اخى العزيز محمد هشام واستاذى بلال فضل
مهما كتبت لن استطيع ان اصف شعورى عندما قرأت الدستور الاسبوعى ووجدت حوار مع استاذى بلال فضل يقول فيه انه يتابع باهتمام قراء اصبح يقرأ كل ما يكتبونه مثل صالح سعيد ومروه جمعه حسيت بجد انى بحلم وقفلت الجرنان وفتحته تانى لقيت الكلام موجود برضه صحيت اخويا المهندس محمد يقرا الجرنان يمكن دى تهيؤات صحى وقاللى نفس الكلام ...وقبل محد يقول على ايه ده كله يعنى ؟ اعترف اليكم بانى اتعلمت الكتابه الساخره على ايد بلال فضل منذ زمن بعيد فهو استاذى بمعنى الكلمه ولا ابالغ عندما اقول انى حفظت كثير من مقالاته الرائعه واعترف ان اسم مدونتى ادهم كانت على اسم فيلمه خارج عن القانون قبل تعديله ...عرفت على يد بلال فضل الفرق بين الكاتب الموهوب والكاتب الموهوم وكنت ومازلت متابع جيد جدا للدستور ولكنى لم اراسلها الا من العدد رقم 100
وتم نشر مقالى حسيت بقيمة ان ترى كلمتك النور وادمنت هذا الاحساس فاصبحت اكتب كل اسبوع وكنت بحلم ان بلال يقرا ولو سطر من موضوعى ..اما اخى العزيز محمد هشام عبيه اتعلمت منه ازاى تعمل عنوان جذاب لموضوع يكون خارج دائرة الملل والروتينيه وبشكره على كل كلمه قالها فى حق الشراقوه
صدقونى من ساعتها وانا خايف امسك القلم لان كلامهم الجميل مسئوليه كبيره ادعو الله ان نكون على قدرها
واحتفالا منى بهذه المناسبه الجميله ادعوكم لقراءة اول مقال تم نشره لى فى الدستور وكان فى شغل دماغك وكان السؤال هل تمتلك بطاقة تموين ؟وما هى مكوناتها
مشربش الشاى اشرب ازوزه انا
نعم امتلك بطاقة تموين وتتكون من ثمانية افراد وركز معايا فى اللى جاى لانى بجد بشكر حكومتنا الموقره وبدعيلها اللهم احفظها لنا واسكنها فسيح نارك قولوا معايا امين احنا بنصرف على البطاقه نوع شاى مالوش مثيل بجد ومش عارف جابوه منين احنا بنجيب التموين مخصوص عشانه وبنجيب جنبه شاى تانى بس نوع يتشرب ادمى يعنى بس لازم نجيب بتاع الحكومه ييجى الضيف اصرخ كباية شاى يا جماعه يشربها من هنا وتنتهى العلاقه من هنا وابقى حريص انى مشربش معاه العمر مش بعزقه ومش احكيلك على الزيت زيت مين ده سولار حاجه غريبه كده فيها شبه من الزيت عشان منظلمش الحكومه اما السكر فحدث ولا حرج مهما تحط فى الكبايه هى هى برضه كانك بتحط فى سرك مش فى الكبايه عارف انا نفسى فى ايه نفسى اعزم حكومتنا الشقيه دى على كبايتين شاى من الشاى بتاعهم حتى يرتاح الشعب المصرى بس خايف يطلع حد فيهم لئيم شويه ويقولهالى
مشربش الشاى اشرب ازوزه انا
مشربش الشاى اشرب ازوزه انا
42 comments:
كويس
الحمد لله
انا كنت هنطس فى نظرى واعزم نفسى على كوبايه شاى عندكم
الحمد لله انى فهمت الفوله
هههههههههه مبروك اسمك انت ومروة من الناس الحلوه انا متابعها
المهم يا سيدى والله فعلا هى حاجات صعبه طيب كمل وقول المكرونه اللى بقدرة قادرة تتحول لطبق مهلبيه ولا الارز اللى بيتحول لصمغ
بس تصدق بالله فى ناس عايشه عليه وده اللى تعبنى جدا حالهم صعب بجد
يالا انا بحب شاى دلما اجيب لك معايا واعزمك ولا تزعل هههههههههههههه
و الله بجد يا بختك انت و مروة ان الاستاذ بلال فعلا كاتب مميز و على راس كتاب عصرنا الحالى
طبعا انا حاسة بيك دى شهادة كبيرة جدا عنك من كاتب موهوب بحق زيه
دعائى بالنجاح الباهر
صالح سعيد يا أدهم شرقاوى
أنا سعيدة جدا عشانك يا صالح
لعدة اسباب
ان بلال فضل فعلا من الشخصيات اللى بحبها جدا جدا و أحترم صراحتها و شجعاتها
لكن ليا عليه تحفظ بسيط أن أعماله السينمائية أقل من كتاباته و مقالاته
بس موش مشكلة قووى أديه بيتطور من تجربة لأخرى و ينضج بالفعل
ثانيا أنا طلعت أعرفك بقى من زمان لأنى من قراء الدستور الجديدة من أول عدد اسبوعى ظهر ....
