الدعم فى عين امه غزال

الدعم فى عين امه غزال

لا يوجد سبب منطقى امام حملات الاشاده من الحكومه عن طريق الصحف الحكوميه بالدعم الذى يتلقاه المصريون سوى ان الحكومه تنظر الى دعمها الوهمى على اساس نظرية (الدعم فى عين امه غزال)؟

_________________________

والله احنا شعب طيب وعاطفى ولينا الجنه كمان فمع مفاجأة ال30فى الميه انبسطت الناس وقالت الحمد لله وبداية الغيث قطره وبدأ الهدوء يتسلل الى قلوب وجيوب المصريين ولكنه كان الهدوء الذى يسبق العاصفه لانه بعد اقل من اسبوع ارتفعت اسعار البنزين والتى اثرت على اسعار اخرى كثيره فعاد الناس يرددوا المثل الشهير

يا فرحه ماتمت خدها البنزين وطار

_____________________________________

اصبحت اشعر بمغص فكرى شديد فى خلايا مخى اذا حدث ولا قدر الله ووقعت عيناى على مانشيتات الصحف الحكوميه لانها تتخيل واقع لا وجود له على الاطلاق والمشكله ان هذا المغص الفكرى تحول الى هاجس وسواس قهرى ظهر بوضوح عندما سالنى عم صلاح عن مصير ساندوتشات الفول التى طلبتها هل سأتناولها عنده ام يلفها فى ورقة جرنان؟؟

قلتله لفها فى ورقة جرنان بس ميكونش حكومى وحياتك

_______________________________________

تزعجنى حالة التعصب الاعمى عند المصريين كرويا فانا لن انسى عم احمد صاحب القهوه عندما كان يشجع باريس سان جيرمان وهو يلعب مباراه مع الزمالك وعندما حاولت ان اوضح له ان باريس سان جيرمان فريق فرنسى وان الزمالك فريق مصرى قاللى انه طالما فيها زمالك اعتبر ان جدى الاكبر يبقى كليبر قلتله فى الحاله دى يا عم احمد اعتبر انت كمان ان جدى الاكبر هو سليمان الحلبى

__________________________________

اشعر بان احمد عز افندى بدأ يتوغل وينتشر ويسيطر على اشياء كثيره فى مصر غير الحديد وتوغله مقصود وليس بمحض الصدفه ...الغريب اننى كلما اسمع اسمه اتذكر تلك النكته ...عندما جلست هيفاء ونانسى واليسا يتحدثون عن فارس احلامهن وقالت اليسا انها تتمنى الارتباط بظابط شرطه بينما ردت نانسى بان فارس احلامها بطل صينى وعلى الجانب الاخر اكدت هيفاء انها تتمنى ان ترتبط بلاعب كره شهير ...سمعهم واحد متطفل دخل عليهم وقاللهم اعرفكم بنفسى

انا العقيد شونج يونج الشهير بابو تريكه

ما درجة علاقتك بجيرانك

ما درجة علاقتك بجيرانك ؟

ما درجة علاقتك بجيرانك ؟ وهل يحدث تبادل للزياره بينكم؟ وفى اى مناسبه

كان هذا هو سؤال شغل دماغك بجريدة الدستور منذ اكثر من عام واجبت عليه وتم نشر مقالى وكانت اجابتى كالتالى

شغل رافت الهجان

بداية كده انا ريفى والجار عندنا بيبقى له قيمة كبيره يعنى كانه من اهل البيت وانا ربنا كارمنى بشوية جيران زى العسل بصراحه واهم ما يميز علاقتنا هو الترابط غير العادى بينا اللى ممكن يوصل لدرجة الفضول احيانا خد عندك مثلا عمى فرج البقال ده تقدر تقول عليه اطيب جار فى الشرق الاوسط ممكن تاخد منه شكك مدى وده سر حبى ليه طبعا اما عمى عادل ده حكاية لوحده مسمى نفسه نقيب الفلاحين فى البلد وفاكر نفسه مثقف جدا وانه مظلوم فى البلد دى انا مره سألته امتى بقى هيرصفوا بلدنا قاللى دى غلطتنا اننا ساكتين ولازم نكتب شكوى لوزير الاسفلت

