direct مبدئيا كده وبدون مقاطعه نهارك عسلوز بطعم الحب عندى ليك يا صاحبى شوية كلام من القلب للقلب يعنى . الاول دعنى اسالك نفسك تبقى روميو هذا الزمان وكما يقولون مقطع السمكه وديلها وخياشيمها كمان ؟ اكيد نفسك طبعا يبقى صحصح معايا شويه لان المعايير اختلفت والحب دلوقتى غير الحب اللى كان من عشره خمستاشر سنه اسالنى انا . فنحن لم نعد نحيا فى عصر الشحتفه الرومانسيه وسهر الليالى وعمل حصر لعدد النجوم فى عز الضهر والبحلقه فى القمر للقسم له بان حبك اكبر من حب روميو لعبله واشد سخونه من عشق عنتر لجولييت الموضوع اختلف يا قيس قصدى يا صاحبى .
دلوقتى الحب بقى حاجه تانيه خالص غير زمان تقدر تقول ان الحب زمان كان متسبك دلوقتى بقى دايت على الاخر . يعنى مثلا لو سالت امتى اخر مره كتبت جواب رومانسى لحبيبتك تعبر فيه عن حبك الكبير وانها اجمل من القمر بكتير بس بشرط تسمع كلامك ومتكلمش فرافير . طبعا الاجابه هتكون انه حصلش اساسا انك كتبت جواب ومعاك حق هتكتب ليه وانت معاك رقم الموبايل وهاريين بعض ميسدات والشاطر اللى يفتح على التانى وحتى لو طلبت معاك رسايل هتبعت رساله جاهزه من موبايلك لانه بالتاكيد انك لو بعت جواب رومانسى هتبقى مصدر سخرية صديقات حبيبتك واتهامك بانك عاشق من القرون الوسطى ومش بعيد يبعتولك الرد مع الحمام الزاجل . وبينى وبينك عندهم حق لان روميو دلوقتى اختلف عن روميو زمان بمعنى ان المطلوب دلوقتى روميو الروش الطحن الجنان مش الرومانسى الحالم بتاع روتانا زمان . المطلوب روميو الجرئ اللى بيجيب من الاخر واللى يعرف بحرفنه يعبر عن شعوره ودوافعه ومتطلباته وليس روميو الهادئ الحالم اللى يفضل يتكلم عن القمر والنجوم والعشق والهوى بطريقه تجعل حبيبته مصره على ان تكتب فيه بلاغا بدعوى التخلف الرومانسى . روميو لوقتى لازم يبقى واد تقيل _بكسر التاء_لانه لو صدع دماغ حبيبته بشدة حبه _بضم الباء_ هيبقى مصيره الطرد من حياتها _بفتح الباب _ لانه مش لازم فعلا انك تفكرها باحساسك ومشاعرك وحبك يوميا 3مرات بعد الاكل . كما انه مش لازم على طول الخط .
ان تتسم شخصيتك بالوضوح امامها وكل متكلمها تحكى بصراحه شديده كانك قاعد على جهاز كشف الكذب لانه الافضل ان تتسم شخصيتك بشئ من الغموض احيانا اسمع كلامى لانه جيمس بوند افندى مش احسن منك فى حاجه . واياك يا صاحبى تكون شخصيه مسالمه بجد هتزعلنى لازم تبقى ديكتاتور صدقنى بيموتوا فى اللى يسيطر عليهم ومترجعش فى كلمتك ابدا ولو صرخت فيك وقالتلك حنفى الطم على وشها وقول مفيش حنفى فى سى السيد .
