لو بطلنا نشبك نموت
بعد ان رحمنى الله سبحانه وتعالى من غياهب الجهل والجلوس امام التلفاز والاستماع لتامر امين ملك الاستفزاز..وسلكت طريق الانترنت والاستمتاع به مع سماع اغنيه للست ..ايقنت وقتها فقط ان العالم اصبح قرية صغيره وان التليفزيون المصرى انسب مكان له هو الحظيره....عذرا لهذه المقدمه وان كنت احاول ان اعبر عما يجيش فى صدرى من مشاعر تجاه سنوات من الظلمات..لكنها ترتبط ارتباطا وثيقا بما اره الان امام عينى وهى فكره انتشرت بين الشباب بطريقه غريبه ووصل صداها لمرحله جيده حتى الان ..فكره انتشرت دون محاولة اللجوء للاعلام المصرى الميت اكلينيكيا واعلاميا ودون الحاجه للشحتفه على ابواب ماسبيرو وسماع الجمله الشهيره فوت علينا بكره يا سيد _مع ان اسمى صالح مش سيد_لكن تقول ايه بقى؟الفكره اكثر من ممتازه بجد وتحتاج لخطه عمل على المستويات الفكريه ومراعاة انه يكون فى مرونه فى التعامل مع عقليات ممكن تعتبر الفكره ضربا من الجنون والعيب كمان..ايقنت هذا بعد ان بدأت اولى محاولاتى لنشر الفكره مع صديق لى كان مقبلا على خطوة قراءة الفاتحه وكنت انا الوسيط بينه وبين اهل العروسه عرضت الفكره على العريس كان هيموت من الفرحه وكان ناقص يبوس رجلى قلت له استغفر الله بوس ايدى وخلاص ...ووعدته بنقل الفكره لعقل وقلب اهل العروسه وقعدنا انا والعريس الغلبان نفكر ونتكتك_فى الخطه مش من البرد_والراجل بصراحه لم يقصر معى من سعادته بالفكره وصمم يجيبلى حاجه ساقعه قلتله مالوش داعى وجدته مصر اصرارا عظيما ..فطلبت منه واحده كانز..سالنى اشمعنى كانز يعنى..قلتله لانى متواضع والقناعه كانز لايفنى..المهم انى ذهبت لاهل العروسه لانقل لهم الفكره ..وبدات فى مدح صديقى بشهامته وطيبة قلبه ورجولته ...و.. و...وكل مفتكر الكانز امدح اكتر..واستمر هذا الحال الى ان شعرت انه كفايه مدح لانى مش جاى اغنى على الناس وانى ادخل بقى فى الموضوع ..واتكلم عن ظروفه ..هنا فقط شعرت بلهفة الاستماع من اهل العروسه ..كان صفاته الشخصيه اللى انا بقالى ساعه بقول فيها مكتوبه فى البطاقه ولم اتردد وقلتها ..بان العريس رأيه وظروفه تحتم عليه عدم وجود شبكه وانه موافق انها تتكتب فى القايمه ..نظر لى اهل العروسه نظره غريبه .لدرجة انى خفت ياخدوا منى كباية الشاى اللى فى ايدى ..وبصراحه كان هيبقى منظر الكبايه وحش ..والشاى هيبرد ..وكرامتى هتبقى زى فتلة لبيتون حاولت ان امتص غضبهم الذى طل فى اعينهم _على الاقل لما اخلص الشاى_بجملة ده مجرد اقتراح هو بيطرحه يا جماعه...رد حماه مستقبلا بجملة لا يطرحه ولا يجمعه..قالها بعصبيه جعلتنى اشعر انه طالما مفيهاش طرح ولا جمع يبقى مفيش قسمه ونصيب وانى احاول انفد بجلدى قبل ما العمليه الحسابيه تقلب لضرب..وبدأت الوم نفسى مذكرا اياها بمثل امشى فى جنازه ولا تمشى فى جوازه خصوصا لو كانت من غير شبكه...الغريب انه وسط دائرة اليأس التى احاطت بنا وجدت بصيصا من الامل لم يكن يخطر لى على بال اطلاقا
