Thursday, February 7, 2008

اذا كنت تبحث عن عمل اوعى تروح السيده زينب

اذا كنت تبحث عن عمل اوعى تروح السيدة زينب







بمجرد انتهائى من امتحانات الثانويه العامه فكرت فى خوض مغامرة البحث عن عمل فى القاهرة تحديدا .ونقلت الفكره لعقل وقلب اتنين من اعز اصدقائى ربيع وسعيد واكدت لهم ان مشكلة السكن محلوله على اساس اننا هنسكن مع شباب من البلد شغالين هناك .وبمجرد نزولنا للقاهره انبهرنا باضوائها ولكن زال الانبهار سريعا بعد ان وجدنا السكن المقرر لنا عباره عن اكشاك خشب فى قلب مشروع الصرف الصحى .رحب بنا اصدقاؤنا وعملوا لنا قهوه وغصب عنهم كانت قهوه ع الريحه .لمحت نظرة ندم فى عيون سعيد وربيع فاكدت لهم ان هذا هو التحدى لاثبات الذات وان 3 /4 العظماء اتبهدلوا فى الاول لما وصلوا واللى احنا فيه عباره عن كورس بهدله كاختبار لنا وعيب نرجع البلد من اول يوم هنقولهم ايه فى البلد لقينا النور مقطوع فى الوايلى رجعنا . اقتنعوا بكلامى ويا فرحه متمت حيث صدمنا اصحابنا بان فرصة العمل معهم صعبه لان ريس العمال صعيدى ومبيشغلش غير الصعايده بس يعنى عنده تفرقه عنصريه صعيديه .لم اياس وحمستهم اننا نبحث عن شغل با نفسنا وقد كان .رحنا السيده زينب على اساس انها مكان حيوى وفوجئنا بالواقع المرير كنا كمن يبحث عن ابره فى كوم من القش .ده غير الاستخفاف بينا طبعا لدرجة ان واحد قال لسعيد اطلع بره ولسه عايز اكلمه قاللى وراه وراه وانفعلت عليه جدا بس فى سرى بصراحه .وصلنا محل فراخ صاحبه فكرنى بزكى رستم فى فيلم الفتوه فى قسوة نظرة عينيه حتى انى شكيت ان الفراخ اللى عنده مش بتندبح دى بتموت من الخوف منه .المهم انه قال عايز اتنين منكوا وفى ثانيه عشت فى دور المضحى من اجل اصدقائى وتنازلت عن العمل فى بيت الرعب ده .ولم يتركونى الا بعد ان وجدت فرصة عمل فى محل فراخ جنبهم ومن النجمه تانى يوم كان كل واحد فى شغله وفى نفس اليوم كنا كلنا فى البلد.عارفين ليه ؟ لان ربيع وسعيد وجدوا ان شغلتهم هى حقن اوراك الفراخ بالمياه يعنى يستلموا الورك 100جرام يسلموه ربع كيلو وانطردوا لفشلهم فى حقن الفراخ .اما انا لقيت ان شغلى من 6صباحا الى العاشره مساء وب8جنيه والحسابه بتحسب .رجعنا واحنا زعلانين من مصر قوى ومن ناسها اكتر رجعنا واحنا خايفين من بكره
فاذا كانت هذه هى البدايه فبكره هنشوف ايه ؟وسالنى ربيع ليه كنت مصر اننا نرجع مع انك قلت ان 3/4 العظماء اتبهدلوا فى البدايه قلت يا ربيع لقد اتضح اننا من الربع اللى باقى

39 comments:

Unknown said...

صالح
فكرتنى بكلمة صديق ليا
بساله شايف نفسك فين كمان 5 سنين
جاوبنى باسم 4 دول اروبيه
قلتله وليه مش فى مصر
قالى مصر قاسية اوى على ولادها
قلتله
ولادها هما اللى قاسيين على بعض وعليها
رغم انى حاسه بكلمته وبكلامك
الا انى بكدب نفسى وبقول العيب فينا
احنا اللى عوزين نهرب وبندور على حالنا
اوعدك نى مش هروح السيدة زينب الا انى نفسى ازورها
لكن موعدكش انى اروح مكان اقل منها
بشرط
انى ابقى حاجه
تحياتى ليك يا عم صالح

فزلوكة said...