عايزك تنفذ كلامى وتعيش حياتك ولو جاب نتيجه معاك امانه يا شيخ عايزك تدعيلى ان حبيبتى اللى مطلعه عينى توافق تدينى رقم موبايلها لانه زى منت عارف بقى الحب بهدله....ا
كل سنة وانتم طيبين ...سنة سعيدة
15 comments:
ايه ياعم صالح ده
انا مش معاكم المره دى
وهقولك وجهه نظرى وقناعتى الشخصيه وما تسمو اليه طبيعتى الانثويه
اولا يا سيدى اى بنت تتمنى ان شريك حياتها واسمحلى اتكلم عنه بصفته زوجها
البنت بتحب جدا تسمع كلامات الحب والغزل
والتعبير عن ده باى طريقه
ولو نحط الحاجات دى تحت مسمى يبقى مسمى الاهتمام
اى شىء الولد بيعمله يوصل بيه اهتمامه بالبنت ده بيكون جميل جدا
سواء كلام غزل وده اجمله سواء اهتمام بالمظهر حتى لو هى عيشه الكيلانى والاهتمام بكل تفاصيل حياتها
لكن لو طنش وتقل زى ما انت بتقول ده بتكون اول اشاره لانهاء العلاقه
صحيح حببتك دى وصلها سلام جامد جداااااااا
تعجبنى قوى البنات الجدعه
ايوه كده يابت
اتقلى
;)
هههههههههههه
ايه يا عم الكلام ده
انا مش معاك خااااااالص
انه فى ايه يبقى الشخص رومانسى اليومين دول يعنى
انا رايى من راى لماضه برضه
سلامى
هههههههههههه
حرام عليك, انت كدة هتوديهم ف داهية
ما فيش ولا وحدة هتعبر حد فيهم
حتى لو واحدة شبه اسماعيل ياسين الله يرحمه
موضوع سي السيد دا بطل, بكسر الباء, من زمان
اللي عايز يعمل سي سيد يروح يركب أول ناقة تقابله وحساب السواق عندي
لكن لو حاول يرسم الشويتن دول على أي واحدة هتديلوا على دماغه
دلوقتي كل البنات واخدين عضوية جمعية المرأة المتوحشة
مفيش نظام الأبيض وأسود
أيام ما كانت الست تاخد القلم من دول على وشها وتزغرت
دلوقتي أحسن حاجة الأدب والأحترام
اللي عايز يعمل روميو بقى
يتشطر كدة ويروح سوق السمك يشتريله سمكة بوري
يقطعها, يعملها فيليه, يشويها, يقليها.. هو حر
لكن أكتر من كدة يبقى بيحلم
مقالك دمه خفيف, وواقعي في جزءه الأولاني
ياما نفسي الولاد اللي عايزين يقطعوا السمكة دول يروحوا يعملولهم حاجة مفيدة
بدل م يضيعوا فلوسهم وفلوس أهاليهم على السهوكة ف التليفونات
كل أعجابي بكتاباتك الساخرة
وخالص تحياتي
لماضه
اعترف اليكى ان هذا المقال تم نشره فى الدستور فى صفحة ضربة شمس
والصفحه دى غرضها رسم الابتسامه على الوجوه والموضوع نهايته تؤكد ذلك
لكن انا معاكى فى ان الاهتمام مطلوب لكن بدرجه معينه حتى لاتصل لمرحلة الملل
والطناش المحسوب بيبقى احيانا زى البهارات فى الاكل
وعلى فكره محصلش معايا النهايه الماساويه فى المقال لان دى لازمه كوميديه اما عن سلامك اعتبريه وصل لحبيبتى ولحماتى مستقبلا كمان
اصل انا معايا رقمهم هما الاتنين هههههههههه
shayma
ازيك يا شيماء
طبعا رايك من راى لماضه
وكما قال الشاعر
مين يشهد للعروسه
ويبدو ان الموضوع ده هيقلب عليا جمعية الاتحاد الحريمى
وانا مظلوم يا شيماء والله
دى طبيعة الصفحه بتاعة الدستور
ووعد منى اخر مره اسمع كلامهم
حرمت
Fantasia
برافو عليكى بجد لانك فهمتينى رغم انك خوفتينى باسم الجمعيه بتاعة المراه المتوحشه بس على مين ده انا ساعتها هبقى روميو قلب الاسد حتى لو كانت هى فرجيينا
وشكرا على اهتمامك
ممكن خدمه للعبد لله
كارت من الجمعيه دى اهو ينفع وقت الزنقه
هو المفروض فى اول زياره لمدونة اقول ايه
مش عارفه بجد
بس هو انا قريت التدوينه ومش عايزه اقولك راي بجد .... لكن ممكن اقولك
انى مستنياك تعمل
لو كنت روميو , ازاى تلاقي جوليت ؟؟
اصلك بكده
لو بقيت جوليت مش هتعرف تلاقي جوليت خالص
دا راي