-----------------------------------------------
تستكمل الاسبوع المقبل..عقبال عندكوا
-----------------------------------------------
تستكمل الاسبوع المقبل..عقبال عندكوا
44 comments:
صبااااح الفل
هييييه
أول تعليق يا ألف نهار أبيض
بجد هاقول لك على حاجة يا صالح
كلامك تمام
عمر الفرحة ما كانت بالشبكة أو بالذهب
عمر الفرحة الحقيقية ما كان بالمنظرة وشوفي عريسي جاب لي ايه- بيني وبينك في عرسان بيجيبوا غصب عن عينهم يعني بالعافية!- لما الحاجة تكون جاية بحب- إن شا الله دبلة وبس- بتكون بالدنيا وما فيها وكلامي مش مجرد أحلام أو كلام لأني خارج الدائرة
والله ما عارفة الناس هاتفضل تفكر كده لامتى؟
أنا بنتي عريسها يتاقلها بالذهب
على أساس إنها شوية طماطم شروة على عربية كارو!! وعجبي
ليبتون يا صالح.. ليبتون!.. الله يرحم زمن شاي الوردة الجميل
هايل كالعادة يا ابن بلدي
:)
بجد مبروك شكل مدونة جديد انا كنت هموت من ضحك وانا بقرء بجد مقالة دة دمك شربات كلامك صح ياصالح ومتفق معايا فى كلامى الى قولتة فى موضوع جواز ومال بس بالانجليش بصراحة كفاية بقى نصعب الموضوع وكان عريس صفقة ولازم ننفضة من كل مليم فى جيبة البنت مش بضاعة بس عارف انا بجد مش مع عروسة كان مفروض تقدم ليكم جاتوة هههههههههه ومانجا وتقنع اهلها ويكون لها رئى ماديات ممكن تيجى بعدين بس مشاعر ورجولة مش تتعوض بنت كامل سعد الدين
ههههههههههه. عجبنى اوى المشهد ده.الله يعينك.انا شفت منظر الوالد ساعت لما نطقت بفكرتك العبقريه
"رد حماه مستقبلا بجملة لا يطرحه ولا يجمعه..قالها بعصبيه جعلتنى اشعر انه طالما مفيهاش طرح ولا جمع يبقى مفيش قسمه ونصيب " ويبدو انه سمع اللى بيدور فى عقلك حكاية القسمه و النصيب دى واعتقد ان دى هتكون المفاجأه.هيكون اكيد فى تراجع فى المواقف .اوقات الشبكه تكون دليل على التزام العريس او حتى انه واخد الموضوع شويه جد ومقتنع لدرجه كبيره واوقات بتدل على التسرع ...زى اللى يروح يخطب و جايب الشبكه فى ايده .المهم ان الاهل بيحسوا بخيبه الامل لما العريس يقصر فى موضوع الشبكه دى بيحسوا انه مش مهتم ..مش هيفكروهو بيشترى الشبكه هل العروسه مناسبه له وعايزها وممكن يواجه اى حاجه ممكن تعطل اتمام الزواج ولا من اول مشكله او خلاف فى الماديات او فى علاقات اهل العريس و العروسه هيستسلم و يقول بلاش الجوازه دى . نظرة المجتمع لبنت و خطيبها مش هيجيب لها حتى شبكه .. مجتمعنا مادى حتى لو قالوا 1000 كلمه عن القناعه وان المهم الاصل و الاخلاق .يمكن فرحه البنت فى هديه بسيطه بكلمه انا مهتم ..انا نفسى تكوني ليا ..انا سعيد وانا معاكي .المسأله مش حاجه بيشتريها العريس و يحطها فى بيته .دى شريكه حياته المستقبليه . انا رأيي انهم ممكن يقصروا شويه فى تجهيز بيتهم الجديد بس يجيب شبكه و لو بسيطه. تفتكر فى ظل ارتفاع اسعار الدهب ممكن اى شاب خريج جديد يجيب شبكه ...ربنا يكون فى عونه . هما الاهل هيساعدوه فى ايه ولا ايه .
