Saturday, August 23, 2008


المكتوب على الجبين لازم تشوفه الصين

واحد صاحبى لا داعى لذكر اسمه _وده لان اشرف مخه ضيق وممكن يزعل منى_صاحبى ده بينه وبين التفاؤل تار بايت وبيموت فى التشاؤم وساعات بخاف اقوله انت كويس يزعل منى لذلك كل ما اشوفه بعكنن عليه وهذا لحرصى على استمرار صداقتنا
المهم _مطولش عليك قول قصر_صاحبى ده قبل الاولمبياد اعلنها صريحه فى وشى اننا مش هنفوز بميداليه نحاس حتى ..اعترضت على كلامه استنادا لما حققه الابطال_ايام مكانوا ابطال _فى اثينا واكدت له اننا سنبهر العالم بقدرة المصريين على تحدى الصعاب والظروف وطوابير العيش كمان ..وكعادته زعل منى بسبب تفاؤلى وايضا لانى جبت سيرة طابور العيش لانه سبب من اسباب شبورة الياس بداخله ..قاللى بكره تشوف يا متفائل ..اكدت له انه هو اللى هيشوف وانه هيرفع العمه قصدى القبعه احتراما للمصريين وانه هيمشى يغنى فى الشارع لو لم اكن مصريا لوددت ان اكون مصريا بدل مهو ماشى يغنى ويقول لو لم اكن مصريا لحمدت الله على ذلك
ومرت ايام الاليمبياد _ويا ريتها ما مرت_وكنت متلهف لسماع الاخبار والنتائج حتى اثبت صحة كلامى وايضا لكى يخرج صديقى من هذه الحاله ..فوجئت بتساقط اشباه الابطال واحدا تلو الاخر حتى كرم جابر اللى قلت عنه انه الامل ..اتضح انه اسم على مسمى لانه من كرمه ساب البطوله من اول جوله
وبينى وبينك كنت حريص فى هذه الفتره انى مشوفش صديقى لانى كنت محرج ومكسوف ومش عارف اقوله ايه واستمر الحال الى ان فاز البطل هشام مصباح بالميداليه البرونزيه ..ساعتها فقط اتصلت عليه وقلتله عايز اشوفك وبالفعل قابلته وجدته على نفس الحاله ..وسالنى فين الميداليات يا استاذ دى حتة ميداليه واحده بس ..بصراحه مكنتش عارف اقوله ايه لدرجة انى فكرت اقوله ان ابطالنا عزفوا عن الفوز بالميداليات وهذا لانه نما الى علمهم المتطور انها ميداليات صينى _مضروبه يعنى_بصراحه خفت اقوله كده يضربنى اساسا
قلتله يا صديقى بداية الغيث برونز ..رد ساخرا .ليه هى السما هتمطر دهب ؟؟
فكرت مجددا ان اعرض عليه المشاركه فى الاوليمبياد ليفوز بكل سهوله بالميداليه الذهبيه فى الاحباط ..خفت الاحباط يقلب بمصارعه
قررت انى ارمى الكوره فى ملعبه وسالته ..ايه الحل من وجهة نظر سيادتكم المحبطه المغلفه بالياس؟؟؟
وجدته يتحدث بحماس كأنه ينتظر السؤال منذ زمن بعيد وقاللى الحل اننا نحاسب المسئولين اللى قدروا يسلبوا مننا ارادة الفوز والانتماء وحب البلد بجد ..نحاسب اللى اعتبروا ان البطوله سبوبه وخلاص واستهانوا بمشاعر شعب جعان فرحه
استمر صديقى فى كلامه وكان يتحدث بسرعه غير معهوده لدرجة انه فى بعض الجمل السريعه كنت عايز مترجم ..والحماس خده وصوته على وكنا قاعدين على القهوه ..وكل جمله يقوللى نحاسب ..نحاسب ..نحاسب
قاطعته قائلا ..احنا نحاسب على المشاريب قبل منتمسك تحرى

37 comments:

Empress appy said...

اللى هعلق عليه كرم جابر لحظى التعيس فى يوم رحت سهرت مع خالتى وجوزها فى احدى الاماكن اللى بيدخلوها الميمبر شيب بس او الاعضاء مش نادى وانما مطعم شهير ونايت فيه اغانى بس باينو وحاجه كلاس كده اوى
المهم المكان اساسا تحفه وشيك والناس محترمه الاقى لك كرم اللى ربنا ينتقم منه داخل ومعاه واحده وبجد عادى جدا بس المصيبه فى وهو قاعد ومدى القذارة اللى هو فيها فجوز خالتى اضايق نده على المتر وقاله ميصحش ده مكان محترم ويحصل فيه كده
قاله حضرتك هننقل على ترابيزه تانيه واصل ده كرم جابر واللى معاه بنت فلااااااااااااان وجايين بحراسه
احنا قولنا له ولعى ايه قومنا ويبنا المكان
من الاخر كرم جابر الستات جابت اخره خلاص وعمار يا ابطال مصر

ندا منير said...

