
المواطن : مهى لو كانت وافقت على الفران اللى اتقدم عشان يخطب البنت اللى حيلتنا مكانش بقى ده حالى
لكن تعمل ايه بقى فى قلة عقل الحريم ..انت قلت هتحمينى صح؟
يواجه سعيد الكاميرا سعيد : من خلال قناة عشنا وشفنا نوجه نداء للفران انه يرجع لبنت المواطن عشان يحل مشكلته لان الراجل ظهر عليه الكبر فى الطابور
سعيد _للمواطن_ : تحب تقول ايه ككلمه اخيره
المواطن :احب اقول انى شاركت فى حرب اكتوبر واقسم لك بالله ان عبور خط بارليف كان اسهل من الوقفه فى الطابور
سعيد _للكاميرا_ : وهكذا اعزائى المشاهدين راينا رجل تذوق حلاوة نصر اكتوبر وتذوق ايضا مرارة الاسر فى طابور بلا نهايه

قطع
____________________________________________________________
المشهد الثانى
_______________
يقف سعيد فى حارة من الحارات التى كتب عنها نجيب محفوظ ويجرى حوار مع حسونه احد سكان الحاره لكى يرى سيد السيد على الطبيعه
سعيد : ايه رأيك فى شخصية سى السيد اللى كتب عنها نجيب محفوظ ؟
حسونه : مش نجيب نحفوظ ده بتاع برنامج الست دى امى ؟
سعيد :_محدثا نفسه_ الظاهر ان انا اللى وقعت فى واحد امى
سعيد : طب انت شايف فى نفسك شخصية سى السيد بقوته وجبروته ؟
حسونه :_بحماس_طبعا يا بيه ده انا بضرب مراتى 3مرات بعد الاكل يوميا
سعيد : و ده يبقى ضرب ولا علاج ؟
حسونه :لازم تبقى خشن مع الجنس الناعم وياريت اكون عبرة وقدوة للمشاهدين
يرن موبايل حسونه ينظر للرقم بذعر محدثا سعيد
حسونه :ثوانى ارد على الجماعه مراتى
سعيد :اتفضل يا سى السيد عصرك
حسونه _فى الموبايل_: حاضر يا ست الكل ..اوامرك ..هو انا اقدر اقول لا..طبعا هكون قبل المغرب فى البيت..مش هتاخر ..مفيش غدا مش مهم هقضيها كشرى...ولا عشا مش مهم يا بخت من نام خفيف
سعيد :_للكاميرا_وهكذا اعزائى المشاهدين رأينا الفارق بين سى السيد نجيب محفوظ وسى السيد اليومين دول بعد ان اصابه فيروس الخضوع خوفا من الخلع
والى لقاء فى حلقه اخرى من برنامجكم شفت بعينى محدش قاللى
قطع
____________________________________________________
صالح سعيد
عمرو الطاروطى
مروه جمعه

Sunday, March 8, 2009

راجل وست ستات الجزء الرابع على قناة الحياة


راجل وست ستات الجزء الرابع على قناة الحياة

يبدو والله اعلم ان الفتره القادمه سوف تشهد اذاعة مسلسل راجل وست ستات على28قناة فضائيه والمعلومه دى من الشركه مش من دماغى ...وربنا يسترها لانى خايف الناس تزهق منه ومن اللى عاملينه وساعتها هنكر طبعا مشاركتى فى المسلسل ومش بعيد اقول ده تشابه حلقات مش اكتر ..عموما دلوقتى اعترف انه اتذاعلى ست حلقات فى الجزء الرابع وباذن الله منتظر اذاعة 4حلقات فى الجزء الخامس فى رمضان ..ودعواتكم لانكم باذن الله هتشوفونى فى عملين تانين فى رمضان غير راجل وست ستات ..وباذن الله يعجبوكم وهتكلم عنهم فى وقتهم باذن الله

وارقام حلقاتى اللى بيتذاع من اول شهر مارس على قناة الحياة الساعه الثامنه مساء بتوقيت القاهره 2 /10 /14 /19

وحلقتين فى العشرينات مش فاكر رقمهم بصراحه وباذن الله يعجبوكم وده لينك حلقة الملوانى الذى سقط منى سهوا فى بوست سابق وهتتذاع على الحياة يوم 10مارس تقريبا