ويا سلام بقى فى الاعياد او المناسبات تلاقى المنطقه كلها كأنها بيت واحد ويوم فرحك لازم تسلم على البلد كلها وايدك توجعك من كتر السلامات وتتلخبط كمان واللى يقوللك مبروك ممكن تقوله وانت من اهله على اساس انك تعبت وعايز تنام لكن بصراحه برضه مشكلتنا كجيران هى الفضول اللى بيزيد عن حده يعنى مش معنى انك جارى يبقى لازم تعرف كل حاجه عنى لان برضه لينا جيران ساعات بشك انهم مخابرات وانى رأفت الهجان فعلا فى جار عندنا بيبقى ناقص يقعدنى على جهاز كشف الكذب وهو بيكلمنى

يعنى من الاخر العلاقه بين الجيران لازم تكون مبنيه على اساس الاحترام المتبادل بينهم وعدم التدخل فى شئون الغير من غير اذن سامع يا عم (..........) ولا بلاش ليزعل

اخى العزيز محمد هشام واستاذى بلال فضل

اخى العزيز محمد هشام واستاذى بلال فضل

مهما كتبت لن استطيع ان اصف شعورى عندما قرأت الدستور الاسبوعى ووجدت حوار مع استاذى بلال فضل يقول فيه انه يتابع باهتمام قراء اصبح يقرأ كل ما يكتبونه مثل صالح سعيد ومروه جمعه حسيت بجد انى بحلم وقفلت الجرنان وفتحته تانى لقيت الكلام موجود برضه صحيت اخويا المهندس محمد يقرا الجرنان يمكن دى تهيؤات صحى وقاللى نفس الكلام ...وقبل محد يقول على ايه ده كله يعنى ؟ اعترف اليكم بانى اتعلمت الكتابه الساخره على ايد بلال فضل منذ زمن بعيد فهو استاذى بمعنى الكلمه ولا ابالغ عندما اقول انى حفظت كثير من مقالاته الرائعه واعترف ان اسم مدونتى ادهم كانت على اسم فيلمه خارج عن القانون قبل تعديله ...عرفت على يد بلال فضل الفرق بين الكاتب الموهوب والكاتب الموهوم وكنت ومازلت متابع جيد جدا للدستور ولكنى لم اراسلها الا من العدد رقم 100

وتم نشر مقالى حسيت بقيمة ان ترى كلمتك النور وادمنت هذا الاحساس فاصبحت اكتب كل اسبوع وكنت بحلم ان بلال يقرا ولو سطر من موضوعى ..اما اخى العزيز محمد هشام عبيه اتعلمت منه ازاى تعمل عنوان جذاب لموضوع يكون خارج دائرة الملل والروتينيه وبشكره على كل كلمه قالها فى حق الشراقوه

صدقونى من ساعتها وانا خايف امسك القلم لان كلامهم الجميل مسئوليه كبيره ادعو الله ان نكون على قدرها

واحتفالا منى بهذه المناسبه الجميله ادعوكم لقراءة اول مقال تم نشره لى فى الدستور وكان فى شغل دماغك وكان السؤال هل تمتلك بطاقة تموين ؟وما هى مكوناتها