صعب قوى ان الانسان يعيش عمره كله متشائم وميعرفش معنى التفاؤل
بس هو حقه يتشائم ان مصر او ابطال مصر ممكن يفوزوا عنده حق بصراحة عشان احنا عارفين خيبة مصر فى كل حاجة وطبعا اتفضحنا برة والمستخبى بان لا هو اصلا مبقاش فى مستخبى خلاص احنا اتفضحنا فى كل بلاد العالم وكل شئ بان

يارب المرة الجاية مصر تفوز بقى وابطالها يعملوا اى حاجة بدل الفضيحة دى
بس نسيت اقولك ان اسلوبك لذيذ قوى فى بداية الموضوع
او الموضوع كله اصلا

بنت القسام said...

وتبقي مصر ام الدنيا
تحياتى وخالص احترامى لك ولصاحبك
وكل عام وانتم بخير
جيلان

ميرا ( وومن ) said...

صالح سعيد

انا قولت ارد الزيارة الكريمة جدا جدا جدا دي

وقلت اكمان اجي اشوف مدونتي اكتشاف في ايه

اكتشفت بقة انه جر رجل الإكتشاف الحقيقي كانت مدونتك وخفة دمها

ميرا ( وومن ) said...

اه بالنوسبة لأوليمباد انا قررت نظرا لآني سرعة غليان الدم عندي عالية ومكان بغير مرارة كتير اني متابعهاش

خصوصا لما كل يوم كان بيعدي ومسمعش
اسم مصر

والحمد لله علي نعمة الاستمحانات اللي مخلياني مش فاضية

Anonymous said...

السلام عليكم
التشائم فعلا دة شىء فظيع اوى ويعدم اى شعاع امل فى الحياة دة غير انة منهى عنة حيث لا طيرة ولا تشائم فى الاسلام وانا بردو بكرة نفسى لما الاقى الى حواليا متشائمين فعلا حاجة صعبة اوى بس الحياة دايما فيها الحلو والو حش فمفيش داعى نزعج دماغنا ونتشائم لانة فعلا متعب جدا واهو برونزية احسن من مفيش خالص.وشكرا
نيرة احمد محمود

Anonymous said...

والله يا صالح انا شايفه ان صاحبك ده معاه حق وانا اساسا مش تابعت اللي بيقولوا عليهم ابطالنا عشان عارفه اللي فيها كويس اوووي
بس اللي انا عايزة اقوله ان الواحد اللي بيكون عايز يبقي بطل بيجاهد مهما حصلت له من مشكلات وبيثابر عشان يوصل للي هو عايزه ويتمنهاه
بس المصيبه اننا كشعب مصري بيحب الحاجه السهله وخلاص وانا ليه اتعب نفسي ما اخليها تيك اواي
صباحوا نرجس يا صالح باشا

Unknown said...

برضه..
لازم لازم .. الناس تتعلم تحب مصر..
لازم يكون في الحب اللي بيولد الانتماء العميق ..
الانتماء اللي بيخلي الواحد يحس ان تراب مصر اغلى من نفسه و روحه و كل حاجة ..
اصل حقيقي..
انتماء ازاي .. و الناس مسجونة في مكان حريتهم !!
انا على فكرة لم أحبط من النتيجة.. الغريب انها تبقى غير كدة اصلاً.. !!

د/اجدع بنوته said...

نحاسب المسئولين اللى قدروا يسلبوا

مننا ارادة الفوز

جمله جامده جدا اخر حاجه

تحياتى لصاحبك المحبط بصراحه

micheal said...

يا باشا..أنا زي صاحبك بالضبط وراهنت الجميع علي صفر بس طلع الواد هشام مضصباح وحفظ جزء ضئيل من ماء الوجه...صدقني مفيش اي مفاجأة والصفر قادم في لندن بهذا الحال
دي نتيجة منطقية جدا لمقدمات كتير كتبتها في مقال لمجلة علي صوتك..حبقي أحط اللينك بتاعه يوم 1 سبتمبر بإذن الله
تحياتي

عمرو said...

