هلت البشاير اول حلقه تتذاع ليا فى مسلسل راجل وست ستات
بقالى ربع ساعه كاتب العنوان اللى انتوا شايفينه ومش عارف اكتب ايه بجد رغم ان اللماضه بتجرى فى دمى
انا من جوايا بقول الحمد لله على كل شئ ومن جوايا برضه بقول يا رب كملها على خير
اتذاع ليا امبارح اول حلقه فى مسلسل راجل وست ستات وجانى احساس اول موضوع تم نشره فى الدستور
من سنتين بالتمام والكمال لانى وقتها كنت ماشى بالجرنان فى البلد كانى ماشى بالبطاقه وللاسف مينفعش امشى بالتليفزيون فى البلد ...بس بجد هو نفس الاحساس ..والظاهر ان طعم اول مقال زى طعم اول حلقه وزى طعم اول حب
ورغم انى معترف بينى وبين نفسى انى لسه بقول يا هادى الا ان هذا لا يمنع انه جوايا طموح وطموح مشروع
مش هتكلم عن الطموح ده لان الصح ان الواحد يعمل وبعد كده يتكلم ..
انا حبيت بس ان اخوانى المدونين الاعزاء يشاركونى فرحتى بالحلقه الاولى ليا
الحلقه دى كان ليها ظروف خاصه جدا وهى ان اشرف عبد الباقى كان مسافر تونس وعايز فكرة حلقه ميظهرش فيها غير فى مشهدين يصورهم ويسافر ...عملت الفكره واللى كان بطلها ابوه فى المسلسل سعيد طرابيك
وباذن الله هبقى اجيب لينك تحميل الحلقه عشان تشوفوها وهحاول انى انزلها على المدونه
واتمنى لما تشوفوها انها تعجبكم
22 comments:
الف الف مبروك
ودايما بالتوفيق انشاءالله
سلامى
:))
الف مبروك يابوصلاح
وعقبال الباقى
الي الامام دائما
ربنا يوفقك ويجعل لعمالك فى الخير
وهاطلب منك طلب صغير
انت كده كده هتكتب وهتألف
يبقى ياريت توجه النيه انك بتكتب شئ علشان يدخل السرور على قلب الناس
ان شاء الله هتاخد ثواب
ربنا يوفقك
مليون مبروووووووووك
يا صالح انت تعبت بجد وتستاهل كل خير
بجد معنديش كلام اقدر اقوله يعبر عن فرحتى
تحياتى
الف الف مبروك وعقبال الفيلم الاول والمليون ان شاءالله
بالتوفيق يارب
الف الف مبروك
عقبال مايكون المسلسل كله بتاعك
:)
ألف مبروك يا صالح
يابن بلادنا
انا مع الفقيرة إلى ما دام ربنا رزقك بالموهبة الجامدة ليه مش تاخد نية تغيير المجتمع والتركيز على سلبياته ووضع حلول له بحيث تشتغل وفى نفس الوقت تكسب حسنات كتير
الف مبروك وربنا يوفقك دايما اجمل حاجة لما الانسان يحقق احلامه
يا مجرم وده خبر بردوا تستنى عليه يا صالح واعرفه من البوست
بجد كتير زعلانه منك
بس خلاص مصلحاك عشان البوست الحلو اللى مليان اخبار حلوه ده
عمواما الف الف مبروك
وعقبال ما نستناك عشان تمضى لنا على الاتوجرافات يا بونتى
وافكرك بنفسى واقولك انا روح
ربى يكتبلك الخير ويخلى طعم اول حب فى كل حاجه انت بتعملها
قول امين بسرعه
شيماء
الله يبارك فيكى
وباذن الله الحلقات تعجبك
اشكرك على اهتمامك
تحياتى
جهاد
الله يبارك يا بلدياتى
دعواتك معانا
وعقبالك
تحياتى
الفقيره الى الله ام البنات
طلبك هيتنفذ باذن الله
وانا كتبت حلقات فى راجل وست ستات بتناقش قضايا وفى نفس الوقت بشكل كوميدى
وباذن الله تعجبك لما تشوفيها
اشكرك على اهتمامك
نورتينى
ايمو
ازيك يا ايمان
الله يبارك فيكى
وانا معاكى انى تعبت بس تعب لذيذ لانه فى حاجه انا حاببها
ربنا يكرمك ويوفقك
تحياتى
فكرة من الزمن ده
الله يبارك فيكى
ومن بقك لمدينة الانتاج ومدينة السينما
لان الواحد مهما كتب للتليفزيون
تبقى السينما لها سحرها الخاص
اشكرك
نورتينى
بندقه
ربنا يكرمك ولو انها صعبه ان المسلسل كله يبقى بتاعى لان الفكره قائمه على تنوع الافكار
بس مفيش مانع اعمل مسلسل كامل
هاتيلى انت بس منتج
اشكرك
تحياتى
بذرة امل
بلدياتى العزيزه
ازيك ؟
عامله ايه
وانا بتفق معك ومع الاخت العزيزه فى الكلام وهو ان الواحد لازم يعمل شئ يفيد الناس حتى لو كان كوميدى
يعنى تبقى كوميديا بهدف وليس باسفاف
اشكرك على اهتمامك الدائم
تقبلى تحياتى
ايوشه
فعلا ده اجمل احساس على راى اليسا
ان الواحد يحس ان تعبه مراحش هدر
ودى اول خطوه لسه فى مشوار طويل
اشكرك
تحياتى
روح شرقيه
ازيك يا جميل
عامله ايه
وبعدين انا بعتلك رساله اوف لاين على الايميل عرفتك فيها الخبر
ليكون الياهو بلع الرساله
بجد بعتلك رساله بكده
وربنا يبارك فيكى بجد
وحاولى تشوفى المسلسل عندك
هو بيذاع على قناة الشاشه الساعه6مساء بتوقيت مصر
واللى اهم من كده بقى
طمنينا عليكى
اشكرك على اهتمامك وردك
تحياتى يا جميل
مبروج جميلة
يارب تكون جميلة
mabrrrrrrrrrok
حلوة
Post a Comment