وسلام
Tamr7na
يا اخت تمرحنه
اولا انتى قولى اللى انتى عايزاه بجد حتى لو اختلفتى لانى مؤمن بان الاختلاف فى الراى لا يفسد للود قضيه
وانا فاهم كلامك لكن والله العظيم دى طبيعة مقالات صفحة ضربة شمس بالدستور ونشروا المقال فيها
الموضوع كوميدى مش جد يا تيموره
يعنى دى مش قواعد الشباب يمشوا عليها
احنا كنا عايزين ابتسامه مش اكتر
وشكرا على اهتمامك وقولى رايك ومتخافيش
ارق تحيه يا تمرحنه
والله مقال ظريف جدا ودمه خفيف
وأسلوبه حلو
بس لكل قاعده شواذ
يعني مفيش خط سير محدد يوافق الناس كلها
وبالتالي
اللي هيسمعك كلامك
رايح في كلبوش
ومحدش عارف مين هيلطم على خد مين
المهم
كل واحد يفهم الشخصيه اللي بيتعامل معاها صح وبالتالي بقى
تطلب رسايل حمام زاجل يبعت لها
تطلب مسد يرنلها
وكده
**********
مدونتك جميله أحييك عليها
تحيااااااااتي
سلوى
ازيك يا سلوى
يا رافعه معنوياتى وناصفانى
تعرفى انك الوحيده اللى شكرتى فى البوست اللى جابلى الكلام ده
رغم انه منشور فى الدستور فى صفحة ضربة شمس
الا ان هذا لم يشفع له
ويبدو ان البنات خايفين من تمرد البنين عليهم
مع ان طبيعة البوست هو رسم الابتسامه فقط لا غير
هن فكرن انه تحريض ضدهم
والله برئ
وشكرا على اهتمامك وانصافك ليا يا سلوى
استاذ صالح
بجد البوست ده جنان
انا بتفق معاك ان ده اللي بتطلبه معظم الفتيات دلوقتي
بس مش ده الصح
يعني مش بنصح الولد اللي عايز يرتبط ببنت من النوعيه دي انه يتغير ويبقى ملوش لازمة عشان هي ترضى عنه !! لا بالعكس
يحاول هو انه ياخدها للرومانسيه الجميله
لان لا الروشنه هتبقى ولا الجمال هيبقى ولا البنطلون اللي بيسقطه هيقدر يسقطه وهو شايل ابنه على ايده في المستقبل
كل شئ هيتغير بس الحب والرومانسيه عمرهم ما بيكبروا ولا بيعجزوا
ارق تحية لشخصك الكريم ولمواضيعك الساخنة واسلوبك الشيق
دمت بكل خير
The Queen
اذيك يا ملكه
فعلا كل شئ بتغير ما عدا مشاعر الحب والرومانسيه
لانهم ضد الزمن
اذا كان حب بجد طبعا
وللاسف كثير من بنات اليومين دول مش عايزين لا حب ولا رومانسيه
عايزين نوعية من البشر غريبه
الواحد لما يشوفهم يجيله مغص فى مخه من اسلوب تفكيرهم
فرافير يعنى
والحمد لله لم ولن اكن فرفورا
تحياتى لكى
وشكرا على تشريفك لمدونتى
فعلا والله انا اعرف بنات كده زى وصفك بالضبط
تحس انهم بنات غريبه
لكن معظم البنات تحب الرومانسيه
mnoon
للاسف يا منى مش البنات بس الى وصلهم فيروس فى طريقة تفكيرهم
مش كلهم طبعا
لكن قصدى ان الاولاد برضه فى شريحه كبيره منهم تسمى بالفرافير عندهم نفس الفيروس
ويبقى طموحه ان شعره يوصل لحد وسطه علشان يبقى واد روش
شكرا لاهتمامك ورايك
يا ارق منى
السلام عليكم و رحمة الله و بركاته ..
اولا ازيك يا استاذ صالح انا اول مره اكتب تعليق فى بلوج ليك ... انا شوفت تعليقك فى بلوج اشرف ( اخف دم )) المهم على فكرا انا لسه مارتبطش و ماحبتش لحد دلوقتى بس انا بحلم و مازال الحلم مستمرا انى الاقى شخصيه رومانسيه زاى افلام زمان عارفه ح تقول اديكى قولتى زمان بس على فكرا انا لحد دلوقتى بكتب جوابات لاصحابى رغم انى معايا تليفونتهم و ايميلاتهم بس بحس انى خط الايد بيبن قد ايه انت بتحب الشخص دا و انا من رابطة مشجعى الجوابات فا لو اتكعبلت فى حد صاحبك ولا قريبك ... رومانسى و بيحب يكتب جوابات ابقى ابعتو لاختك ... و صدقنى يا صالح الواحد لسه بيحلم بالحب المسبك و فى ناس كتير مابتحبش التيك اواى ... اختك (( ام العيال )) الاسكندريه
Post a Comment