مشربش الشاى اشرب ازوزه انا

نعم امتلك بطاقة تموين وتتكون من ثمانية افراد وركز معايا فى اللى جاى لانى بجد بشكر حكومتنا الموقره وبدعيلها اللهم احفظها لنا واسكنها فسيح نارك قولوا معايا امين احنا بنصرف على البطاقه نوع شاى مالوش مثيل بجد ومش عارف جابوه منين احنا بنجيب التموين مخصوص عشانه وبنجيب جنبه شاى تانى بس نوع يتشرب ادمى يعنى بس لازم نجيب بتاع الحكومه ييجى الضيف اصرخ كباية شاى يا جماعه يشربها من هنا وتنتهى العلاقه من هنا وابقى حريص انى مشربش معاه العمر مش بعزقه ومش احكيلك على الزيت زيت مين ده سولار حاجه غريبه كده فيها شبه من الزيت عشان منظلمش الحكومه اما السكر فحدث ولا حرج مهما تحط فى الكبايه هى هى برضه كانك بتحط فى سرك مش فى الكبايه عارف انا نفسى فى ايه نفسى اعزم حكومتنا الشقيه دى على كبايتين شاى من الشاى بتاعهم حتى يرتاح الشعب المصرى بس خايف يطلع حد فيهم لئيم شويه ويقولهالى
مشربش الشاى اشرب ازوزه انا

اعتذار للاخوه المدونين

اعتذار للاخوه المدونين

اعتذر لانى لم اكن متابعا الفتره الماضيه وان كان هذا لاسباب خارجه عن ارادتى تماما

وصدقونى انا فى الاول مكنتش مقتنع بمدى اهمية المدونه اساسا لكن تغير رايى تماما بعد التواصل الجميل بينا

حسيت انها مسئوليه بجد وانها مجال رائع للتنافس الشريف بينا كمدونين

اللى شغلنى عنكم هو انى كنت بكتب الحلقه التالته ليا فى مسلسل راجل وست ستات

بعتذر لكل من شرفنى بزيارته لمدونتى المتواضعه ولم يسعفنى الوقت لكى ازور مدونته

وباذن الله قريبا جدا ازور كل مدوناتكم لانها وحشتنى جدا

انتظرونى

شفت بعينى محدش قاللى

شفت بعينى محدش قاللى

اكاد استطيع ان اجزم ان هذا المصطلح _حيوان اليف _لايوجد له مكان فى معظم انحاء مصر .واقول هذا من خلال مشاهداتى عبر مراحل عمرى المختلفه . واعتقد انه لاتوجد فى جمعية الرفق بالحيوان دفاتر تكفى لاثبات جرائم المصريين تجاه الحيوانات الاليفه . وهذا رغم ان الرسول _صلى الله عليه وسلم _اوصانا بالرفق بالحيوان واعطانا امثله فى ان الرفق بالحيوان من الممكن ان يكون سببا فى دخول الجنه وان تعذيبه ومعاملته معامله سيئه من الممكن ان يكون سببا فى دخولنا النار . ولكن مانشاهده يوميا يخالف هذا تماما فلا توجد كلمة رفق فى التعامل مع الحيوانات فانا لن انسى عندما كنت صغيرا صديقى محسن عندما كان يتلذذ بتعذيب الكلاب وعندما يرى كلب فى الشارع يرجمه كانه ابليس وويل للكلب اللى يقع تحت ايده كان عاملهم مكان زى المعتقل حابسهم فيه وكل يوم يعذبهم وكنت دائما اوبخه على ذلك واساله لماذ ا تعذبهم بهذا الشكل هل تريد منهم الاعتراف بشئ معين وهم رافضين ؟ واتضح لى انه يعانى من عقده قديمه حيث قام كلب بعضه وهو صغير فى منطقه حساسه . وشتان الفارق بين هذا المشهد ومشهد شريف صاحبى وهو بيكلم واحده امريكيه على النت وشايفها على الكاميرا وهى تعامل الكلب برفق وبتاكله لحوم ولانشون من النوع الغالى وشريف قاعد مش لاقى العيش البلدى حتى .
وعندنا فى القريه اصبح فى قمة دهشتى عندما اجد فلاح راكب حمار والحمار بيجرى والفلاح نازل ضرب فيه برضه وابقى عايز اساله انت بتضربه ليه مهو بيجرى ولا انت عايزه يطير ؟ واتالم فعلا عندما اجد مجموعه من الاطفال ساحبين كلب صغير من رقبته بيزفوه فى القريه واتام اكثر عندما اجد قطه تدخل احد البيوت عشان تاكل لقمه تفاجئ بان اهل البيت مش لاقيينها اساسا .
وخلاصة القول اننى اعتقد انه اذا كان الانسان مش واخد حقه فى البلد دى يبقى الحيوان هياخدها ازاى ؟
واعتقد ايضا ان قلة الوعى العام هو السبب فى تعامل المصريين مع الحيوانات بهذه الطريقه الوحشيه
واشعر احيانا بان الحيوانات هاين عليها تطفش من البلد دى بس مش عارفه على اساس ان البنى ادمين مش عارفين يطفشوا يبقى هما هيعملوها ازاى ؟