بعيدا عن الشبكه اجد الاهل فى وادى تانى ..لا يمكنهم رؤية ابنائهم واحتياجهم الشديد لشريك حياه ..لا يرون هذا الاحتياج لشخص لك وحدك ..يهتم بك وحدك اهتمام خاص لا يوليه لغيرك ...شخص تنشأ معه حياه جديدة. يتركوهم يشاهدون هيفاء و اليسا و رقه البطل الامريكى فى تعامله مع حبيبته دون ان يشعروا بهذه الابنه او الابن .خلينا نشوف كام و لد و بنت عدوا ال 25 و لسه متجوزوش ..دول مش عوانس ..دول شباب اتخرجوا و اتصدموا بالواقع. البنت فى انتظار و الولد فى سباق مع الاسعار. قد ما المجتمع بقى مفتوح ..قد ما احنا لسه بنحبس نفسنا جوا تفاليد و عادات تزيد من الامنا ... اكيد ببعض التنازلات هنحيا ايام جميله فى الحلال فى سعاده بعيدا عن الضغوط و طرق الهروب منها . معلش طولت .تحياتى لك.
موضوعك يا استاذ صالح وسورى بقى انت اكبر منى بكتير صعب اقول صالح بس
المهم موضوعك لذيذ جدا
والمشكلة دلوقتى بالنسبة للشباب صعب اى عائلة تقبلهم نظرا لاحوالهم وظروف المرتبات البسيطة الا بقى اذا كان شاب غنى
يالا ربنا يسهل للجميع
السلام عليكم ورحمة الله
موضوعك جمييييييييل يااستاذ صالح
بيفكرنى بالجروب اللى على الفيس بوك بتاع عروسة من غير شبكة ياريت حضرتك تشترك فيه
انا مقتنعة جدا بموضوع الجواز من غير شبكة
وبؤيد راى مروة جمعة جدا
بس اعتقد ان ده اتجاه ناس كتير الايام دى
يارب نسمع خبر سعيد عن حضرتك قريب
صلوووووحة باشا
موضوعك دا جه ع الوجيعة يا معلم
تعرف
انا بضم صوتي لصوتك
وصوت اي واحد ممعوش
عشان نغيّر المقولة التطفيشية
"اللي ممعوش.. ميلزموش"
ليه أهل أي بنت ميسهلوش العملية حبتين؟
ليه الحكومة- ربنا ياخدها- متأممش الجواز؟
مثلا يخلوا العروسة على بطاقة التموين
ايه المانع؟
واللي يفضل مستحمل مراته اكتر من خمس سنين يكسب ست كمان.. ليه لا؟
ليه..الناس
ونستكمل باقي الاقتراحات مع النص التاني للبوست.. اللي شكله هيكون متين يا معلم
فكرتنى بجمله كان بيقولها
هانى رمزى فى مسرحية وجة نظر
طبعا جملته المشهوره مافيش فايده؟ ولان طبعا مافيش فايده ؟ فى العادات والتقاليد البتضغط على الشباب لحد ماتخليه لللاسف كراه كل شئ ولانا ا لظروف الاقتصاديه فى بلادنا فى تطور مستمر وتقدم ......يبقى طبيعى جدا نضغط عى بعض ويبقى من الطيعى جدا جدا.... دائرة الاعلام واسعة من المفروض العادات والخطاء كمان تختفى بس لللاسف عمرنا ما هنطور وانا عن نفسى بقول الشبكه دى هديه مش معقول ابدا تبقى فرض والازم حرام الشباب مش ناقص ضغط وبعد كده نلوم الشباب انهم مش نافعين ومش بيفكره فى بكره واضح بكره زعلان قوى بجد موضوع لازم يطرح بشكل اكبر من كده ؟ لان الموضوع مهم فعلا
صالح باشا
واحشني والله كتير