و دايما كان يعجبنى الاسلوب الشبابى الحيوي اللى بتتميز بيه أغلب مقالاتها
طلعت سيادتك من هولاء الشباب الجميل
ربنا يوفقك و يزيدك كمان
و معلشى انا مليش فى الشاى و لو فييه نسكافيه ماشى
كدا يا عم صالح خليت الناس تاخد فكرة وحشة عن الشراقوة
انت بتشرب الضيوف شاى تموين انا مش بشربهم مية حتى اصلى بخاف يطلعوا يقولوا مية بكابروتات
يا جماعه الشراقوة اهل كرم محدش يتعزم عند شرقاوى خالص
الف مبروك وبجد انت تستحق
لان كتاباتك خرافة ودمها خفيف جدا
اما بالنسبة لشاى التموين المغناطيسى بقى
والسكر
اللى ذلنا بيه ده
ياريت لو تعزمهم
وحد طلب منك ازوزة
قلهم احنا عاملين مقاطعة
وبنشجع المنتج المصرى
تحياتى ليك
أولا مبروك
فعلا إنت تستحق
أما مقاله
ماشربش الشاي
جامده أوى
الأخ عبده الرايق كان بيجهز علشان يعزم الحكومه وكان هيجيب شاي وكده
ياريت تبعت له ورقتين ولا تلاته شاي تموين
وأهي تبقى عمليه نضيفه ميه في الميه
دمت بكل خير
وربنا يوفقك
والله يا ستاذ صالح انا فرحتلك جدا انت ومروة جمعة
وقرأت الدستور وشوفت رأى استاذ بلال فضل فيكم
وكمان مقالة محمد هشان عنكم وعن الشراقوة
بجد رفعتوا راس الشرقية
مستنين كتبكم ان شاء الله انت ومروة
السلام عليكم
ما شاء الله عليك البوست حلو
ما اشربش الشاي ....
كلوا معزوم ولا ايه ؟
تحياتي ليك
عند حق واللهى ياصالح انا كمان لما لاقيت محمد هشام كاتب اسمى وبيقول صاحبة المواجهات الشرسة
حسييت انة بيتكلم عن حد تانى وكل شوية اقراها
فعلا احساس جميل اوى انك تلاقى حد حاسس بيك وعامل ليك اعتبار جميل اوى كدة
وفعلا محمد هشام انسان جميل اوى انة يفتكر الناس كلها بالشكل الجميل دة فعلاً
ويابختك ياعم بلال فضل كمان بيتكلم عنك
وشكرا ياعم ع زيارتك المتاخرةواوعى تعملها تانى
انك تتاخر يعنى
وعلى فكرة دى اقل حاجة عندنا....
ومتنساش بقى تكتر لهم السكر
فى البداية احب اهنيك على مقالك الجميل وكويس انك طرحت المشكلة ديه لانى بصراحة اول مرة كنت اشوف سكر اسود ومش بيحلى
وانا بشكرك لزيارتك مدونتى
تحياتى
احساس جميل قوى انك تلاقى حد كبير وبتحبه بيتابع اعمالك وبيشكر فيها
بجد اتمنالك كل التوفيق والنجاح
واحناكمان ان شاء الله هنتابع اعمالك
وابقى اشرب شاى فتلة وريح نفسك
تحياتى
شيماء
مقدرش اقول غير انك تستحق فعلا ان اعظم الكتاب يقرأوا لك ويشيدوا بكتاباتك ماشاء الله عليك
مدونتك من المدونات اللي بحب اتابعها
ربنا يوفقك
ارق تحيه لشخصك الكريم
صالح
بص بأه إنت تجيب خرزه زرقه
وتعلقها فى المدونه علشان الحسد
إسمع كلامى
ويارب عقبال ما نشوفك
على قناه الجزيره
مش مكان محمد حسنين هيكل
خيالك ميروحش لبعيد
إحنا بس نشوف إسمك ومكتوب جانبه
تضامن مع صالح سعيد
سلام ياصالح
صاللللللللللح انت تستاهل كل خير
انتو رافيعن راس الشرقاويه دائما وابدا
ونعم الشباب الشرقاوى
انا قريت كلام الرائع بلال والفكاهى محمد هشام
واتبسطت جدا وافتخرت واتعنطزت انى شرقاويه
حيث سقط صالح ومروه جمعه
سقطت انا كمان
يارب دايما كده تكونوا خير سفير
وبطائة التموين
فلا تعليئ
ربنا يسعدك على طول
ويسمعنا عنك كل خير
طب ياريت يقولك ما اشربش شاى اشرب ازوزه