أستاذنا
هو كلامك منطقى ورجوعك كان منطقى برضوه
بس هو مفيش أمل ....؟؟

إللى عاجبنى بجد إن حضرتك خضت التجربة من البداية وحاولت تعتمد على نفسك ..وللأسف نتيجة الإحباطات الشديدة الولاد دلوقتى حتى إللى متحلهم ظروف النجاح بقوا بيكسلوا
مستنين بابى يجيب العربية والموبايل والعروسة وآآآآآخر حاجة الشغل
تحياتى ليك يافندم, وعلى فكرة أنا نفسى جدا أزور السيدة زينب ...مجرد زيارة

rainbow said...

صباحك سكر يا صالح

اخيرا عاد النت المشاغب لن تتخيل مدى افتقادى لكم جميعا ولكلماتكم وتواصلكم .. اعترف من مقعدى هذا بكل كسوف انى كنت فعلا ظالمة النت وانه اصبح من ضروريات الحياة عندى .. ما علينا

طبعا بما انى قرأت لجنابك مغامرة السفر الغير مشروع الفاشلة اجد ان مغامرة القاهرة المقهورة لا تتعدى مجرد بدايات اعصار الحياة معك .. البدايات صعبة عزيزى مثل اى سيارة تصعد كوبرى يكاد يكون منحدره عمودى .. ثم بعد ذلك بأمر الله واصرارنا نستطيع المواصلة شيئا فشيئا

المشكلة ليست فى الكوبرى ولا السيارة ولا الاصرار كل ده مقدور عليه ! المشكلة فى اللى بنشوفهم واخدينها قزح وفى ايد كل واحد منهم كوساية او اكثر ! المشكلة فى عدم وجود عدالة لعدم وجود قانون الا رسميا كلاميا بينما الواقع : القانون لايطبق على كل الناس .. بفنوسى يا كناب ! انت مش عارف انت بتكلم مين ؟! هى دى التلت اسباب اللى ... ويمكن يكونوا عشر اسباب

طولت عليك وباينلى بخرف لكن موضوع العمل والبحث عن ه دا مؤلم جدا فى الاجواء اللى اتولدنا فيها دى

ربنا معاك ويوفقك دايما يا صالح

عميق تحياتى وخالص مودتى

هدى

قليل من التفكير said...


كويس أنك رجعت

لانك أساسا بالنظام ده عمرك مهتكون من العظماء ولو بعد مليون سنة

Anonymous said...

صالح باشا

حمدالله علي السلامه
عجبني اوي البوست ولما عملت فيها شهم واتنازلت لاصحابك عن الشغل علشان صاحب المحل الا مش بيدبح الفراخ اكيد بيخضهم

سلامي ليك ياعسل

Anonymous said...

صااااااالوحة

ليك وحشه يا راجل

وانا ااقول الراجل راح فين راح فين !!اتاريك رحت تدور على شغلانه في السيدة زينب
-*-*-*-
على راي لماضة مصر فيها خير كتير بس ولادها اللي ظالمينها وظالمين نفسهم

المهم ما قلتليش اخبار الفراخ ايه ؟؟

كنت شغال ايه بالحق في محل دجاج ؟؟ وكان دجاج محمر ولا دجاج بريشه ؟؟

تحياتي لشخصك الكريم

موءة

دنيتى الجميله said...

