Thursday, April 30, 2009


اكسب حماتك واشترى حياتك


تزوج احمد من منى ..وكان لكل منهما سياسته الخاصه فى التعامل مع حماته ايمانا منهم بمبدأ اكسب حماتك واشترى حياتك

المشهد الاول
احمد يجلس مع حماته انعام _ام منى_بعد ان وضعت منى مولودها الاول

انعام : مبروك يا احمد يتربى فى عزك
احمد : ربنا يخليكى يا حماتى يا وش السعد
انعام : تفتكر الواد طالع لمين ؟
احمد : اكيد طالعلك ..ملامحه كلها براءه وانسانيه وحنيه وذكاء وده طبعك طبعا
انعام : تفتكر انا بريئه يا احمد ؟
احمد : طبعا يا حماتى انتى بريئه جدا ..ولو مش مصدقانى اعملى فيش وتشبيه عشان تتاكدى
انعام : انا منى بنتى طالعالى تمام ..نسخه منى ؟
احمد : وده اللى مصبرنى عليها لو مش طالعالك كنت زمانى عملت خلع من زمان
انعام : كلامك الحلو هيخلينى اتغر فى نفسى
احمد : حقك طبعا انك تتغرى ..وتتكبرى علينا ومتجيش البيت ده تانى صدقينى مش هزعل
لانه حقك انك تغورى _قصدى تتغرى _يا مرحب يا حماتى

قطع
المشهد الثانى
منى تجلس مع حماتها نعمات _ام احمد_ امام التليفزيون
نعمات : متشوفى يا منى كدخ مسلسل مهند بدأ ولا لسه ..اصله بيفكرنى بشبابى
منى : صدقينى يا طنط لو مش خايفه عليكى من ركوب الطياره كنت قولتلك روحى اعملى دور نور
نعمات : كل اللى يشوفنى يقوللى كده ..معرفش ليه ؟
منى : لانك اجمل من انجلينا جولى على الاقل يا حماتى انتى جمالك طبيعى ..التانيه كلها سليكون
نعمات : مقولتيش يعنى ايه رايك فى المسقعه اللى عملتهالك امبارح ؟
منى : منمتش لحظه من حلاوتها يا طنط ..انا رايى تطلعى كتاب اسمه احلى الاكلات من ايد نعمات وتنافسى الابله فضيله
نعمات : ايه فى التليفزيون ده ماتش الزمالك ..غيرى القناه الفريق ده مش عايز ينصفنى
منى : متزعليش نفسك يا طنط ..الزمالك ده فريق القرن وهو قاصد ينزل درجة تانيه عشان ياخد بتاره من بنى عبيد
نعمات : انا بقت مشكلتى فى الحياة حب الزمالك والحزب الوطنى
منى : طبعا الحزب الوطنى جميل وكله مصداقيه ..ده اجدع من حزب وداد بتاع عبد الحليم حافظ

قطع
المشهد الاخير

احمد يجلس مع منى لو حدهما بعد يوم شاق من المعاناه الحماتيه _نسبة الى حماة كل منهما
احمد : شوفيلك حل فى مامتك يا حبيبتى ..دى بالعه راديو
منى : صدقنى يا حبيبى مامتك قناة فضائيه متحركه قناة ترعى الملل مش بتتحداه
احمد : طب والحل يا حبيبتى ؟ انا بقيت باخد مهدئ للاعصاب قبل مكلم مامتك
منى : يبقى الوضع كما هو عليه يا حبيبى عشان الحياة تستمر
احمد : يعنى اصبر على مامتك اللى فاكره نفسها فاتن حمامه ؟
منى : ايوه يا حبيبى ..وانا برضه هصبر على انجلينا جولى قصدى مامتك يعنى

قطع

سيناريو
صالح سعيد
ايمان متولى

8 comments:

شمس النهار said...

بم ان انا الحمد لله حماه
واجوازات بناتي بينادوني ياماما وساعات باسمي وساعات اسم الدلع
اعلن وبشده
ان انا بحبهم وهمه كمان بيحبوني من غير نفاق والاخوف غير من الله
البوست جميل جدا:)

Unknown said...

فعلا ساعات لازم تهاود علشان
الحياة تمشي

المهم متمرعهمش قوي علشان ميسقوش فيها


سلام

امل said...

الحمد لله انا حما
ومابحبش لا الرغى ولا التلفزيون
طيب حتى اسئل جوز بنتى
بس بوست حلو..وبيفهمنى حاجات كتيره
وهو ان غالبية الزوجات والازواج بكاشين
والحموات بس هم اللى كلهم برائه

فكرة من الزمن ده said...

جميلة اوي
اعملي فيش وتشبيه علشان تتاكدي
ولا من حقك تغوري ومش حازعل

جميلة كتابتك اوي ياصالح انت وايمان
واجمل مافيها انها مش مملة ولا طويلة والواحد بيركز فيها
عصر السرعة بقى
بس ماتغيبش كده كتير من ايام البيان الدامي كل ما اجي الاقيك مش هنا قلت انت نسيت ان عندك مدونة
تحياتي

صالح سعيد said...

شمس النهار
ربنا يديم بينكم المحبه الصادقه طبعا وده اللى كلنا بنتمناه بس اللى انا كتبت عنها حاله خاصه وصدقينى منتشره جدا اليومين دول
تقبلى تحياتى
______________________________
منى مصطفى
انتى جبتى متمرعهمش اوى دى منين؟؟؟؟
ههههههههههههه
جديده على عالم التدوين الكلمه
يعنى قصدك لا لسياسة المرع
صح كده؟
تحياتى
________________________
ماما
هما الحموات كلهم براءه
فكرتينى ببراءة الذئب فى عينيه
مفيش حما بريئه
الا حماتى المستقبليه طبعا
تحياتى ليكى ولحماتى المستقبليه
ههههههههههه
_______________________
فكره من الزمن ده
بتاسف لتانى مره على التوازى عن الغياب
وايمان متولى فعلا حد موهوب انتظروها قر يبا فى كتابات لوحدها
وخليكوا فاكرين انها اكتشافى
وبشكرك على اهتمامك يا جميل
تقبلى تحياتى

Anonymous said...

مسااااااااااء الفل
شو أخبارك ياباشا
كده بردو تعمل كده

عشمتني بالعشا .. من زماااان أوي
ومن يومها وأنا مادقتش الأكل ولا أعرف شكلك كده ناوي تسيبني لما أموت من الجوع
بس أنا بردو لسه مستني
أظن الرساله كده وصلت ؟


سلااااااامه

عروض ازياء said...

معاملة الازواج لاهل بعض محطة يجب الوقوف عندها فعلا يسلموووووو على الموضوع الذيذ

eltamaz elmithaly said...


شركة تاج لكشف تسربات المياه بالدمام والخبر 0551844053والقطيف
شركة كشف تسربات المياه بالقطيف
شركة عزل اسطح بالخبر
شركة كشف تسربات المياه بالخبر
شركة كشف تسربات المياه ببقيق
شركة كشف تسربات المياه بالدمام
شركة مكافحة حشرات بسيهات
شركة تنظيف مساجد بالدمام والخبر
شركة كشف تسربات المياه براس تنورة