فص ملح وداب

فص ملح وداب

اقسم بالله العظيم اننى اخر مره رايت فيها عضو مجلس الشعب عن دائرتى كان قبل الانتخابات الاخيره ب10ايام لا وايه كمان هو اللى جه لحد عندى _شوف التواضع_وحدث هذا عندما كنت جالسا على القهوه وحضرته كان عامل مسيره انتخابيه _مدفوعة الاجر _واشار عليه احد مستشاريه المنافقين بالدخول على القهوه ليسلم على الناس . وفعلا سلم على كل الموجودين ومش هاحكيلك بقى على حفاوة سلامه وعذوبة ورقة لسانه تحس انه ملاك هبط عليك فجأه _ده كان ناقص يحاسب على المشاريب كمان _ ولان هذا العضو _الخفى _ كان تابع للحزب الوطنى ولم يلقى حفاوة من الناس لانها اصبحت تكره كل ماهو حكومى ماعدا المرتب ومع ذلك نجح لان الحكومه عايزه كده ... وعلشان كده عاقبنا هذا النائب بان اختفى تماما تقدر تقول فص ملح وداب وصدقونى انا ساعات بنسى اسمه بجد لانى لم المس اى انجاز على يديه الكريمتين خلال عامين كاملين

لكن الموقف الى خلانى اكرهه بجد هو ان احد فقراء دائرتنا ربنا رزقه بتوام لكن كان لازم يدخلوا حضانه لمدة اسبوعين ودى تكلفتها عاليه جدا والراجل فقير جدا جدا فذهب لهذا النائب لكى يحل له هذه الموقف الانسانى الصعب لكنه اتصدم عندما خذله النائب بانه لايملك حل لمشكلته ولم يكتفى بهذا بل اعلنها بكل بجاحه بان الحكومه هى اللى نجحته مش اهل الدايره وهذا الموقف جعلنى اشعر بان الحزب الوطنى بيعمل عملية استئصال للانسانيه والرحمه من قلوب رجاله لان مشاعر النائب المحترم لم تهتز ولو للحظه واحده تجاه هذا الموقف مع انه يقدر يحله بالتليفون . اما لو حصل لا قدر الله وقابلته هساله ثلاثة اسئله الاول ماهى الوصفه السريه لاختفائك طوال عامين وهل تمتلك طاقية الاخفاء ؟
الثانى ماذا سيكون شعورك لو كنت مكان الراجل الغلبان ابو التوام واين كان ضميرك ولا ضميرك مستتر ؟
الثالث لم نرى او نسمع لحضرتك حس ولا خبر فى المجلس الموقر هو مش حضرتك برضه فى مجلس الشعب المصرى ولا ربنا كرمك واحترفت فى مجلس الشعب الاوغندى ؟؟؟؟

مليش في الدنيا غيرك .. يا أمي !!ا

مليش في الدنيا غيرك .. يا أمي !!ا

أمي الحبيبة ، ونحن على اعتاب الاحتفال بيوم عيدك - عيد الام - اقدم لكى عرفانا واعترافا ، عرفان بالجميل وبعطفك وحنانك وبكل ما تعلمته على يديكى الطاهرتين ، واعترافا باننى مهما فعلت ومهما قدمت اليكى لن استطيع ان اعطيكى ولو جزء بسيط من حقك ، فقط سأظل اردد دعائى المحبب الى قلبى : ربنا يخليكى لينا يا ست الكل

امى الحبيبه .. لن انسى حنانك الفطرى عند ايقاظك لى من النوم للذهاب للمدرسه لما كنت بعمل نفسى نايم ورايح فى سابع نومه ، مع انى ببقي صاحى ومستمتع بدعواتك بالتوفيق والنجاح ، وقتها كنت اشعر بان الدنيا كلها ملكى من فرط دعواتك الجميله ، واعترف بانى كنت بفضل عامل نفسى نايم لحد محس بخطورة الموقف وان اخواتى هينسفوا الفطار لو مصحتش.