ودعواتكم لان الفتره الجاية فتره صعبه بجد

Tuesday, February 24, 2009

بالفيديو حلقة خلاص مسافر فى راجل وست ستات


بالفيديو حلقة خلاص مسافر فى مسلسل راجل وست ستات
ده لينك حلقة خلاص مسافر فى مسلسل راجل وست ستات واسف على اللخبطه فى البوست اللى فات لانى حطيت لينك مكان لينك تانى بس اطمنوا يعنى الحلقتين تبعى يعنى زيتنا فى دقيقنا ....والحلقه دى احداثها حقيقيه تماما
واتمنى ان اللينك ده يشغل الحلقه ويطلع لينك جدع وابن حلال
قولوا امين بسرعه

Wednesday, February 18, 2009

بالفيديو وبدون تحميل شاهد تانى حلقه ليا فى راجل وست ستات


حلقة الملوانى لما يلعب
اصدقائى المدونين الاعزاء
ده لينك تانى حلقه ليا فى مسلسل راجل وست ستات ..مشاهده مباشرة بدون تحميل
الحلقه اسمها الملوانى لما يلعب وضيف الحلقه اللاعب ابراهيم سعيد...اتمنى اعرف رايكم فيها ..واتمنى انها تعجبكم
وباذن الله اللى جاى هيبقى احسن من كده
الحلقه دى ليها ظروف خاصه جدا من حيث الكتابه ...هقولها فى بوست بعد كده باذن الله
وباذن الله الاسبوع اللى جاى اجيبلكم لينك الحلقه التالته بعنوان تار بايت
ومساء الورد عليكم جميعا
اخوكم
صالح سعيد

Wednesday, February 11, 2009

هلت البشاير اول حلقه تتذاع ليا فى مسلسل راجل وست ستات


هلت البشاير اول حلقه تتذاع ليا فى مسلسل راجل وست ستات
بقالى ربع ساعه كاتب العنوان اللى انتوا شايفينه ومش عارف اكتب ايه بجد رغم ان اللماضه بتجرى فى دمى
انا من جوايا بقول الحمد لله على كل شئ ومن جوايا برضه بقول يا رب كملها على خير
اتذاع ليا امبارح اول حلقه فى مسلسل راجل وست ستات وجانى احساس اول موضوع تم نشره فى الدستور
من سنتين بالتمام والكمال لانى وقتها كنت ماشى بالجرنان فى البلد كانى ماشى بالبطاقه وللاسف مينفعش امشى بالتليفزيون فى البلد ...بس بجد هو نفس الاحساس ..والظاهر ان طعم اول مقال زى طعم اول حلقه وزى طعم اول حب
ورغم انى معترف بينى وبين نفسى انى لسه بقول يا هادى الا ان هذا لا يمنع انه جوايا طموح وطموح مشروع
مش هتكلم عن الطموح ده لان الصح ان الواحد يعمل وبعد كده يتكلم ..
انا حبيت بس ان اخوانى المدونين الاعزاء يشاركونى فرحتى بالحلقه الاولى ليا
الحلقه دى كان ليها ظروف خاصه جدا وهى ان اشرف عبد الباقى كان مسافر تونس وعايز فكرة حلقه ميظهرش فيها غير فى مشهدين يصورهم ويسافر ...عملت الفكره واللى كان بطلها ابوه فى المسلسل سعيد طرابيك
وباذن الله هبقى اجيب لينك تحميل الحلقه عشان تشوفوها وهحاول انى انزلها على المدونه
واتمنى لما تشوفوها انها تعجبكم

Monday, January 26, 2009

مروة جمعة وصالح سعيد.. دويتو صحفي جديد في جديد


مروة جمعة وصالح سعيد.. دويتو صحفي جديد في جديد


المقال مشترك بيني وبين الزميلة مروة جمعة ونشر في جريدة الدستور.. أتمنى انه يعجبكم


