وابتدى المشوار
على الرغم من اننى اكتب فى مسلسل راجل وست ستات منذ 5شهور والحمد لله اصبح لى حتى الان 8حلقات والبقيه تاتى باذن الله ..المهم اننى عندما قرأت اسمى فى جرنان الدستور ككاتب فى المسلسل شعرت اننى اول مره رايح الشركه ..حسيت انى اول مره اشوف اسمى فى الدستور رغم انه تم نشر مقالات عديده لى فى صفحة رأى وشغل دماغك وش السعد ..شعرت انها الخطوه الاولى فى طريق طويل يحتاج الى مزيد من الجهد والتعب لاثبات الذات ..نعم انها البدايه
وشوية اعترافات بقى بما اننا فى البدايه علشان نبقى ماشيين على نور
اولا بشكر اخى وصديقى العزيز عمرو الطاروطى
لن انسى كلمة هدى عبد القادر عندما قالت لى ان عمرو ده كنز وهو فعلا كده
عمرو الطاروطى خلصنى من فيروس الكسل الذى كان يصاحبنى وشجعنى بطريقه غير عاديه وصلت لمرحلة اجبارى على الكتابه وحلقتى الاولى فى المسلسل كانت تحت اشرافه الكامل وكتبناها سوا عنده فى الصيدليه وسط البسكوت والسندوتشات والنسكافيه
عمرو بيزعل من الكلام ده لكن ده حقه بجد وربنا يقدرنى وارد جمايله
وسيظل محتفظا باللقب شعلة الحماس
اعترف كمان انى مكنتش متخيل انى هقدر اكتب صفحه واحده لان شكل السيناريو فى الاول كان مخيف فى الاول الصوره على اليمين والصوت على الشمال والبهاريز فى النص _البهاريز دى من عندى يا جماعه_
لكن الحمد لله الامور وضحت بشكل كبير دلوقتى
وحاليا انا وعمرو وباقى الزملاء شغالين فى الجزء الخامس من المسلسل وخلصنا نصه تقريبا ..ونوعدكم باذن الله انه يكون احلى واجمل الاجزاء لاننا تعبنا فيه بجد
واخيرا كلمة شكر للاستاذ ولاء شريف المشرف على المسلسل لاننا اتعلمنا منه كتير جدا
وتعب معايا انا بالذات كتير جدا لانى ساعات ببقى هندى فعلا
معلش انا طولت عليكم المرادى بس للمره الثانيه بتمنى انه مفيش حد من الاخوه المدونين يزعل من تقصيرى غير المتعمد عن دخول مدونته لانه غصب عنى بجد
وقريبا هناخد اجازه واعود الى مدوناتكم الجميله لانها وحشتنى جدا بجد
26 comments:
الف مبروك
بجد مبسوطة
علشانك ويارب معاك
وتاخد الاجازة بسرعة
وتنورنا
بس هو الجزء الخامس
ازاي
مش هما عملو جزئين بس ولا اية
يعني مثلا لو كدا عايزين نعرف اية الحلقات اللي انت عملتها ولا هي لسة مش هتتذاع دلوقتي
يعني بتعملو لاقدام ولا ايةة
شكلي انا اللي بقيت هندية ههههههه
معلش
ويلا من نجاح لنجاح ويارب يفرح قلبك دايما يارب
لانك تستاهل
ويخليك صاحبك عمرو
هما دلو الاصحاب ولا بلاش
سلام
الله عليك يا صالح
انا بجد مبسوطه ليك جدا جدا جدا
لدرجة اني مش عارفه اتلامض من فرحتي بيك
ربنا يوفقك يارب دايما
وتكمل المشوار
انت حد جميل قوي وتستاهل كل خير
السلام عليكم ورحمة الله وبركاته
الف الف مبروك
وعقبال لما تكتب مسلسل خاض بيك لوحدك
سلام
صباح الفل والورد والكشري
مبروك يا صالح
مبروك تاني يا صالح
مبروك
مبروك