امي الحبيبه ، فقد كنت المح فى عينيكى معنى كلمة صدق الاحساس ، كانت دموع فرحتك تغسل همومى وتضاعف فرحتى ، وادعو الله ان ارى .. لازلت اتذكر دموع فرحتك الصادقه مع كل خبر حلو تسمعيه عن ابن من ابناءك سواء كان نجاح او زواج وعقبال ما أشوف فرحتك يوم فرحى - قولوا آمين

امى الحبيبه.. اسمحي لى ان اقدم اليكى شكوى ، واعذرينى لاقحام شكوتى فى رسالتي اليكى بمناسبة يوم عيدك فهى شكوى الى امى من مصر وهى امى وامنا كمصريين ايضا ، فمصر يا امى التى نعيش فيها ليست هى التى نتمناها ونرجوها ، فهل يرضيكى ان نصبح فى ذيل الامم ونحن صانعوا الحضارات ؟ هل يرضيكى يا امى ان نرى نظرات العجز فى عيون الاباء لعدم قدرتهم على مواجهة الحد الادنى من مصاريف ابنائهم ؟

امى الحبيبه.. اعذرينى ، ودعينى اكمل لكى اسئله لم اجد لها اجابة شافيه ، هل يرضيكى تكدس الناس وصراعهم للحصول على رغيف عيش و لا يجدونه ؟ هل يصح ان نرى كل يوم اسعار جديده مرتفعه لكل شئ بلا استثناء ؟ لقد اصبحنا يا امى نعيش فى بلد كل شئ غالى فيه الا شئ واحد وهو البنى ادم ، هل يرضيكى يا امى أن يكون هناك اقليه تكسب كل يوم ملايين الملايين واغلبية الناس مش لاقيه ملاليم الملاليم ؟؟

امى الحبيبه.. اعتذر اليكى عن اطالتى فى شكوتى ولكنى لم اجد من هو اعز منك الى قلبى لكى افضفض له عما يدور بداخلي ، وكل سنه وانتى طيبه يا اعز واغلى واطيب قلب فى الدنيا كلها ..ا

انا وانت والسبكى والنظام وهواك

• 
  
  
  
  
  