********

عندما أصبح هيثم جبر رئيساً للجمهورية!ا


فى عام 2050 وبعد ان تمكن المدرس هيثم جبر من الوصول لمنصة حكم مصر بعد الانقلاب الذى قاده ضد الرئيس السابق تامر الرابع عشر اخذ على عاتقه مهمة كيفية التخلص من هموم الشعب او التخلص من الشعب نفسه _مش هتفرق_...
________________
المشهد الاول
_____________
الرئيس يتحدث مع نائبه مهند جعفر فى بهو القصر الجمهورى
النائب : الوزراء بره يا ريس جايين عشان يحلفوا اليمين
الرئيس :مش هيحصل قبل ميحيوا علم مصر يا مهند
النائب :مش كفاية الطابور اللى واقفين فيه من الصبح يا ريس ؟
الرئيس : خليهم يجربوا وقفة الطوابير اشمعنى الشعب يعنى
النائب :قرار عظيم ..حكيم..العين صابتك ورب العرش نجاك
الرئيس : هو انا سايق ميكروباص ..بطل نفاق ودخلهم
قطع
________________________
المشهد الثانى
_____________________
يجلس الرئيس مع الوزراء على المائده المستطيله
الرئيس : انا جمعتكم النهارده عشان اعرف خطة كل واحد فيكم للنهوض بالبلد
وزير الاعلام (بحماس):البلد بخير يا ريس طول ما قائدها عظيم وحكيم
الرئيس (بضيق): يا ريت اللى عايز يتكلم يرفع ايده الاول متنسوش انى مدرس اساسا
يهمس احد الوزراء لوزير مجاور له ساخرا : احنا فى اجتماع وزراى ولا فى فصل
الوزير المجاور :وطى صوتك ليبقى مصيرك انت الفصل من الوزاره وتاخد استمارة مرواح
الرئيس : كل واحد يقوللى منهجه فى تطوير البلد فيما لايزيد عن سطرين
وزير الزراعه : احنا يا ريس هنستصلح الصحراء الشرقيه بتكلفة 50مليار وهنجنى اول ثمار بعد 150سنه ربنا يديلك طولة العمر
الرئيس :150سنه ..ده كتير ..مينفعش يبقى اقل من كده ؟
وزير الزراعه : عشان خاطرك يبقوا 140 سنه يا ريس
وزير التعليم : يا ريس احنا بفضل الله ثم توجيهات سعادتك قضينا على ظاهرة تسريب امتحانات المرحله الابتدائيه ؟
الرئيس : عملتوا ايه يعنى ؟ لغيتوا المرحله
وزير التعليم _ضاحكا_ :دمك سكر يا ريس احنا عملنا امتحان وهنسربه وهنفاجأ الطلبه بامتحان تانى خالص يوم الامتحان
الرئيس _محدثا نفسه_ : ده مش اسلوب وزاره ده اسلوب عصابه
وزير النقل : احنا يا ريس هنطبع على كل تذكرة قطر جملة _الاعمار بيد الله_عشان لو حصل حوادث يبقى احنا منبهين على الناس
الرئيس _بغضب _ : وبالمره زودوا رسوم التذكره ولو حد سال قولوا انه بدل كفن مينفعش طبعا ده تهريج
وزير النقل : هدى نفسك يا ريس صحتك هنشوف حل تانى
وزير الصحه : احنا يا ريس حلينا مشكلة نقص الدم فى البلد ..عملنا حافز للمواطن عشان يتبرع ..صرفنا لكل متبرع ب2جنيه عيش
الرئيس : وايه النتيجه ؟
وزير الصحه : احنا دلوقتى ممكن نصدر الدم يا ريس
الرئيس :انا حاسس ان المشكله مش مشكلة فقر دم ..دى مشكلة فقر شعب
وزير التموين : احنا حلينا مشكلة نقص الشاى يا ريس ..استوردنا نوع شاى الباكو منه يكفى المواطن 5شهور ..لان الشديد والعنتيل ميقدرش يشرب اكتر من كوبايه فى الشهر من النوع ده
الرئيس : يعنى انت بتشرب من نفس نوع الشاى ده ؟
وزير التموين .: انا بقول العنتيل يا ريس انما انا صحتى على ادى وعيان ولسه كاشف امبارح والدكتور كاتبلى فى الروشته ليبتون
الرئيس _بغضب_:انت عايز تفهمنى ان انجاز وزارتك هو توفير الشاى
وزير التموين : هنوزع ساندوتش مدعم لكل مواطن على بطاقة التموين
الرئيس _ساخرا _:ده على اساس انك وزير الكانتين مش التموين
_______________________________________________

