Wednesday, February 11, 2009

هلت البشاير اول حلقه تتذاع ليا فى مسلسل راجل وست ستات


هلت البشاير اول حلقه تتذاع ليا فى مسلسل راجل وست ستات
بقالى ربع ساعه كاتب العنوان اللى انتوا شايفينه ومش عارف اكتب ايه بجد رغم ان اللماضه بتجرى فى دمى
انا من جوايا بقول الحمد لله على كل شئ ومن جوايا برضه بقول يا رب كملها على خير
اتذاع ليا امبارح اول حلقه فى مسلسل راجل وست ستات وجانى احساس اول موضوع تم نشره فى الدستور
من سنتين بالتمام والكمال لانى وقتها كنت ماشى بالجرنان فى البلد كانى ماشى بالبطاقه وللاسف مينفعش امشى بالتليفزيون فى البلد ...بس بجد هو نفس الاحساس ..والظاهر ان طعم اول مقال زى طعم اول حلقه وزى طعم اول حب
ورغم انى معترف بينى وبين نفسى انى لسه بقول يا هادى الا ان هذا لا يمنع انه جوايا طموح وطموح مشروع
مش هتكلم عن الطموح ده لان الصح ان الواحد يعمل وبعد كده يتكلم ..
انا حبيت بس ان اخوانى المدونين الاعزاء يشاركونى فرحتى بالحلقه الاولى ليا
الحلقه دى كان ليها ظروف خاصه جدا وهى ان اشرف عبد الباقى كان مسافر تونس وعايز فكرة حلقه ميظهرش فيها غير فى مشهدين يصورهم ويسافر ...عملت الفكره واللى كان بطلها ابوه فى المسلسل سعيد طرابيك
وباذن الله هبقى اجيب لينك تحميل الحلقه عشان تشوفوها وهحاول انى انزلها على المدونه
واتمنى لما تشوفوها انها تعجبكم

22 comments:

Anonymous said...

الف الف مبروك
ودايما بالتوفيق انشاءالله

سلامى
:))

R-H-S said...

الف مبروك يابوصلاح
وعقبال الباقى

الي الامام دائما

الفقيرة إلى الله أم البنات said...

ربنا يوفقك ويجعل لعمالك فى الخير
وهاطلب منك طلب صغير
انت كده كده هتكتب وهتألف
يبقى ياريت توجه النيه انك بتكتب شئ علشان يدخل السرور على قلب الناس
ان شاء الله هتاخد ثواب
ربنا يوفقك

emy said...

مليون مبروووووووووك
يا صالح انت تعبت بجد وتستاهل كل خير

بجد معنديش كلام اقدر اقوله يعبر عن فرحتى

تحياتى

فكرة من الزمن ده said...

الف الف مبروك وعقبال الفيلم الاول والمليون ان شاءالله
بالتوفيق يارب

simply me said...

الف الف مبروك

عقبال مايكون المسلسل كله بتاعك

:)

بذرة امل said...

ألف مبروك يا صالح
يابن بلادنا
انا مع الفقيرة إلى ما دام ربنا رزقك بالموهبة الجامدة ليه مش تاخد نية تغيير المجتمع والتركيز على سلبياته ووضع حلول له بحيث تشتغل وفى نفس الوقت تكسب حسنات كتير

رحلتنا في الحياة said...

الف مبروك وربنا يوفقك دايما اجمل حاجة لما الانسان يحقق احلامه

روح شرقيه said...

يا مجرم وده خبر بردوا تستنى عليه يا صالح واعرفه من البوست
بجد كتير زعلانه منك
بس خلاص مصلحاك عشان البوست الحلو اللى مليان اخبار حلوه ده
عمواما الف الف مبروك
وعقبال ما نستناك عشان تمضى لنا على الاتوجرافات يا بونتى
وافكرك بنفسى واقولك انا روح
ربى يكتبلك الخير ويخلى طعم اول حب فى كل حاجه انت بتعملها
قول امين بسرعه

صالح سعيد said...

شيماء
الله يبارك فيكى
وباذن الله الحلقات تعجبك
اشكرك على اهتمامك
تحياتى

صالح سعيد said...

جهاد
الله يبارك يا بلدياتى
دعواتك معانا
وعقبالك
تحياتى

صالح سعيد said...

الفقيره الى الله ام البنات
طلبك هيتنفذ باذن الله
وانا كتبت حلقات فى راجل وست ستات بتناقش قضايا وفى نفس الوقت بشكل كوميدى
وباذن الله تعجبك لما تشوفيها
اشكرك على اهتمامك
نورتينى

صالح سعيد said...

ايمو
ازيك يا ايمان
الله يبارك فيكى
وانا معاكى انى تعبت بس تعب لذيذ لانه فى حاجه انا حاببها
ربنا يكرمك ويوفقك
تحياتى

صالح سعيد said...

فكرة من الزمن ده
الله يبارك فيكى
ومن بقك لمدينة الانتاج ومدينة السينما
لان الواحد مهما كتب للتليفزيون
تبقى السينما لها سحرها الخاص
اشكرك
نورتينى

صالح سعيد said...

بندقه
ربنا يكرمك ولو انها صعبه ان المسلسل كله يبقى بتاعى لان الفكره قائمه على تنوع الافكار
بس مفيش مانع اعمل مسلسل كامل
هاتيلى انت بس منتج
اشكرك
تحياتى

صالح سعيد said...

بذرة امل
بلدياتى العزيزه
ازيك ؟
عامله ايه
وانا بتفق معك ومع الاخت العزيزه فى الكلام وهو ان الواحد لازم يعمل شئ يفيد الناس حتى لو كان كوميدى
يعنى تبقى كوميديا بهدف وليس باسفاف
اشكرك على اهتمامك الدائم
تقبلى تحياتى

صالح سعيد said...

ايوشه
فعلا ده اجمل احساس على راى اليسا
ان الواحد يحس ان تعبه مراحش هدر
ودى اول خطوه لسه فى مشوار طويل
اشكرك
تحياتى

صالح سعيد said...

روح شرقيه
ازيك يا جميل
عامله ايه
وبعدين انا بعتلك رساله اوف لاين على الايميل عرفتك فيها الخبر
ليكون الياهو بلع الرساله
بجد بعتلك رساله بكده
وربنا يبارك فيكى بجد
وحاولى تشوفى المسلسل عندك
هو بيذاع على قناة الشاشه الساعه6مساء بتوقيت مصر
واللى اهم من كده بقى
طمنينا عليكى
اشكرك على اهتمامك وردك
تحياتى يا جميل

الحب said...

مبروج جميلة

الصداقة said...

يارب تكون جميلة

الزواج said...

mabrrrrrrrrrok

الطلاق said...

حلوة