والله انا بقول طول عمري اني مش هتجوز عشان الرجاله مالهومش امان؟ بس بقول لو يعني اتجننت وعملتها او واحد حلو كده وامور وشبه ميل جيبسون او براد بيت او توم كروز كده فانا هوافق طبعا ومن غير شبكه كفايه عليا انه يكون معايا وبيحبني ...ههههه انا بهزر طبعا لان الجواز بيكون باتفاق الطرفين وحبهم هو الاساس وعمر الفلوس اللي هي العائق الوحيد ادام الشباب اليومين دول ما هيكون السبب في انهم ميتجوزوش واذا كانت كل بنت هتموت في الشبكه دي والاسورة دي والخاتم ده والعقد ده فانا بقول يا جماعه والله لو بيت مليان بالحب والتفاهم هيكون فيه دهب والماس ولؤلؤ الدنيا كله وواحده واحده بنبني مع بعض حياة جديدة كلها امل
مستنيه البوست الجديد خلاص خلصت امتحانات وفضيييييييييييييت
مدونة جميلة اوى وانت اسلوبك حلو وجميل ومشوق ودمك زى السكر ان شاء الله اجى تانى باى
هههههههههههههههههههه
ازيك ياصاصا باشا
فينك يابرنس
الأضواء أخدتك مننا خلاااص
زى عمرو الطاروطى
باينة عدااك
عموما يابرنس انت نورت الحياة التدوينية المواجهاتية بزيارتك دى
________________________---
الاهو اية بصيص الامل ولا النور دة؟؟
عاوزة اعرف
متقطعش عننا...
بيس
امممم، لا انا مش هاعلق لحد ما اعرف الباقى،
فى الانتظار،
تحياتى لك.
السلام عليكم
اريد ان اعرف ما هو هذا الامل او بصيص الامل اللى ربنا هداكم به
اتمنى ايضا ان يوفق الرحمن جميع شبابنا ما دام نيته الاخلاص و ان يعينه عل متطلبات العصر و العادات الراسخه فينا والتى تتحكم بالجميع ..
خالص تقديرى و تحياتى
انا بقول تمشي ف جنازه احسن
برده الجنازه
هتشرب فيها قهوه مش شاي
ههههههههههههههه
اوكي ممكن يكون ف جواز من غير شبكه
بس لازم تفاهم
بينهم
تحياتي
السلام عليكم
شبكة ايه وكلام فاضى ايه ده لو جاب الدبل يبقى كويس اوى
بجد ظروف الشباب دلوقتى بقت صعبة اوى
طبعا كل الاهالى عايزة لبناتها احسن حاجة بس لازم يبصوا حواليهم ويشوفوا حال البلد
بوست جميل كالعادة
وطريقة كتابة ممية
تحياتــــى
السلام عليكم ازيك يا استاذ صالح
يا سيدي ربنا يتمم بخير
انا رأيي في الموضوع ده وعن تجربة شخصية لسه طازة " شبكتي " الاول كنت بقول مش لازم شبكة والدهب غالي ومش عارف ايه
لكن لما جيت اجيب شبكتي بجد الشئ الوحيد اللي كان هاممني هي الدبلة لانها ليها معاني اكبر بكتير من قيمتها كدهب
انا لسه كده مقولتش رايي في الاقتراح بتاع سيادتك اللي شورت بيه على صاحبك وكان نتيجته انه مش هيدخل دنيا بص يا سيدي
الناس ليهم حق يرفضوا لان دلوقتي مبقاش في امان ونسبة الطلاق بقت اعلى من نسبه الزيجات الناجحه بكتير اوي
فميقدروش يدوا الامان التام كده لشخص يعتبر لسه جديد وغريب عليهم وعايزين يحفظوا حق بنتهم في ايديهم مش لسه هيتكتب في القايمة وده معناه انه مش هييجي ابدا الا اذا كان الشخص في نيته فعلا انه يجيب لها شبكة زي كل العرايس لما ربنا يديلوا