ربنا يبارك لك يا ابني ويوفقك ولا يوقعك في ضيقة
فرحانة لك جداً جداً
ربنا هايكرمك أكتر من كده عشان انت بجد بني آدم طيب قوي يا بلديات
وحلو الكلام اللي قلته على عمرو (يستحقه الصراحة)ا
بس على الله ما يتغرش أكتر من كده ههههههههه
صباح الفل ومبروك
سمعت عن فيلم (كباريه) صحيح؟؟
أحلي مسا في الدنيا كلها
وألف ألأف ألف مبروك
والله العظيم فرحان ليك من قلبي
وان شاء الله من نجاح لنجاح
وتوصل لحد 10 أجزاء .. وتكون كتبتهم لوحدك
ايوا كده ياراجل .. سيبك من أم الكسل
ألف ألف مبروك مره تاني
وتالت
ورابع
ومليوووووووووون مبروك
أحمد سلامه
الف الف الف مبروووووووك
بجد بجد مبسووطه جدا
ربنا يزيد نجاحك انشاءالله
ونشوفل افلام بعد كده
الف مبرووووووووووووك
:))))
ربنا يوفقك ياأستاذ صالح
بس انا عندى نقطة نفسى اقولها
ليه مش نخلى الضحك مرتبط بقيمة معينة تبقى واضحة للمشاهد
انا متابعة لمسلسل راجل وست ستات
وبصراحة
بضحك كتير بس بحس انى مش بستفاد حاجة
الى بتمناه انى اضحك واستفاد فى نفس الوقت
ما اعرفش حسة انها معادلة صعبة
بس ياريت تقدر تحققها
وعلى السلمة قبل الأخيرة صعودا إلى مائدة الإجتماعات الخاصة بورشتنا المصونة في شركة الأهرام للسينما.. وضعت يدي على كتف صالح وعيناي يملأهما التصميم وبكل هدوء الدنيا قلت له "أنت اللي هتغني يا منعم"!. مساء الفل يا دوولة.. قصدي يا صالح.. إيه الدراما دي يا عم؟.. بس لحسن أصدق بجد إن أنا شمعة تحترق من أجل الآخرين والكلام الهجص اللي بنثبت بيه الناس دا
أقولك سر يا صاحبي.. أول مرة أحضر مع فريق عمل المسلسل مع الأستاذ عمرو سمير عاطف ومع إني رايح بتوصية جامدة من الشخص اللي هفضل مديون له طول عمري بأي نجاح أحققه.. السيناريست وائل حمدي.. صدقني يا صالح أنا كنت قاعد مع الناس دي وأنا متبنج.. حالة ذهول غريبة كنت فيها.. خلصت وطلعت من هناك.. مش هتصدق.. كنت بعيط.. والمصحف لولا دعوات أمي ووقفة هدى عبدالقادر جنبي كان زمامي حصلي انهيار عصبي من الدنيا الكبيرة اللي لقيت نفسي مرة واحدة جواها.. قلت أنا إيه اللي طلعني من بيتنا وجابني هنا؟.. لكن كما تعرف.. لابد للأيام من أن تمضي.. وللحياة أن تستمر.. وللشلال أن يتدفق وصولا إلى ترعة بلدنا
صالح.. تكونش بتثبتني يا معلم عشان منفذش المخطط اللي قلتلك عليه وأحكي عن المغامرة اللي عملناها.. الليلة إياها بأمارة شارع عماد الدين والتمشية من التحرير لميدان رمسيس والخناقة اللي كنا هنتخانقها مع العيال الـ.. عند المتحف المصري.. بص يا برنس.. فيه ناس راسية ع الدور ولمحتلك في التعليقات اللي فوق.. سامعاني يا مروة؟
حاجة كمان.. مش عارف ليه أنت مش بتحب إنك تصيت نفسك وتقول إنك شغال كمان في مسلسل جديد إسمه توتو هانم بالإضافة لشغلك في عالم سمسم وانتهاءا بالقنبلة اللي هنفجرها قريب.. الخطوة اللي إتأخرت كتير.. فيلم السينما اللي خلاص قرب يشوف النور.. هانت.. تعبنا مش هيروح على مفيش.. ربنا يسهل