يا جماعة متوقع

احنا كل 50 سنة كده تحصل لنا طفرة فى الرياضة ونشم نَفَسنا شوية..... ونفتكر ان احنا كده خلاص عَدّينا... وبعديها....هوووووووب !!!... انسى يا باشا


تحياتى يا صالح بيه

موضوع فى الجون

صالح سعيد said...

appy
تصدقى انك زعلتينى من اكرم اكتر
وهو ماله ومال الستات بس ؟؟
الله يخرب بيت الس؟؟؟؟؟
ولا بلاش للحريم يزعلوا
طب مكان يخلصوا عليه بعد البطوله
الله يسامحهم بقى
وحسبى الله ونعم الوكيل
تحياتى

صالح سعيد said...

ندا منير
ازيك يا جميل
عامله ايه
بصى انا ضد اننا نسميها فضيحه
على الرغم من الاحباط اللى جالنا
لكن بجد انا نفسى يتحاسب كل مسئول عن الاحباط ده
اتفق مع صديقى فى هذا
واختلف معه فى نبرة التشاؤم الازليه
لانه باذن الله بكره احلى من النهارده
مش فى الرياضه بس
فى كل حاجه
حتى لو الواقع بيقول عكس كده
احنا نقدر نغيره
يعنى لا استسلام للظروف
نورتينى بجد
تحياتى

صالح سعيد said...

جيلان
وتبقى مصر ام الدنيا
جمله حلوه بجد
معبره
فكرتنى بجمله لابراهيم عيسى
تقريبا قال
ان مصر مبقتش امى دى بقت مراة ابويا
شكرا لاهتمامك ورايك
تحياتى

صالح سعيد said...

وومن
شكرا لاهتمامك ورايك فى مدونتى المتواضعه
وانا بحسدك لانك مكنتيش فاضيه ايام البطوله
يا بختك
يا ريتنى كان ورايا امتحانا زيك
على العموم حصل خير
وانا هعمل حسابى البطوله الجايه
وهدرس ثانويه عامه تانى
نورتينى

صالح سعيد said...

نيره احمد
اختلف معك يا نيره فى انه برونزيه احسن من مفيش
لانه مفيش كان اهون بجد
لان الناس اللى راحت البطوله كلفتنا ملايين من دم الغلابه
مكنا قعدنا وخلاص
وعملنا بالملايين دى افران عيش ونرحم الناس من الطوابير
ولا ايه رايك
؟؟؟؟؟؟؟
اشكرك على اهتمامك
تحياتى يا جميل

صالح سعيد said...

حوبة
ازيك يا رحاب
عامله ايه
ليكى وحشه بجد
اتفق معك فى رايك يا حوبه
لاننا فعلا بنحب الاستسهال
يعنى شعارنا ليه تتعب اكتر لما ممكن تتعب اقل
ربنا يسترها
ونورتينى بجد يا حوبه
تحياتى

صالح سعيد said...

قهوة بالفانيليا - شيماء علي
افهم من كده انك كنتى متوقعه النتيجه المحبطه اللى جبناها فى البطوله
امال يا جماعه انا كنت متفائل ليه طيب
كان فيروس الامل وصابنى يعنى ولا ايه
على العموم اطمنك ان الانتماء موجود
مهما كانت النتائج
تقبلى تحياتى

صالح سعيد said...

اجدع بنوته
سابلغ صديقى ملك الاحباط وبرنس الياس
بسلامك
بس المشكله انه ممكن يزعل منك بسبب السلام ده
بس انا هحاول اقنعه
اى خدمه
نورتنيى بجد
تحياتى

صالح سعيد said...

ميشيل
بقى انت كمان يا ميشو زى صاحبى
وانا اللى فكرته متفرد باحباطه
انا هستنى لينك موضوعك
لانه اكيد هيكون كويس
تحياتى

صالح سعيد said...

عمرو
صباح الورد يا عمور
معنى كلامك اننا هنستنى كمان خمسين سنه عشان نشوف فرحه اوليمبيه تانى
ده انت غلبت صاحبى يا عمور
اتمنى ان توقعاتك المرئيه متحصلش طبعا
واننا نتعلم من اخطائنا
نورتنى يا جميل
تحياتى

نوسه وريمان فى هاكونا مطاطا said...

السلام عليكم


دى اول زياره ليا فى مدونتك


بجد عجبتنى اوى

مدونتك دمها خفيف

وبوست ظريف

بذرة امل said...