الحاجة التانيه انه شئ جديد ومخالف للعرف وهيقولوا اشمعنى هي بنتنا اقل من اي واحده علشان ميجيش لها شبكة ؟ وهنقول ايه للناس !! طبعا حكايه الناس دي حكايه مش هنخلص منها ابدا الا اذا الناس كلها بدات تتصرف كده لكن عائله بمفردها بس اللي توافق بكده والمجتمع كله غير كده صعب شويه
نقطة اخيره علشان طولت على حضرتك
في رجاله برضه يعني مش تمام بمعنى انه لما اهل العروسة يتساهلوا معاه في الاتفاقات او يتغاضوا عن حاجة مش بيشيلها جميله وبيقول دول ناس طيبين ومقدرين ظروفي لا بييجي وقت الزعل معاها ويقول لها انتي اهلك فرطوا فيكي بسهوله انا مدفعتش حاجه وكلام كده خايب بس صدقني للاسف بيحصل
طبعا الكلام لا يخص صديقك لكن انا بوضح وجهه نظر الاهل خصوصا ان الشخص بيكون لسه مفيش عشرة بينهم وبينه ولا يعرفوه وبالنسبة لهم يا طلع كويس يا لا وعايزين يضمنوا حياة كريمة لبنتهم
عموما ربنا يوفقهم وحاول يكون في حل وسط والله يكون في عونه لان الدهب وللللللللللللللع
تحياتي لك
مروه جمعه
يعنى مش عاجبك ليبتون وبتترحمى على شاى الورده ..طبعا مين هيشهد للعروسه
واللى مش عاجبه يشرب من البراد الازرق
ههههههههه
صباح الورد
ازيك يا ميرو
اتفق معك فى الفرحه ليست بالشبكه وانما بالانتريه والصالون والسجاد والستاير والذى منه
بهزر طبعا
الفرحه الحقيقيه فى القلب
تحياتى يا ميرو
مشمشه الرقيقه
انا قريت تعليقك مرتين
مره للمعرفه
والتانيه للترجمه
فاهمانى طبعا
بص يا مشمش
رغم انى بموت فى الجاتوه وبعتبره من نقاط ضعفى الا انى اتفق معك فى كلامك بجد
لان المشاعر فعلا اهم شئ فى الدنيا
المشاعر لا تقدر بمال
نورتينى يا ارق مشمشه فى الشرق الاوسط
تحياتى
Towtor
بدون مجامله منى
تعليقك احلى من البوست اللى انا كاتبه
بجد تسلم ايدك واستوقفتنى هذه الجمله
يقصروا شويه فى تجهيز بيتهم الجديد بس يجيب شبكه و لو بسيطه. تفتكر فى ظل ارتفاع اسعار الدهب ممكن اى شاب خريج جديد يجيب شبكه ...ربنا يكون فى عونه
________________________
لان اى شاب خريج عمره مهيفكر يلبس دبل او يهوب ناحية محلات الدهب اساسا
لانه عمل ايه بتخرجه
اى شاب عايز يتجوز لازم يهج من مصر سنتين تلاته لاى دوله عربيه او حتى ليبيا عشان يقدر يواجه طوفان الاسعار
مفيش عريس مش عايز يجيب شبكه
لكنه بيحسبها انه بفلوس الشبكه ممكن يشطب الشقه او يجيب الفرش ويقرب البعيد
جرام الدهب بقى ب150جنيه يعنى العريس الغلبان مش هيجيب من اقل 10000
عشرة الاف عشان يبقى اسمه شبك
واقل من كده هيبقى تهريج فى الصاغه
شكرا لاهتمامك
تقبلى تحياتى
ندا منير
ازيك يا استاذه ندى
طالما مصره انى استاذ صالح
المشكله مش فى المرتبات البسيطه
المشكله انه مفيش مرتبات اساسا
يعنى من الاخر لازم يكون هناك تساهل من الطرفين حتى تستمر الحياة