صالح.. سلام يا صاحبي
مبرروووووووك
ربنا يوفقك دايما إن شاء الله
وجميل ذكرك لكل اللي ساعدك
ربنا يوفقكم جميعا
تحياااااااتي
ازيك يا صالح
والله انت تستحق كل خير بشهادة الجميع ’ وعمرو باختلاف ارأنا حوله الا انه هو كمان يستحق احسن مما يتمني واحسن اكيد مما نتمناله ’ بس تصدق ان عمرو اتغير ؟ تخيل ؟ بقيت احبه ؟ برغم اختلافنا ؟ وهو اللي قالي علي تعليقه في المدونه قلت لنفسي برغم اني علي وش امتحانات لازم اشوف كاتب ايه عنك
رينا يوفقكم ويا رب تدوم صداقتنا اللي بعتز بيها كتيييييييييييير
صديقي صالح الجميل والذي لم تتاح لي الفرصه بعد للتعاون معه في العمل ولكن لازلت عاقده عزمي يا صالح علي التعاون معك فأنت شخصيه جاده جدا ومكافح جدا جدا واضحك جدا وجدا وجدا من افكارك المبتكره والابداعيه والكوميديه انا فخوره بك وبعالم سمسم والذي تعرفت فيه عليك كل التوفيق يا صديقي اما عن طاروطي فلا تعليق فالحرب معه بدأت من الامس ولكن اتفق معك فهو شعله حماس مهما فعل فأنا اعمل الان بجهد وهو احد الاسباب القويه صالح وصالح الف مبروك وانتظرك في مدونتي لا مفر لك يا صديقي والي اللقاء في مشروع ابداعي قادم نشترك فيه معا نفاجيء به الكل .
ما شاء الله
ربنا يوفقك و يحققلك كل احلامك و تكمل المشوار كله
و ربنا يبعد عنك الكسل يا رب
تحياتى
My Hope$
الله يبارك فيكى
وهما عملوا 3اجزاء غير الاول والتانى
هيتذاعوا السنوات الثلاث القادمه باذن الله
وحتى الان لم نعرف ترتيب الحلقات
ولما اعرفها اكيد هقول على ميعاد حلقاتى
واللى بيتذاع دلوقتى الجزئين الاول والتانى
تحياتى
لماضه
ربنا يخليكى يا دكتوره
ومتحرميش مدونتى من لماضتك اللذيذه
والمشوار طويل جدا
وباذن الله نكمله
وشكرا على اهتمامك ومرورك ورايك
تقبلى تحياتى
خمسه فضفضه
الله يبارك فيكى
ويا رب يجعل دعوتك من نصيبى
لانه حلم كبير ان الواحد يكتب مسلسل لوحده
وربنا يسهل ونوصله بمزيد من الجهد والتعب
تحياتى
مروه جمعه
فكرتينى بالكشرى يا ميرو
اكلتى المفضله بدون حمص صلصه زياده
وعمرو يستاهل اكتر من كده بجد
وايه حكاية فيلم كباريه دى بقى
انا شامم ريحة مؤامره
مع انى مظلوم وبرئ
واكيد انتى فاهمانى
ومش مصدقه عمرو
ههههههههههههه
شدى حيلك يا ميرو شويه عشان انتى معانا باذن الله فى توتو هانم
تحياتى
اخويا الصغير احمد سلامه
الله يبارك فيك يا برنس
ومتشكر جدا على حرصك على زيارة مدونتى المتواضعه
وبجد انا معتز جدا بمعرفتك
ربنا يديم بينا الموده
وفعلا يا احمد انا الكسل كان مشكلتى فى الحياه
لكن الحمد لله لم يعد هناك كسل
وشكرا لرايك يا ابو حميد
تحياتى
شيماء
الله يبارك فيكى
وبشكرك جدا على اهتمامك
اما موضوع الفيلم ده لسه بدرى عليه شويه
لانى مؤمن بنظرية ببطء ولكن بثقه
لانى كل يوم بتعلم جديد
وانا لسه فى سنه اولى
وكما قال الشاعر الصبور
الصبر جميل
تحياتى