المشهد الاخير
_____________________
الرئيس يجلس وحده محدثا نفسه
البلد دى مليانه هموم ومشاكل ...انا كان مالى ومال الشغلانه دى
مش لو كنت سافرت اعاره كان احسن
___________________________
تترات النهاية
______________________________
صالح سعيد
مروة جمعة

Wednesday, January 14, 2009

امنيات عام 2009

صعود مصر لكأس العالم وهذا لان الناس جعانه فرحه وقدرنا كمصريين ان الكره اصبحت سر سعادتنا واحساسنا بالانتماء وربنا يكرم حسن شحاته وبالمره يا ريت ابوكريم يحلق شعره لانه متناقض مع شخصيته الوقوره
____________________________
(2)
توافر رغيف العيش الذى اصبح عمله نادره وان تتاكد الحكومه ان شعار الشعب فى العام الجديد هو _مش مهم كايزر او فينو العيش هو اللى احنا عايزينه_
_____________________________________
(3)
وضع حد للمهازل والاهانات التى يتعرض لها المصريين بالخارج وكأننا ارخص اهل الارض واسترداد حق المجلودين فى المجلده العربيه السعوديه
_____________________________________________________
(4)
وضع رقابة مشتركه على الفضائيات لان القنوات الغنائيه وصلت لمرحلة المهزله الاخلاقيه واصبح هناك قناه لكل مواطن والعراء انتشر وتفشى لدرجة ان تشعر بانك لو شغلت الاوروبى هيبقى ارحم من النايل سات
___________________________________________________________
(5)
ان تتخذ الحكومه قرارا جريئا بخصخصة التليفزيون المصرى لانه لا يشاهده احد وخساره على الفاضى فنحن الان فى زمن الوصله ولا يكفى ان يرفع المسئولين شعار البيت بيتك وهو بيت تامر امين بس
__________________________________________________________
(6)
اقرار قانون للعداله الاجتماعيه فليس من العدل او المعقول ان ياخذ ممثل فاشل فى فيلم او مسلسل افشل منه اكثر من ما ياخذه موظف مطحون لا يعرف للحمه طعم او رائحه طول عمره
_________________________________________________________
(7)
اصلاح التعليم الذى اصبح عبئا ثقيلا على كاهل كل اسره مصريه فالدروس الخصوصيه حرمتهم من اساسيات الحياه _ويا ريت على فايده_وتكفى الدراسه التى اثبتت ان الطفل المصرى يبقى ذكيا حتى دخوله المدارس
______________________________________________________
(8)
ان تعترف الحكومه لمره واحده انها اخطأت تعترف على اساس ان الاعتراف بالحق فضيله مش فضيحه ...وتفتح ملفات الفساد التى اصبحت اكثر من اسراب الجراد
______________________________________________________________
(9)
الغاء قانون الطوارئ فعليا بدلا من الاكتفاء بتغيير اسمه فقط فهذا القانون سلب المصريين احساسهم بالامان فى بلد المفروض انها دولة الامان مش امن الدوله
____________________________________________________________
(10)
ايجاد حلول غير تقليديه لمشكلة البطاله لان الشباب اصبح عاطل بالفطره ..والزواج اصبح حلم صعب المنال
وان تثق الحكومه فى ان العاطل اليوم من السهل ان يصبح غدا متحرش او ارهابى
_____________________________________________________
امنيه شخصيه
(11)
ان يكون هذا العام نهاية حياة العذاب والعزوبيه ودخول مرحلة فخ قصدى عش الزوجيه وكما قالت كوكب الشرق
وكفاية بقى تعذيب وشقى
_____________________________________________________
صالح سعيد

Saturday, January 3, 2009

عادات وتقاليد قريتنا _ربنا ميقطعلك عاده_..

عادات وتقاليد قريتنا _ربنا ميقطعلك عاده_..