هايل جدا
يبدو اننا من الربع اللى باقى
هههههههه
والله ضحكتنى بعد ما كنت صعبت عليا
بس بصراحه كانت فكره جريئه وهايله
انا ولاد خالتى بيعملوا كده فى الصيف بس فى داخل بلدهم مش بيسفروا
وبيعجبنى جدا تصرفهم وحتى انشغالهم فى حاجات مش بتساوى وتليق لتعليمهم
بس التجارب وانغماسنا فى الحياه اكيد هيدينا فرصه اكبر لتجاوز صعوبات الحياه
عارف ابن خالتى دلوقتى ايه
دكتوووووووووووووووووور

صالح سعيد said...

لماضة
صدقينى مفيش حد عايز يسيب مصر بمزاجه
مفيش حد هوايته الغربه
لان الغربه ليها تمن وغالى كمان
نورتينى
__________________________________
فزلوكه
لا طبعا فى امل ولو بطلنا نحلم نموت
ويمكن علشان وقتها كنت صغير مقدرتش انى اقاوم الظروف الغريبه اللى حصلت
لكن الامل موجود
تقبلى تحياتى
______________________________
الاستاذه هدى عبد القادر
مساء الفل والورد والياسمين ومرحبا بعودة النت مره ثانيه لانه بقى مهم جدا وانا معاكى فى موضوع الاصرار
ارادة الانسان ممكن تعمل المستحيل
ارق تحية
_____________________________
قليل من التفكير
انا بنى ادم بسيط ولم اتطلع ان اكون من العظماء ولا حاجه
معنى كلامى تقريبا واضح
شكرا لرايك واهتمامك
________________________________
انين الحزن
هى بصراحه مكنتش شهامه على اد مهى خوف من منظر صاحب المحل المرعب
شكرا لتشريفك ليا
____________________________
العنقاء
وانتوا والله كلكم وحشتونى والحمد لله النت رجع وانا فعلا اشتغلت يوم الا ربع فى محل فراخ بس ده كان زمان اوى يعنى
دلوقتى العلاقه بينى وبين الفرخه انى باكلها بس
شكرا لاهتمامك
ارق تحية

Unknown said...

جميل جدا جدا
مدونه في منتهى الظرف
بجد رائعه
..........
بس الكلام ده حقيقه؟؟؟!!!!

Desert cat said...

تعرف اللى اهم من انك روحت ورجعت ايه انك فكرت تبقى نفسك ... اصل اللى بشوفه دلوقتى بيخلينى افقد الامل فى بكره ... شباب نخلص جامعة مش ثانوية وقاعد رجل على رجل ويقولك هدور على شغل فين يعنى ... طب ياعم ربنا قال اسعى وانا اسعى معاك ... مش كدا يعنى ... والاجمل انك خضت التجربة مش مهم انت عملت ايه او رجعت ازاى المهم انت اتعلمت ايه ...

Empress appy said...

ربنا يكون فى عونك انت اول ما تتصدم تتصدم بالسيده زين او حى السيده زينب تحديا يا عمنا انا بخاف اعدى من جنبه اصلا
بس ربنا يوفقك الا قولى هو الكلام ده كان امتى

مدحت محمد said...

صالح هو ده عدم توفيق واكيد ربنا مكتبلكش الخير فى السيدة
متبطلش تدور على شغل
اينعم فى كوسة وكل حاجة
بس برضه فى سعى وفى توفيق
من عند ربنا
للانسان المجتهد
والله عز وجل قال
وان ليس للانسان الا ماسعى
صدق الله العظيم
تحياتى

مروة الزارع said...

امال لو رحت الامام الشافعى هتعمل اية
هههههههههههههههههههه

بجد مدونتك تحفة

اكتشاف يابنى

اكبر تحية فى الدنيا ليك

only spot said...

شوف الدنيا قانونها التباته والغلاسه والبرود عشان تقدر تكون حاجه لازم تكون هادى وبارد ازاى متسالنيش لانى مش كده
بجد والله اوعى تياس بل بالعكس حاول تاخد خطوات ولو كانت بسيطه لكن تبقى البدايه ومتنساش اول الغيث دائما قطره فاحرص عليها
تحياتى ليك

Anonymous said...