بذرة امل
اولا انا بشكرك على رايك
واسمحيلى ارد فى حدود معرفتى
نوعية مسلسلات السيت كوم هدفها الكوميديا الخفيفه بمعنى انه المطلوب هو رسم البسمه على الوجوه خلال ربع ساعه وهو زمن الحلقه الواحده
والشئ المهم هو ان الحلقه تكون مبنيه صح يعنى فيها بدايه ووسط وصراع وحل
وانا متفق معك فى كلامك بخصوص القيمه بس شايف انه صعب يتحقق كل ده فى ربع ساعه
لكن صدقينى الاجزاء القادمه هتعجبكم لان فيها مفاجات كتير
مش علشان انا بكتب فيها لكن بجد حلوه
تقبلى تحياتى
عمرو الطاروطى
مساء الانوار
يا عمور بما انك لسه جديد فى عالم المدونات لازم تعرف انها عامله زى الكلام على الهواء المباشر
يعنى اللى هتقوله كل اللى هيخش هيشوفه ولا انت فاكر نفسك بتوشوشنى يا عمرو
بس لما اشوفك يا عمرو
انت كده اوفر على راى واحد حبيبنا
هههههههههههههه
اوعى تضحك
وخلى مغامراتنا دى يا عمور سر بينى وبينك
ولا انت السر عندك انه محدش من امريكا يعرف
وخد بالك انا عندى اسرار كتير برضه
فخلى الطابق مستور بدل منتمسك انا وانت تحرى
مساء الفل يا عمور
خد بالك انا بسحب ناعم
اما بخصوص الشغل يا معلم
فانت رفيق الكفاح بجد مش هزار
ويا رب افرح فيك قريب واشوفك خاطب اد الدنيا
ساعتها والله لعامل اعلان فى الجرنان يا عمرو
تحياتى الى ان نلتقى فى الشركه او التحرير او اى مكان صحرا ان كان او بستان
ان شالله يكون على البلاج
وكما قال الشاعر
كده اجمل انسجام كده يحلو الكلام
سلام يا معلم
سلوى
ربنا يخليكى يا سلوى
وصدقينى التواصل مع اخواتى المدونين والمدونات من اهم اسباب حماسى للعمل فى هذا المجال
والناس اللى ذكرتهم يستاهلوا اكتر من كده بجد
لانهم تعبوا معايا جدا
ربنا يقدرنى وارد جزء من جمايلهم
قولى امين
تقبلى تحياتى
حوبه
فينك من زمان يا حوبه
ولا بتسالى علينا خالص مالص
ليكون الواد عمرو مفهمك انى مهاجر
انا عارفه
وانا مبسوط جدا انه اتغير وبقى حبوب كده
وانا هقرصلك ودانه لو رجع زى الاول
ولا يكون عندك قرصه قصدى فكره
نورتى مدونتى يا حوبه بجد
ومتشكر ليكى جدا
تحياتى
واحده من اصحاب القمر
هو انا ممكن اعاكس ولا مينفعش
اصل انا شايف ان الصوره دى هى القمر مش واحده من اصحابه
ازيك يا اميره
انا طبعا يشرفنى بجد انى اشتغل معاكى فى اى عمل فنى مشترك
وباذن الله يكون قريب جدا
ويكون مفاجاه
شكرا لزيارتك واهتمامك ورايك
تحياتى
عاليا
بشكرك على رايك
وصدقينى مدونتك من المدونات اللى عاجبانى جدا بدون مجامله
ربنا يزيدك ويوفقك
تقبلى تحياتى
الف مليوووووون ميبرروك نجاحك جزء من نجاحنا احنا كمان ربنا يوفقك شاذلي دنقل
الف مبروك يا استاذ صالح
مبروك على نجاحك
ويارب كدة دايما
ومدونتك عجبانى جدا واسلوبك فى كتابة المواضيع عجبانى جدا
انا طبعا صغيرة جدا على الحكم
بس بقول كدة لانى ساعات بقرا مواضيع ومن شدة تعقيد اسلوبها مبفهمش حاجة خالص
ومبروك مرة تانية
Post a Comment