لانها فعلا مشكله كبيره
مش الشبكه
الجواز عموما
والشبكه دى اقتراح لحل مشكله
عقبال يا رب مشوفك عروسه يا ندى
قصدى يا استاذه ندى
تحياتى يا قمر
بذرة امل
بلدياتى
ازيك يا امول
لا اخفى عليكى سرا اننى مشترك فى هذا الجروب وان قائدة الجروب صديقتى العزيزه منى زكى الشهيره بمنى الشيخ طلبت منى موضوع للجروب فكان هذا البوست الذى تم نشره ايضا على موقع الجروب بالفيس بوك
وانا مقتنع ومعجب تماما بالفكره
لانها فعلا هتحل مشاكل كتير
تحياتى
عمرو الطاروطى
ازيك يا عمور
ليس بالضروره ان اللى يبقى مقتنع بالفكره يبقى ممعوش يا عمور
وبعدين ازاى الجواز يبقى على البطاقه يا معلم
هههههههههههه
هو تموين يا رمزى قصدى يا عمرو
ساعتها بقى الواحد يقول معايا عروسه مدعمه
ونقف فى طوابير العرايس
تبقى عامله زى طابور العيش كده
تنفع مشهد كوميدى بجد
بس بجد يا عمرو انا اتفق معك فى ان اهل العروسه لازم يلموا الدور شويه
مساء الورد يا معلم
تقبل تحياتى
nado
المشكله فعلا كبيره ولازم يتم تناولها بشكل اكبر من كده
لكن صدقينى بجد انا حاسس ان الموضوع لاقى قبول لدى ناس كتير
وللاسف الاعلام المصرى ليس له علاقفه بما يجرى على ارض الواقع
دول ليل نهار بيكدبوا علينا ويفهمونا ان الدنيا ربيع والجو بديع
واننا لازم نقفل على كل المواضيع
السياسيه طبعا
نورتبنى بجد
تقبلى تحياتى
حوبه
افهم من كده انك عايزه تحترفى وتتجوزى من الاخ ميل كروز او توم جيبسون
هههههههههههه
ازيك يا حوبه
وحشتينى انتى كمان
اتفق معك ان الحب يقدر يحل المشكله دى بسهوله
بس مش كل اتنين هيتجوزوا عن حب يعنى
الى جانب انى مقتنع ان الحب وحده لا يكفى
يعنى مينفعش احب واحده واموتها من الجوع
واسميها شهيدة الحب والفقر
لكن الصح انى اعمل كل ما فى وسعى حتى اكون سر سعادة حبيبتى
بشتى الطرق والكبارى
نورتينى بجد يا حويه يا رقيقه
تقبلى تحياتى
PrInCeSS BeRy
شكرا على اهتمامك ومرورك ورايك
ويسعدنى التواصل معك بجد
ويا رب اكون دايما عند حسن ظنكم جميعا
تقبلى تحياتى
دعاء مواجهات
او الحاجة دودى
فين السبحه والعقال يا دعاء
هتاكليهم عليا ولا ايه
لا انسى
وبعدين اضواء ايه اللى تاخدنى منك يا جميل
هى فين الاضواء دى اساسا
انا لسه فى كى جى ون كتابه
ده مش تواضع
دى الحقيقه
وانتظرى بقية الحكايه
لانها مفاجاه
سؤال بقى ليكى
لماذا توقف خالد كساب عن قول كلمة اشطاط
الاجابه
وهذا لان شعره شاط
ههههههههههههههه
اى خدمه يا جميل
تحياتى
رؤيه
اسم مدونتك مختلف وجميل وجذاب
يعنى تلاته فى واحد
نورتينى بجد
وقريبا ستكتمل الحكايه
تقبلى تحياتى
rovy
بصيص الامل مش هينفع اقوله فى الرد على التعليق
هقوله فى البوست القادم
ويا رب يعجبكم
ويا ريت كل اللى تعجبه الفكره يحاول يدعمها باى طريقه تعجبه