فقط يكفيك شرف خوض التجربه
ان تبحث عن عمل فى المدينه المنهكه العجوز وانت فى هذه السن المبكره

يكفيك خوض التجربه بغض النظر عن نتيجتها

حتى لا يأتى وقتا تتساءل فيه ماذا لو ...؟

انت خضت التجربه
ويكفيك شرف التجربه

فرنسا هانم said...

من 100 جرام لربع كيلو
اللهم ارحم
الجشع فى كل مكان وكل مهنه
خليك احسن بعيد عن التلات اربع اللى اتبهدلوا

Anonymous said...

انا جيت من كام يوم وبعد مكتبت التعليق متنشرش
النت عملها معايا
:))

نيجى بقى للبوست

عاجبنى جدا اصرارك انك كنت عايز تعمل حاجه

انا كمان بحس انى من الربع الى فاضل

بس برجع افكر انه اكيد ربنا شايلى حاجه احسن
او بكرة انشاءالله هيبقى انجح

طبعا مش دايما بس كفايه ان الامل موجود
:))))))

وسلامى ليك وللسيده زينب
ومتخافش مش هبقى اروح
:))))))))))))))
سلامى

صالح سعيد said...

دنيتى الجميله
مبروووووووووك لابن خالتك والكفاح مطلوب طبعا بصراحه فكرتينى بكتاب كفاح شعب مصر
نورتينى بزيارتك
________________________________
انا انسان
ربنا يخليك ويكرمك وفعلا الكلام ده حصل معايا من حوالى 12سنه كده
ارق تحية
______________________________
قطة الصحراء
صدقينى لو قلتلك ان المشوار ده مكنش دافعه مادى كان محاوله لاثبات الذات وان الواحد يعرف اللى بيدور حواليه
مهما كانت النتائج
ولا ياس مع الحياة
تقبلى تحياتى
_______________________________
appy
الكلام ده من 12سنه بالتمام والكمال
واحنا قلنا نبدا بالصعب الاول عشان مننخضش بعد كده
ولا ايه رايك
شكرا لرايك واهتمامك
__________________________________
دوحه
الكلام ده من زمان وانا حاليا شغال ومن زمان برضه
ومش فى مجال الفراخ خالص
كفايه عليها الانفلونزا
نورتينى برايك وزيارتك
_____________________________
مروه الزارع
لو قصدك على سوق الامام او سوق الجمعه
انا رحته بس كنت رايح اشترى وهو فعلا مخيف بس على مين انا استاذ جرى
شكرا لرايك واهتمامك
ارق تحية
________________________________
only spot
صدقينى بدون غرور منى والله
انا معرفش يعنى ايه كلمة ياس
مؤمن جدا بالمحاوله والاصرار
ولو بطلنا نحلم نموت
ارق تحية
___________________________________
شيرين
بصراحه التجربة رغم قسوتها الا انها علمتنى الكثير الى جانب انها كانت احلى ايام حياتى
تقبلى تحياتى
_____________________________

فرنسا هانم
ال100جرام دول كانوا زمان امال دلوقتى بقى
ربنا يستر
نورتينى يا احلى فرنسا
__________________________________
شيماء
طبعا احنا لازم يبقى عندنا اصرار على تحقيق احلامنا واهدافنا مهما كانت بسيطه ولما تيجى بتعب بتبقى احلى بكتير
ارق تحية

رحــــيـل said...

صالح
المحاولة فى حد ذاته والتجربة متعة حتى لو كنت موصلتش للنتيجة المرجوه

المهم يكون عندك دايما روح المغامره واكيد فى مره هتيجى معاك زى مانت عايز

انا شخصيا بحترم النوعيه دى من الناس اللى بيكون عندها هدف تسعى ليه وتحاول مره واتنين وعشره
مش قاعدين فى مكانا مستنين الفرج يجيلنا لحد عندنا

مش مهم النتيجه المهم انك خضت التجربة
تحياتى ليك

ياسر مدني ...دينامو الإخوان said...