ساعتها ممكن نطلب 3لتر كولا على كل بطاقه تموين
تحياتى
مبروك نشر موضوعك فى الدستور وعقبال ما تبقى من محرريها الدائمين ,قول آمين
الآن تعرفت أكثر على استاذك بلال فضل واعتقد انه صاحب فضل طالما يشجع المواهب وربنا يكتر من أمثاله
تحياتى وتقديرى أخى الكريم
ليه حق ينشرلك
الي الامام
و انا و الدستور و هواك
صباح الفل ياصالح باشا
صباح الفل علي الشراقوه
اللي منورين الدنيا بـحالها
ألف ألف مبروك يامعالي الباشا
والله لو كنت معاك دلوقتي كنت
فرقت شربات
بس فعلا انتوا تستحقوا أكتر من كده
ومفيش داعي اعيد الكلام اللي قاله الاستاذ محمد هشام
والكلام اللي قاله الاستاذ بلال فضل
مدونتك زي العسل
مدونه مروه مفيش أحسن من كده
بس عمرو فين بقي
محدش بيشوفه خالص
ياريت تباغه سلامي
الي الأمام يامان
معتدل مارش
مستنيينك
اوعي تروح بعيد
سلامي اليكم جميعا
وليك خصوصا
وابقي سمعنا صوتك بقي
أحمد ســلامه
فرنسا هانم
لا متخافيش يا خالتى
الشاى اللى بالى بالك ده بس للى بالى بالك برضه
انتى تشرفينا طبعا
تحياتى
appy
الله يبارك فيكى
وشكرا على اهتمامك ورايك
اما بخصوص الرز اللى بيتحول لصمغ فدى مبادره من الحكومه لنشر التلاحم بين فئات الشعب
الناس تلذق فى بعضها
ومنتظرك انتى وشاى دلما ابو فتله جنان
تحياتى
عاليا حليم
بشكرك على رايك وصدقينى بلال فضل حاله خاصه جدا فى حياتى بدون مبالغه
من خلاله حبيت انى اكتب واعبر عن رايى
ومن خلاله برضه قررت اقتحام عالم السيناريو
وهو استاذى بكل ما تحمله الكلمه من معانى
تحياتى
فاتيما
اولا ربنا يكرمك على رايك
ثانيا ليس دفاعا منى عن اعمال بلال فضل السنيمائيه لكن الراجل فى كل فيلم من افلامه بيبقى عايز يوصل حاجه ومثال بسيط على كده انه فى فيلم خالتى فرنسا النقاد قطعوا فروة الفيلم على اساس انه فيلم خارج عن الاعراف والتقاليد
بعد كده اتضح ومن خلال الواقع ان ما يحدث فى الفيلم يتطابق مع احداث الواقع
اما بخصوص الدستور الاسبوعى فو بمثابة الوجبة الدسمه بعيدا عن تيك اواى الصحف الحكوميه
نورتينى وتقبلى تحياتى
Desert cat
حاشا وماشا طبعا
الناس فى الكره الارضيه المصريه كلها عارفه اننا عزمنا القطر
مع ان فى بعض الظرفاء بيتريئوا على حاجه زى كده
وبيبقى ردى انها تهمه لا انكرها وشرف لا ادعيه
ده انا بشك ان حاتم الطائى اصوله شرقاويه
مش كده ولا ايه يا قطه
تحياتى
مدحت محمد
ربنا يكرمك يا اخ مدحت ويا رب اكون دايما عند حسن ظنك
اما بخصوص تشجيع الصناعه المحليه انا معاك بس يبقى المنتج موجود اساسا
لاننا فى زمن صعب وربك يسترها
تحياتى
Salwa
ربنا يكرمك يا سلوى
وانا هعمل بكلامك واروح مخصوص للجميل عبده الرايق بورقتين شاى من اللى هو
واوصيه ميشربش
وانتى كمان وصيه
انا عارفه مدمن شاى
بس بلاش النوع ده
تحياتى
بذرة امل
ازيك يا بلدياتى
شكرا على اهتمامك ورايك
وبجد مروه جمعه موهبه مصريه خالصه وتستاهل كل خير
ودعواتك ان الواحد يبقاله كتاب فى يوم من الايام
ان شالله يبقى كتاب وزن
فاكراه
تحياتى
زوزو
ازيك يا زوزو
طبعا كله معزوم
علشان نخلص مره واحده
ولا انتى ايه رايك
شايف فى تعليقك كلام ما بين السطور يازوزو
اوعى تكونى هتبلغى عنى
تحياتى
دعاء مواجهات