لاننا فعلا محتاجين لكده
تقبلى تحياتى
زوزو
اذا كان على النفاهم سهله
العريس ممكن يبقى ديبلوماسى من طراز رفيع او تخين لو عايزه
المهم انه يحس انه فى رحمه شويه
متبقاش العروسه والحكومه عليه
هيلافيها منين ولا منين يا زوزو
يعنى مش عايزك تطلعى عين العريس
وتفضلى تقولى هات هات
لما يتمنى ان ربنا ياخده
هههههههههههه
بهزر طبعا
ربنا يكرمك بعريس جاهز من كله
واول كله الفلوس طبعا
قولى امين بسرعه
تحياتى
semsema
يا سلام عليكى يا سمسمه وعلى عقلك وتفاهمك
يا ريت كل البوانيت يبقوا زيك كده
لكن للاسف اعرف بنات بيعتبروا العريس زى البنك والشاطره اللى تسحب اكتر
زى ميكون عريس فيزا كارت
ولو رصيده صفر لاقدر الله
يبقى لازم يتصرف بروح اهله
امال هو الجواز بالساهل
انتى ايه رايك؟
نورتينى وتقبلى تحياتى
The Queen
قبل مرد على تعليقك دعينى اهنئك على خطوبتك
الف مبروك بجد
وانا بحسد اللى امه داعياله وخطبك
والله بجد
لانك كما انا متخيلك
منقذة الرومانسيه
مدونتك غايه فى الرقه
نرجع بقى للتعليق
اختلف معك وان كان الاختلاف فى الراى لا يفسد للبوست قضيه
لانك قلتى ان الشبكه بتدى الامان لاهل العروسه
ازاى؟
يعنى من غير شبكه مفيش امان
وازاى تبقى هى مقياس اساسا
رايى ان طبع العريس هو المقياس واخلاقه
مش دهبه وشبكته
وبعدين الشبكه مش فرض
دى عاده توارثتها الاجيال
بس زمان كان الدهب برخص التراب
وكانت الشبكه بالكيلو
دلوقتى الجرام بيجيب للعريس مغص فى جيبه لما يفتكر تمنه
الاهم من كده بقى
انك نورتينى بجد بزيارتك
تقبلى تحياتى
أنا قلت رد الزيارة واجب ، بصراحة المدونة رائعة ودمها خفيف.
أما بقى بالنوسبة لموضوع الشبكة فده بقى موضوع كبير قوي مش سهل إنك تغير طريقة تفكير ناس اتعودوا يفكروا بنفس الطريقة من آلاف السنين ولو العروسة نفسها وافقت أهلها مش هيوافقوا أما لو أهلها وافقوا، الناس هتقول عليهم بايعين بنتهم. وهتلاقي مظاهرات قدام مجمع التحرير ترفع شعار "لو بطلنا نشبك نموت"
تحياتي
بالصدفة مريت بس مدونتك حقيقى حلوة واسلوبك ساخر وممتع واجمل شئ انى سمعت اغنية عمرو ميال رجعتنى لذكريات حلوة شكرا
ههههههههههههه
والله بجد موضوع الشبكه ده بيعمل ليه حساسيه
طيب انا اتقرى فتحتى وقولت مش عاوزة شبكه هقولك ليه لانهم مصممين يجيبوا دهب كتير وانا مش بحبه خالص يعنى خاتم كفايه هو انا همشى فاترينه
والحمد لله سبته ومن غير حاجه
يعنى على الاقل لما تحب تفركشها متبقاش عمال محتار اودى الشبكه لا اجيبها لا اعمل ايه
بجد هى حاجه مش شايفه لها لازمه بصراحه
بس هى دى العادات المـتأصله فينا
بجد بوست واووو ...حلو أوي ... فعلا بجد ممكن الناس تستغني عن الشبكة بس لو العريس فعلا مش في إمكانه ...لكن لو يقدر إيه المانع ؟ بس برضه ميكونش بالعافية...تكرم صالح...