على الرغم من انه لا يوجد بين اهل قريتنا الحبيبه عضو فى لجنة السياسات الا انها تتميز بسياسه خاصه بها تتمثل فى الانفراد بعادات وتقاليد اكاد اعتقد انها لا توجد فى اى قرية بين قرى المحروسه وعلى الرغم من غرابتها الا ان الالتزام بها يندرج تحت بند الاصول اما من يفكر فى عدم الالتزام بها فيا ويله ويا سواد ليله لانه بهذا الفعل المشين يعرض نفسه للقيل والقال ومش بعيد كمان يكون مصيره النفى خارج القريه ويعيش بعيد كأنه من المطاريد وسمعنى سلام ذئاب الجبل ..
خد عندك مثلا ليلة الحنه العريس لازم يحلق شعر ودقن فى الشارع امام اهل القريه ولو معملش كده يبقى مش مقدر الناس اللى جاية تشمت قصدى تهنيه اما الصباحية بقى فهى عندنا تبدأ من السابعه صباحا عشان كده العريس بيعتبر اهل العروسه زوار الفجر .ولازم و-حتما ولا بد العريس والعروسه ينزلوا يسلموا على كل الموجودين ولسن حال العريس يقول هما ليه مخلوهاش مسائيه بدل صباحيه ..وننتقل من حالة الزواج الى حالة العزاء فهو كما يبدو نهاية كل متزوج ..عندنا يا ساده اهل المتوفى لازم يروحلهم افطار من معظم اهل القريه وده قبل الدفن اما بعد الدفن فلابد ان يخرج من كل بيت صينيه الى دار مناسبات اهل المتوفى ثلاث مرات فى اليوم لمدة ثلاثة ايام الغريب بقى لازم يبقوا واقفين يشوفوا مين اللى جاب ومين اللى مجبش صوانى وطبعا اللى مجبش يبقى مش مقدر الموقف والجايات اكتر من الرايحات كما انه يجب على كل واحد مطلع صينيه انه يتسابق لكى يجلس معه واحد من اهل المتوفى ويا سلام بقى لما يقعد معاه يبقى حاسس انه كبير العزا والبلد كمان.
الطريف انه ذات مره والدة صديق لى لم يسعفها الوقت ولا انبوبة البوتجاز لكى تطبخ الرز علشان تطلع الصينيه لكنها فضلت ان تضع الرز بدون طبخ على انها متطلعش صينيه لانها تقترب الى حد الجريمه وارسلت الصينيه للدوار وصديقى لا يعلم لم يتم طبخه اساسا فهو بالدوار منتظر الصينيه وكالعاده اخذ يلح على ابن المتوفى لكى يجلس معه على الصينيه وسط منافسه من باقى الناس وخسر المنافسه وده ستر من ربنا عليه لانه كان هيتفضح وجلس صديقى على الصينيه ليفاجأ يأن الرز انشف من حجارة الاهرامات ذهل وصعق وحمد ربنا ان ابن المتوفى لم يجلس معه ..
اما المولد النبوى الشريف له طقوس خاصه جدا تتمثل فى حلقة ذكر كبيره جدا حتى تستوعب العدد الكبير من اهل القريه الذين يحرصون عليها ويدفعون الفلوس من اجل اتمامها على خير ولا حرج من تركيب عشر ميكروفو نات حتى يسمع الذكر جميع اهل القريه والقرى المجاوره ..اللذيذ بقى ان الراجل اللى ماسك المايك تجده انتقل فجأه وبدون سابق انذار من التواشيح الى اغنية شكل تانى لنجاة وقبل ان تندهش تجده انتقل الى اغنية انا بعشقك لمياده الحناوى ثم يختم وصلته الغنائيه بام كلثوم والحب كده وببقى عايز اقوله متخليها الذكر كده..يتم هذا واهل القريه يذكرون باخلاص وضمير الى ان يصل لمرحلة فقد الوعى ويسقط ارضا ويطلقون عليها مرحلة الاندماج وانه راجل بركه ..وتبقى الاسئله فى ذهنى هل الاحتفال بالمولد النبوى الشريف يتم بهذا الشكل ؟ ولماذا يفحص اهل المتوفى الصوانى _هما فى ايه ولا فى ايه_؟والواحد لما يبقى ودع مرحلة العذاب والعزوبيه عشان يلاقى اهل العروسه محتلين البيت من السابعه صباحا ده يرضى مين؟