  اكاد استطيع ان اجزم ان ال السبكى للانتاج السينيمائى لا يعرفون شيئا عن المثل الشعبى الذى يقول _اللى يزيد عن الحد يقلب للضد _حتى وان كانت هذه الزياده فى دعايتهم للفيلم الذين قاموا بانتاجه . وهذا لان فلسفتهم الخاصه فى الدعايه تقوم على مطارده المشاهد فى كل مكان وزمان حتى يشترى تذكرة الفيلم ويشترى دماغه .
  وظهر هذا الاسلوب فى كل افلام السبكى ابتداء من الرجل الثالث ونهاية بالحب كده لحماده هلال .ففى فيلم الرجل الثالث لاحمد ذكى اتجه لطريقة الدعايه عن طريق المسابقات عندما طالب الجمهور بمعرفة اسم الرجل الثالث فى الفيلم ومن يعرفه له الاجر والثواب الى جانب جائزه خاصه من السبكى والحمد لله لم نعرف اسم الرجل الثالث حتى الان .وبعد ظهور القنوات الفضائيه واستخدامها للدعايه لجأ اليها السبكى ولكن بطريقه استفزازيه للمشاهدين وعلى سبيل المثال وليس الحصر فيلم عمرو وسلمى لتامر حسنى عندما امطرنا السبكى بالاعلان عن الفيلم فى كل القنوات الفضائيه لدرجة ان جمهور تامر نفسه بدأ يشعر بالملل من كثرة رؤيته على الشاشه ولم يكتفى بهذا بل استغل تصوير افتتاح الفيلم وعمله كليب وظهر هو وتامر حسنى ونصر محروس (من العين) وهنا تحديدا وصل المشاهد لمرحلة انه اذا فكر فى الهروب من اعلانات الفيلم من روتانا فانه بالتاكيد سيجدها فى ميلودى او مزيكا او زووم او اى قناه فضائيه اخرى حتى مع احدث افلام محمد سعد كركر تجد ان الجمله الافتتاحيه للدعاية عن الفيلم _السبكى فيلم للا نتاج السينيمائى التفزعى المناكف _ ولو كان الامر بيدى لاضفت كلمة المستفز الى الجمله ولكن يكفيه ان كل من اشترى تذكرة الفيلم وشاهده خرج من دار السينما وهو يغنى _غلطة وندمان عليها_بصراحه عندهم حق .
  لهذا لن يجد المشاهد للهروب من جحيم اعلانات السبكى الا طريقيتين الاولى سهله نسبيا وهى اطفاء جهاز التليفزيون اساسا والثانيه صعبه وتريد قلبا من حديد وهى الاكتفاء بمشاهدة التليفزيون المصرى رحمة الله عليه .
  خلاصة القول انه لابد من ان يهمس احد المقربين للسبكى فى اذنه بجملة _ارحم المشاهد للصبر حدود _ لابد ان يعرف ال السبكى ان فن الدعايه للفيلم يجب ان تتم فى المقام الاول بطريقه طريفه بسيطه لا ينقصها الذكاء فى كيفية جذب المشاهد للفيلم وليس ضروريا لكى ينجح الفيلم ان يظهر السبكى فى الفيلم وفى الميكنج وفى افتتاحه وفى الحديث عنه للقنوات الفضائيه لانه من الممكن جدا ان يصل المشاهد الى درجة الخوف من ان يرى السبكى فجأه فى شباك التذاكر ؟؟؟؟؟؟؟
  
  
  

صدمة سيتى ستارز :لو عايز تروح..اتفرج بس............
لانه تم بحمد الله وبمجهود حكومتنا الجباره استئصال الطبقه الوسطى من المجتمع المصرى واصبح المصريون قسمان الناس اللى فوق والناس اللى تحت كان لابد من تمييز الناس اللى فو ق عن البنى ادمين اللى تحت لهذا انتشرت المولات فى مصر . فليس من المعقول ان يشترى ابن الوزير هدومه من مكان زى العتبه مثلا فهو من وجهة نظره مكان بيئه بتاع الناس اللى تحت اللى هو احنا يعنى . وذات مره كنت انا وصاحبى خليل فى القاهره ,واصر على ان لا تمر زيارتنا لها مرور الكرام وطاوعته لانه حاصل على ليسانس زن والحاح فهو يريد ان يذهب لمول سيتى ستارز بمدينة نصر لكى يشترى قميص بال100جنيه اللى معاه . وصلنا المول لقينا عالم غير العالم وناس غير الناس وحتى الكلام المتداول غير اللى احنا عارفينه تحس انه كلام مستورد للناس دى بس . واشفقت على خليل عندما لمحت فى عينيه نظره ناريه من الحقد الطبقى على الناس دى وسالته مالك ساكت ليه ؟ قاللى هى الناس دى بتجيب الفلوس دى منين ؟ قلت له حرام عليك يا خليل (ان بعد الظن اثم )ميمكن الفلوس هى اللى بتيجى لهم مش هما اللى بيجيبوها . واقترحت عليه اننا نسترى القميص ونمشى بسرعه من المكان ده قبل ميحصل لنا حاجه . دخلنا محل ملابس وعجب خليل قميص دخل البروفه عشان يقيسه وهو فى البروفه سالت صاحب المحل هو القميص بكام ؟ اجاب بكل هدوء وثقه 480جنيه قلت له لا احنا عايزين واحد مش دسته . ابتسم ابتسامه ملهاش لون وقاللى ماهو الواحد ب480جنيه انت فاكر نفسك فى وكالة البلح . ذهلت وصعقت وجريت على خليل ليكون البروفه فى المكان ده بفلوس وقلت له اقلع القميص بسرعه ده ب 480جنيه سالنى خليل ليه يعنى ؟ قلت له الظاهر انه واقى من الرصاص واقلعه انت مش مستهدف . واحنا طالعين حسيت ان خليل زعلان على القميص قلت له متزعلش لو عاجبك روح ادفع ال100جنيه اللى معاك وهات الزراير