والله موضوع يجيب الهرش فى النافوخ
يعنى الناس تتجوز من غير شبكه
ااااااه لو سمعتك ماما دلوقتى كانت قالت عليك موانس مع عريس اختى
ههههههههههههه
والله انا شايفه انه حاجه بسيطه كفايه المهم تكون عاجبه العروسه يعنى من غير مبالغه انما من غير خاااااالص
مش عارفه مفكرتش فيها
بس تعرف قيمه الناس مش بالدهب الى اشتروه او الى لبسوه
يعنى كل على حسب ظروفه يمشى كويس
purplewaves
مرحبا طبعا فى اى وقت وفى اى مكان صحرا ان كان او بستان
حابب انى افكرك بجملة لا يأس مع الحياة ولا حياة مع اليأس
لانى عارف ان الموضوع صعب
بس احنا لازم نقتنع بيها الاول بعد كده ننفذها
وكما قال الشاعر
مشوار الال ميل بيبدأ بعريس قصدى بخطوة
نورتينى بجد
ايه ياعم ده بقى
افكارك عامله .. انفراجه ف المكان
طبعا معاك وانا م الناس اللى ضد الشبكه والبتنجان
واى مظاهر اجتماعيه فارغه
بس كفائه والله الافكار دى
shasha
يقول الشاعر العزيز فى مثل لذيذ
رب صدفه خير من الف ميعاد
انا بشكر الظروف والصدفه الجميله التى اوصلتك لمدونتى بجد
وانا هروح مدونتك بس مش صدفه بصراحه
عن عمد يعنى
بشكرك على اهتمامك ورايك
وبشكر الصدفه الرائعه ايضا
تقبلى تحياتى
appy
بصراحه من المرات النادره اللى اشوف فيها بنت عندها القناعه دى
على عكس المتوقع من البنات لانهم يعتبرون الشبكه كنز لايفنى
مش القناعه
احييكى على طريقة تفكيرك
وربنا يكرمك بابن الحلال اللى يستاهلك بجد
تحياتى
منال مصطفى
حلوه بوست واوووو دى
فكرتنى بهيفاء واوا
هههههههههههه
بهزر طبعا
واتفق معك انه لو العريس يقدر ايه المانع
مع اعترافى بانه اصبح نادر انه يكون قادر
لكن عندك حق
نورتينى
شيماء
اوعى تخلى ماما تقرى البوست ده يا شوشو
لتدعى عليا وتقول مروج اشاعات
بس بجد الموضوع مش مقصود منه الشبكه تحديدا
يعنى مش تريحنى من الشبكه وتقطم وسطى فى الباقى
وتبقى الشبكه ارحم
الموضوع انه يكون هناك رحمه بين الطرفين
بس مش اكتر
تحياتى ليكى ولماما ولاختك ولعريس اختك
نورتينى
اجدع بنوته
اولا بجد دى مش افكارى
الفكره عموما فكرة منى الشيخ او منى زكى
او منون كما يحلو لى ان اناديها
وهى فكره تستحق التاييد بجد
وكل واحد بطريقته
انا بنشرها عن طريق الكانز
ههههههههه
شكرا لاهتمامك
تحياتى يا جميل
المدونة انا سعيدة اني اكتشفتها
مقالك كويس ..:)
طريقة كتابتك ساخرة طريفة جدا جدا
لولا زيارتك ليا في مدونتي مكنتش هعرف ان في مدونة جميلة كدة هنا :)
شكرا جدا .
بس بالنسبة لموضوع الشبكة .. لو تضمن يا سيدي ان العريس كويس .. و انه مش هيدخل بيتكم و يخرج من غير خساير .. يبقى الغي الشبكة!!
ايييييييييييية يا صالح
انت بتشتغل اية بالضبط؟
ربنا يقدرك على حل مشاكل الشعب
Post a Comment