بعد طووووووووووووول غياب
الحمد لله عودة للتدوين عبر دينامو الإخوان

أتمني التواصل بلا إنقطاع

walaa said...

صالح
يبقى انت اكييد فى مصر منتظر ايه بعد الفساد اللى حصل فى البلد
ولسه ياما هنشوف لو سكتنا على الوضع ده الشباب هيعمل ايه مش لاقى حتى قوت يومه علشان كده الشباب بتهرب من الجحيم اللى هيه عايشه فيه لدول اخرى بس برده بتلافى حدفها فى البحر ميكنش الشباب المصرى منحوس
تحياتى ولاء

Noha El-arabi said...

احترم جدا اليوتوبيين المؤمنين بأن المحاولة شرف لا يضاهيه حتي النجاح
اوعي تيأس ابدا
تحياتي
و برده لسة احنا من الجزء العبقري

تــــ(حـنة)ــــر said...

بعد السلام
والله عندك حق
وبيقول اننا اللى اخترنا الحيوة و اليأس طريق
عجيبه والله

تعرف انا كمان كاتبه بوست عن نفس الحدوته .. يظهر انو كاس وداير على الكل

تحياتى

صالح سعيد said...

ra7eel
اكبر درس اتعلمته من التجربه دى هو ان الواحد لاوزم يحاول مهما كانت الظروف ومهما كانت صعبه هييجى يوم نتغلب عليها
نورتينى
___
_________________________
ياسر مدنى
هابى فلانتين داى يا اخ ياسر
_______________________________
walaa
يا ولاء الظروف دى كانت من اكتر من 10سنين فما بالك بدلوقتى
ربنا يستر
وخلينا متفائلين احسن
ارق تحية
_________________________
Noha El-arabi
بغض النظر عن العبقريه التى لا امتلكها اساسا وانما قلت ذلك كمحاوله لتثبيت اصدقائى انما المشكله تكمن فى اننا عايزين ولو بديل واحد يغنينا عن اننا نروح لمحاولات الهروب من البلد
واللى ممكن تبقى فيها نهايتنا

تقبلى تحياتى
______________________________

Tamr7na
فعلا ده كاس وداير على الكل فى ظل الظروف اللى احنا عايشينها
بجد هى دى قضية الساعه وكل ساعه
شكرا لاهتمامك ورايك
ارق تحية

Marwa Friday said...

جميلة يا صالح
آه.. إزيك صحيح؟
كنت قرأتها في الدستور
فينك؟.. فين جديدك؟
نحن في الانتظار

bob said...

كلامك ضحكنى جدا
من قسوه الواقع بجد الواحد بيضحك
اللى عايز يشوف حياته ويجاهد وبيتعب
يهدموه ويتعبوه ويكسروا ف ماديفه
واللى فاضى وتافهه ولا ع باله الشغل
يوفره ابوه العربيه والبرستيج اللى طول النهار والليل ف الشارع
حاجه تضكك ومن كتر الضحك تبكى ع الحال
اشكرك ع مواضيعك
واهنى دماغك ع تحملك للمسئوليه وخلى عند الامل اوعه حد يخطفه من بين اديك
يلا سلام

رئيس جمهوريه نفسى said...

يا سلام يا عم العظيم حلو قوى بجد استتعت انا وبقراها فعلا

Anonymous said...

السلام عليكم
حمدلله علي سلامتك ومش كنت تقولي انك في السيدة كنا استقبلناك احسن من كده.
المهم انك سليم والحمد لله وربنا مع الفراخ

ghalia said...

ازيك يا صالح
معلش بقى كانت مشاكل فى النت
تجربة مفيدة وتستحق الإحترام
كفاية أوي انك حاولت تعمل حاجة
معلش يمكن ما اتوفقتش المرة دي
بس ان شاء الله المرة الجاية ربنا يوفقك
مفيش حاجة بالسهل أكيد والموضوع محتاج اصرار
بوست جميل جدا وطريقة صياغته رائعة
ألف تحية لك :)

صالح سعيد said...