انا اسف طبعا يا دؤدؤ على زيارتى المتاخره لكن والله العظيم غصب عنى
وده لانى كنت مشغول بمسلسل راجل وست ستات
وكابتن عالم سمسم افندى اللى مش بالعه
واتفق مع فى فرحتك بكلام محمد هشام عنك
لانها بتعوض تعب مراسله لجريدتنا المفضله
وانتى تستاهلى يا دؤدؤ
تحياتى
ولا اقوللك اشطاط
موناليزا
والنبى انتى اللى سكر
بس مش سكر تموين
سكر مستورد
تحياتى
سمسمه
زيارتى لمدونتك كانت الاولى ولن تكون الاخيره
لانه يسعدنى ويشرفنى التواصل الجميل بينا كمدونين
تقبلى تحياتى
شقاوة شعب
فعلا يا شيماء ده احساس جميل صعب انه يتوصف ويا رب اكون عند حسن ظنكم جميعا
اما بخصوص الشاى ابو فتله
فاحنا وصلنا لمرحلة اننا مش لاقيين الفتله اساسا
ربنا يسترها
تحياتى
The Queen
ربنا يكرمك يا ملكه
ولا اقوللك هناديكى باللقب اللى اطلقته عليكى وهو منقذة الرومانسيه
وبتمنى انى ابقى دايما عند حسن ظنكم
ارق تحيه
منون
ازيك يا جميل
ايه يا منون التفاؤل ده كله بشان مستقبلى الزعبلاوى
ربنا يطمنك يا منون
وانا اللى كنت مقلق شويه
وكنت فاكر انى هطلع من المولد بلا حمص
فاكره الحمص يا منون
هههههههه
فاهمانى طبعا
تحياتى يا جميل
اجدع بنوته
بلدياتى العزيزه
طبعا احنا كلنا مصريين وعرب كمان
بس الشرقاوى بيكون له طعم خاص طبعا
بيبقى تعليق بطعم الكاتشب
وكنت محتاج اعرف تعليئك _زى منتى كاتباها على البوست
هههههههههههه
طبعا عارف انها غلطه املائيه كى بورديه
وبهزر معاكى
تحياتى وتقديرى
منى
انتى فهمتى غلط لانه مش احنا اللى هنشرب ازوزه
اللى هيشرؤبها المكار اللى هيعرف السر بالحاسه الحكوميه السابعه
لكن احنا غلابه يا ولداه
لو جابولنا زلط هناخده
طب مهو الرز بتاعهم مليان زلط فعلا
واللى بينقى الرز بيسيب الزلط وينقى الرز نفسه لانه اكتر
تحياتى
مجداويه
فعلا بلال فضل صاحب فضل كبير جدا عليا لانه علمنى من خلال كتاباته ازاى اعبر عن اللى بشوفه
وبلال صاحب مدرسه خاصه بجد
وده مش كلامى لوحدى
لانه كده فعلا
ربنا يزيده لانه يستاهل كل خير فعلا
وشكرا على اهتمامك ورايك
تحياتى
Noha El-arabi
ربنا يكرمك
ومتشكر جدا على رايك واهتمامك
ويسعدنى التواصل الجميل بينا كمدونين
نمثل نبض المجتمع
ده لو كان لسه عايش وفيه نبض يعنى
تحياتى
العزيز احمد سلامه
ازيك يا احمد
عامل ايه
يا رب تكون بخير
وانا اسف على تقصيرى لكن صدقنى والله غصب عنى
وباذن الله نتكلم ونتقابل قريب كمان
وانا وعمرو الطاروطى بنكتب مع بعض فى راجل وست ستات
وكمان علم سمسم افندى
بس هو لسه معملش مدونه
وصدقنى يا احمد انت من الناس اللى بحب اقرالهم وزى مقال عنك محمد هشام عن شجاعتك فى كتابتك
وباذن الله ربنا يكرمك
تحياتى
فعلا
الازوزاه مش عليها اختلاف
والحكومة لسة متدخلتش فيها
ياخي متستقلش بنفسك انت تستاهل كل خير والله
وانا بردة كنت محتارة في اسم مدونتك
واديني عرفت
ويارب يوفقك دايما والي الامام وفي نجاح مستمر ان شاء الله
My Hope$
ربنا يكرمك
ويسعدنى التواصل الجميل بينا كمدونين
اما بخصوص الازوزه فعليها اختلاف طبعا
لانها الوسيله التى سيهرب من خلالها المسئولين من شرب الشاى بتاعهم اللى الشعب اتهرى منه
تحياتى وتقديرى
Post a Comment