نورت مدونتك من تانى يااستاذ صالح
وكالعادة مواضيعك دائما بتدور حول ما يعانيه الشعب المصرى
سمعت اخر الاخبار
الريس بيأمر بالبحث فى هزيمة المصريين فى الاوليمبياد
!!!!!!!!!!!
قال لسة مكتشفين اننا حالنا منتدهو فى الرياضة مفاجاة دى ولا ايه ؟

دعوة الفردوس said...

عجبني تعبير شعب جعان فرحة

ولو ده كلام صاحبك هو واقعي مش متشاءم
بس المفروض يبقى في رغبة في التغيير مش المفروض وبس
يعني نكملها عمل مش اماني واحلام وخلاص

PrInCeSS BeRy said...

ادهم كل سنة وانت طيب ورمضان كريم بصراحة انا مش من هواة الرياضة اوى بس لما يكون فى ماتش مصيرى لمصر فى اى رياضة ايا كانت لازم اتفرج واشجع وطنية بقة هههههههههه تحياتى لك

mostafa rayan said...

متفق معك يما قولته وقاله صديقك اصبحت الرياضة فعلا سبوبة بتجيب فلوس حلوة قوي للكبار والحكومة نسيت الناس فعلا
- انا عرفت مدونتك من عند باسم شرف
انابردة بحب الكتابة وكان نفسي اشترك في ورش السيت كوم فلو ممكن تساعدني وتقولي الموضع يمشي ازاي اكون شاكر وممتن ليك جدا ودة ايملي لو حبيت تراسلني عليه
the_highstar11@yahoo.com
كل سنة وانت طيب ويارب تنعاد عليك الأيام بالخير

صالح سعيد said...

حسام وريمان فى هاكونا مطاطا
اهلا ومرحبا بكما فى مدونتى الغلبانه
ويا رب اكون دايما عند حسن ظنكم
يسعدنى التواصل معكم
كل عام وانتم بخير
تحياتى

صالح سعيد said...

بذرة امل
رمضان كريم يا بلدياتى
الرئيس امر بفتح التحقيق فى الفضيحه الاوليمبيه
ده تقدرى تقولى عليه روتين حفظ ماء الوجه
يعنى خبر ثابت ممكن جدا ميحصلش
بس عشان الناس تعرف ان الريس مش ساكت
نورتينى يا بلدياتى
تحياتى

صالح سعيد said...

دعوة الفردوس
اتفق معك فى كلامك وفى دعوتك
لاننا فعلا لازم يكون لنا وقفه
واشكرك على اهتمامك ومرورك ورايك
تقبلى تحياتى

صالح سعيد said...

PrInCeSS BeRy
تقدرى تقولى انه مفيش حد مش وطنى
يعنى كلنا بنحب مصر
وعشام بنحبها يبقى لازم نزعل لما مصر تتبهدل فى البطولات المختلفه
مش كده ولا ايه؟
نورتينى
رمضان كريم

صالح سعيد said...

mostafa rayan
ازيك يا درش
كل سنه وانت طيب
بص يا معلم
اولا خليك مؤمن بان الموهبه زى الجريمه لازم تتكشف
يعنى ثقتك بنفسك تبقى سلاحك
اما ازاى تبقى كاتب فى مسلسل
دى عايزه كلام كتير
ولينا مع بعض كلام تانى بعد العيد
مش كلام بس يعنى
باذن الله يبقى كلام وشغل
نورتنى يا درش

Empress appy said...

كل سنه وانت طيب

nado said...

اولا كل سنه وانت طيب رمضان كريم عليك وعلينا
بنسبه لبوست بجد لاتعليق

صالح سعيد said...

appy
وانتى طيبه ويا رب تحققى كل احلامك الرمضانيه وغير الرمضانيه
وانا النهارده قررت التخلى عن الكسل وهعمل بوست جديد
تحياتى يا جميل

صالح سعيد said...

nado
وانتى طيبه ورمضان كريم عليكى
وايه حكاية لاتعليق دى يا جميل
ليكون البوست لم يعجبك
عموما بشكرك على اهتمامك و مرورك الكريم
نورتينى

أحمد سعيد بسيوني said...

بسم الله الرحمن الرحيم

معذرة على الخروج عن الموضوع

ولكن
نكسة مصرية جديدة
في العاشر من رمضان 1429هـ
10/9/2008
على مدونة البحر
www.ana-elbahr.blogspot.com

نشرف بزيارتكم

تحياتي

micheal said...

http://www.3allisotak.net/apages.php?pids=758&ids=do
ده لينك الموضوع يا باشا واسفين ع التأخير
:)
تحياتي