اذا كنت تبحث عن عمل اوعى تروح السيده زينب

اذا كنت تبحث عن عمل اوعى تروح السيدة زينب

بمجرد انتهائى من امتحانات الثانويه العامه فكرت فى خوض مغامرة البحث عن عمل فى القاهرة تحديدا .ونقلت الفكره لعقل وقلب اتنين من اعز اصدقائى ربيع وسعيد واكدت لهم ان مشكلة السكن محلوله على اساس اننا هنسكن مع شباب من البلد شغالين هناك .وبمجرد نزولنا للقاهره انبهرنا باضوائها ولكن زال الانبهار سريعا بعد ان وجدنا السكن المقرر لنا عباره عن اكشاك خشب فى قلب مشروع الصرف الصحى .رحب بنا اصدقاؤنا وعملوا لنا قهوه وغصب عنهم كانت قهوه ع الريحه .لمحت نظرة ندم فى عيون سعيد وربيع فاكدت لهم ان هذا هو التحدى لاثبات الذات وان 3 /4 العظماء اتبهدلوا فى الاول لما وصلوا واللى احنا فيه عباره عن كورس بهدله كاختبار لنا وعيب نرجع البلد من اول يوم هنقولهم ايه فى البلد لقينا النور مقطوع فى الوايلى رجعنا . اقتنعوا بكلامى ويا فرحه متمت حيث صدمنا اصحابنا بان فرصة العمل معهم صعبه لان ريس العمال صعيدى ومبيشغلش غير الصعايده بس يعنى عنده تفرقه عنصريه صعيديه .لم اياس وحمستهم اننا نبحث عن شغل با نفسنا وقد كان .رحنا السيده زينب على اساس انها مكان حيوى وفوجئنا بالواقع المرير كنا كمن يبحث عن ابره فى كوم من القش .ده غير الاستخفاف بينا طبعا لدرجة ان واحد قال لسعيد اطلع بره ولسه عايز اكلمه قاللى وراه وراه وانفعلت عليه جدا بس فى سرى بصراحه .وصلنا محل فراخ صاحبه فكرنى بزكى رستم فى فيلم الفتوه فى قسوة نظرة عينيه حتى انى شكيت ان الفراخ اللى عنده مش بتندبح دى بتموت من الخوف منه .المهم انه قال عايز اتنين منكوا وفى ثانيه عشت فى دور المضحى من اجل اصدقائى وتنازلت عن العمل فى بيت الرعب ده .ولم يتركونى الا بعد ان وجدت فرصة عمل فى محل فراخ جنبهم ومن النجمه تانى يوم كان كل واحد فى شغله وفى نفس اليوم كنا كلنا فى البلد.عارفين ليه ؟ لان ربيع وسعيد وجدوا ان شغلتهم هى حقن اوراك الفراخ بالمياه يعنى يستلموا الورك 100جرام يسلموه ربع كيلو وانطردوا لفشلهم فى حقن الفراخ .اما انا لقيت ان شغلى من 6صباحا الى العاشره مساء وب8جنيه والحسابه بتحسب .رجعنا واحنا زعلانين من مصر قوى ومن ناسها اكتر رجعنا واحنا خايفين من بكره
فاذا كانت هذه هى البدايه فبكره هنشوف ايه ؟وسالنى ربيع ليه كنت مصر اننا نرجع مع انك قلت ان 3/4 العظماء اتبهدلوا فى البدايه قلت يا ربيع لقد اتضح اننا من الربع اللى باقى