Tuesday, December 23, 2008

وظائف خاليه

وظائف خاليه
_____________________________
_______________


(1)
مطلوب شباب للعمل على احدى العبارات بشرط يكونوا مستعدين للتضحية بأنفسهم من اجل صاحب العباره الى جانب امضاء اقرار على انفسهم بأنهم لو ماتوا_وده وارد جدا_يقروا بأن ده قضاء وقدر وان صاحب العباره برئ ومفيش داعى ييجى من لندن وانها غلطتهم انهم نسيوا العوامه فى البيت
________________________________________________________
(2)
مطلوب لمصنع فى العاشر شباب بمرتب مخزى وليس مجزى 300جنية ومواعيد العمل فى المصنع من السادسه صباحا لحد متفقد الوعى بشرط يكون شباب اعزب لان المرتب بعد المواصلات يدوب يكفى شحن الموبايل
_________________________________________________________
(3)
مطلوب للعمل لدى فنانه شهيره جدا لدرجة الفضيحه خادمه بشرط يكون عندها استعداد كامل للبهدله البدنيه والنفسيه ويستحسن ان تأتى وتترك كرامتها فى البيت
______________________________________________________________
(4)
مطلوب حلاق قروى اصيل لحلاقة ذقن مطرب شهير لم يتم حلقها منذ ظهوره على الساحه الغنائيه_اصله هارب من الجيش_ويستحسن ان تكون فتلة الحلاق من النوع السيسل وهذا لان حواجب المطرب اشد كثافه من نجيل استاد القاهره
_________________________________________________________
(5)
مطلوب للعمل فى السعودية جلاد مصرى قلبه ميت يكون عنده استعداد التلذذ بتعذيب وجلد ابناء بلده والمميزات توافر الاكل والسكن والكرباج ومرتب الفين ريال زائد 500جلده علاوه شهريه
___________________________________________________________
(6)
مطلوب رئيس نادى لنادى كبير _سابقا_بشرط توافر الصحه الجيده لتحمل الضغط _اللى كده كده هيجيله_وكتيبه من المحامين للدفاع عنه فى القضايا _اللى كده كده هتترفع عليه_وده لان اسمه هيكون منور فى كتاب ضد الفساد وله الاجر والثواب عند الله ثم عند جماهير نادى الزمالك
_____________________________________________________________
(7)
مطلوب للعمل فى حزب شهير _يتسم بالوطنيه_شباب قوى البنيه بشرط يكون بايع القضيه ومش فى دماغه ولديه خبره فى التعامل مع السنج والمطاوى لزوم حرق الاحزاب المعارضه وتقفيل الانتخابات بمرتب مغرى وحوافز تصل الى 99.9من المرتب وهى نفس نسبة الانتخابات اللى هيقفلوها
______________________________________________________________
(8)
مطلوب مدرسين للعمل فى مدرسة ابو غريب الاعدادية يكون لديهم الخبره الكافيه فى سحل وتعذيب التلاميذ حتى يعترفوا بما لا يعرفونه اساسا ويستحسن ان يكون لديهم خبره فى الفنون القتاليه للدفاع عن عرين المدرسه من اولياء الامور
_______________________________________________________________
(9)
مطلوب كومبارس صامت بغرض الترشيح فى احد الدوائر الانتخابيه لانتخابات مجلس الشعب ويكون متأكد انه ناجح ناجح بشرط ان يكون دوره فى المجلس هو نفس دوره فى الحياه وهو كومبارس صامت
____________________________________________________________
(10)
مطلوب بودى جارد للعمل لدى شخصيه مسئوله فى البلد بشرط يكون مبدأه فى الحياة هو لا ارى لا اسمع لا اتكلم وهذا لانه هيشوف بلاوى وان يكون مثل ظل الشخصيه المسئوله لان الراجل من حب الناس مبقاش واثق من ابنه
______________________________________________________
(11)
مطلوب مخرج لاخراج فيلم محمد سعد الجديد بشرط عدم التدخل فى الفيلم نهائيا وان يعتبر وجوده بجوار سعد فى الفيلم مجرد ونس مش اكتر
____________________________________________________________
(12)
مطلوب جزارين للعمل فى احد المدابح بشرط توافر شهاده بالسرعه الفائقه فى دبح وسلخ الحمير قبل ما البوليس يطب علينا
واى طلب بدون شهاده سوف يتم رفسه
_____________________________________________________________


7 comments:

Anonymous said...

يا عينى يا عينى
مالبلد مليانه شغل اهو امال اي ه حكايه الشباب الى مش لاقى شغل ده
اما صحيح بتر عالنعمه

ههههههههههههه

لا كام وظيفه انما مالاخر بصحيح
ربنا يسترها معاناومنقعش تحت ايدين حد من الاخوه الوظفين دول
:))))))))))))))))

وعجبنى اوى عالاستجواب الى فات
:)

ندا منير said...

طب مش طلوب صحفيين
؟؟؟

ههههههههههه
اشمعنا بقى الوظيفة دى مش مطلوبة

بس والله عندك حق فى كل اللى قلته دا
الشاب اللى هيشتغل لازم يكون عاذب غير كدة مش هيعرف يلاقى وظيفة تكفى مصاريف بيته
واللى هيشتغل مع الحكومة لازم يكون زيهم
ويتخلى عن مبادئه

بس هنعمل ايه
هو دا حال مصر

بس برضه فى جانب لسة كويس وحلو فى مصر
ولسة فى امل
وفى وظائف لسة بتحافظ على كرامة الانسان وعلى مبادئه

R-H-S said...

الله علي وصله الاعلانات المنبوبه دي

هههههههههه
بجد فظيعه
تحياتى

صالح سعيد said...

shayma
طبعا البلد مليانه شغل واللى يقول غير كده يبقى عاطل بالفطره
بجد بقى
ربنا يكون فى عون الشباب
اشكرك على اهتمامك
تحياتى

صالح سعيد said...

ندا منير
طبعا مطلوب صحفيين لجريدة حكوميه يكون عندهم موهبة المدح الدائم فى الحكومه
ويشترط تقديم قصيدة شعر فى حب الحكومه مع الطلب
ازيك يا ندا
نورتينى
تحياتى

صالح سعيد said...

GeHaD-----(male)
مساء الفل يا معلم يا بلدياتى
بشكرك على اهتمامك ورايك
وشوف كده لو عايز وظيفه منهم تحت امرك
نورتنى
تحياتى

Unknown said...

خلاص باه
انت هتخرط على قلب الواحد بصل ؟