مروه جمعه
ازيك يا ميرو ؟عامله ايه ؟يا رب تكونى بخير وانا موجود بس الفتره اللى فاتت كنت مشغول بموضوع المسلسل وربنا يسهل
تقبلى شكرى وتحياتى
______________________________
دكتوره ليلى صادق
باذن الله المره الجايه هبقى اعرفك يا دكتوره بس الكلام ده من زمان اوى يا جماعه لو مش مصدقنى اسالوا الفراخ
شكرا لاهتمامك ولرايك
_________________________________
رئيس جمهورية نفسه
اتمنى اكون عند سن حظن حضرتك قصدى حسن ظن حضرتك
ارق تحية
__________________________________
ghalia
ازيك يا غاليه ؟موضوع النت ده كان على الكل والحمد لله انه خلص واهلا بعودتك يا صاحبة الاسم الجميل
ارق تحية

صالح سعيد said...

bob
صباح الفل
طبعا الواحد لازم يفضفض ويحكى
لان الكتمان يولد الانفجار
وانا شايف اننا نضحك على همومنا قبل متحتوينا وتخلص علينا الشر بره وبعيد
شكرا لرايك واهتمامك
ارق تحية

كاميليا بهاء الدين said...

الله عليك

جميل اوى خالص

ياريت تكمل الموضوع ده

انا هاجى تانى علشان اشوف الباقى

تحياتى لجمال قلمك

كاميليا

بذرة امل said...

ما شاء الله
قليل جدا لما تلاقى شباب بيفكروا كدة
فى الوقت ده
اسلوبك جميل يا صالح سعيد جدا

صالح سعيد said...

كاميليا
اوعدك انى ابقى اكمل باقى هذا الموضوع فى وقت لاحق باذن الله
وشكرا على رايك
تقبلى تحياتى
________________________________
بذرة امل
ربنا يكرمك ويا رب اكون عند حسن ظنكم جميعا
وسعيد جدا بهذا التواصل الجميل بينا كمدونين
ارق تحية

dina said...

لا حول ولا قوة الا بالله
اطمنت كدا عالمشتقبل

صالح سعيد said...

دينا
قدر الله وما شاء فعل
اوعى تزعلى نفسك
لسه الامل موجود
ارق تحية

الآء said...

فعلا زي ما قلت
بس اللي انا عاوزه اضيفه ان مصر دلوقتي بقت طبقه غنية وطبقة فقيرة وطبقة معدمه تحت مستوي الفقر
(العشوائيات وطفال الشوارع و....
بجد حال البلد بقا صعب قوي

علي العموم مدونه ظريفة
واسلوب جميل

تحياتي لك

صالح سعيد said...

الاء
اولا شكرا لاهتمامك ورايك بجد
ثانيا انا شايف ان الطبقه الفقيره والطبقه المعدمه اندمجوا فى بعض واصبحوا طبقة الفقر العدم
اما طبقة الهاى لايف ستارز
دول بقى منعرفش عنهم حاجه
وربنا يستر علينا
تقبلى تحياتى

Anonymous said...

انا عارفه انى اتاخرت فى التعليق..ولكن احب اوضح حاجه هامه جدا..ان احنا (الغلابه يعنى )احسن بكتير من اللى بيروحوا المولات دى لانهم مش بيشقوا ويتعبوا علشان يجيبوا القرش ولان زى ما انت قولت ممكن الفلوس هيه اللى بتجيلهم.. بجد يا جماعه انا عن نفسى بموت فى العتبه والاماكن اللى زيها.. يا سلام كل خطوه بخناقه..حاجه جميله..هيه تحلى غير بالتعب ؟.. ارجو ان اسمع ردك يا صالح.. اكيد بتقول فى سرك..سمعتى الرعد فى ودانك يا بعيده .. وتقبل احترامى واقبلنى صديقه للمدونه العسوله دى ..