ازاى الدستور تبقى اجمل من كده 20مره
بداية كل سنه وانتم طيبون وانا اسف على التاخير والتقصير فى حق مدونتى لكن ده لظروف النت وربنا يخرب بيت اللى يزعل النت افندى ..المهم انا انضميت مؤخرا لجروب محبى جريدة الدستور على الفيس بوك وكتبت هناك موضوع اتمنى تشاركونى برأيكم فيه لحد منوصل لصيغه مشتركه هوصلها للمسئولين عن الجريده باذن الله
ومره تانيه كل سنه وانتم طيبون
________________________________
بداية اعترف باننى لست صالح حسنين هيكل او صالح رجب ولكن ربما لاننى متابع بدرجة قدير جدا للدستور من الاصدار الاول اؤكد ان هناك تفاوت كبير فى المستوى بين الاصدار الاول وبين ما نراه الان فالدستور لا يكفيه ان يكون احسن الوحشين بل نتمنى ان يظل كما كان جرنان مختلف بكل ما تحمل الكلمة من معانىوعلى سبيل المثال وليس الحصر فى الاصدار الاول كنت حريص جدا على قراءة الجرنان من الجلده للجلده كما يقولون لكن الوضع اختلف بصراحه مطلقه دلوقتى انا بقرا الجرنان فى تلت ساعه الدستور الاول مكنش فى صفحات الوان بس كان ليه طعم بجد تحس ان كل كلمه مكتوبه بعنايه مش مجرد حشو لم يكن فى الدستور مكان لانصاف الموهوبين مكنش فى اعداد كامله خاصه بموضوع واحد زى مبنشوف اليومين دول تلاقى عدد كامل بيتكلم عن حاجه واحده بس وبصراحه انا بعتبر ده نوع من انواع الافلاس الصحفى الدستور زمان كان وجبة صحفيه دسمه دلوقتى بقى عامل زى الساندوتش التيك اواىالدستور زمان كان مهتم بالقراء كل عدد دلوقتى صفحة البريد هى صفحة الغلابه اللى ممكن تغيب بالشهرين عشان خاطر حضرة الملف افندىزمان كان استحاله تتوقع المانشيتات الرئيسيه ودى كانت حلاوتها دلوقتى وانت مغمض تأكد عزيزى القارئ ان المانشيت الاول عن الريس والتانى عن جمال والتالت عن احمد عزصدقونى انا بحب الدستور جدا بس عايز ارجع اقرا الجرنان من اول سطر لاخر حرف مش عايز اشوف حوار طويل عريض وفى صفحتين كاملين مع واحد مغمور ونص عائلته عارفاه شكلا بس عايز اشوف صفحتين ضربة شمس اجمل من كده مش الاقى صفحتين مخصصهم الاخ خالد اشطاط قصدى كساب للدفاع عن عرين الملك محمد ابومنيرعايز اشوف تنوع فى المواضيع اكتر من كده ونبعد عن وحدة الموضوع مش كل عدد نتكلم عن الريس وبس واخيرا اتمنى ان كل واحد يقول رايه ازاى الدستور يبقى احلى من كدهوانا كان ممكن اجامل واقول كلام زى الفل بس انا قلت اللى انا حاسس بيه وده لانى بحب الدستور
25 comments:
عندك حق يا صالح
للاسف صفحة بريد القراء اللي بقت عامله زي الزائر
وحتى المقالات بقت وجبه لا هي دسمه ولا مهضومه حتى
بجد انا بضم صوتي لصوتك
من بيت دستورجي اصيل
ياريت يرجع زي الاول
ويلغوا صفحة خالد كساب
هاى صالح
ازيك
نورت
وحمدلله على السلامة
..........
بصراحة انت جدع قوى انك تتكلم عن الدستور كدة
بس طالما اتكلمت انا بقى مش هخاف وهتكلم
بس تحمينى
هههههههههههههه
انا طبعا مش متابعة الدستور من زمان قوى
يعنى من حوالى سنة ونصف كدة
بس طبعا لاحظت حاجات كتير قوى فى الفترة دى
الاول كان فى صفحة خاصة بالتعليم واول ما بدات اتابع الجرنان م نسنة ونصف كدة كانت الصفحة موجودة وكانت جميلة جدا لكن بعد شوية الصفحة اتشالت ومن ساعتها مرجعتش تانى لحد دلوقتى
ودا اول مشكلة
لان صفحة التعليم كانت صفحة مهمة جدا
يعنى دا اول حاجة المفروض الجرنان يفكر انه يعملها
وبرده صفحة الراى بتتشال كتير قوى وبترجع كل فين وفين ودى برده كانت صفحة حلوة جدا عشان اى حد بيعبر عن رايه ولو فى اى مشكلة او طلب ممكن حد يبعته ليها
ودى تانى حاجة ممكن الدستور يعملها انه يخلى الصفحة دى تنزل بانتظام
وبرده زى ما انت قلت الملف اللى بينزل دا
والله بيشلنى جدا جدا
كل مرة يتكلم عن جمال عبد الناصر او السادات او جمال مبارك حسنى مبارك
يعنى الكلام كل مرة هو هو مش بيتغير
يعنى رايى ان الملف دا ملوش لزمة خالص انه ينزل
ومرة لاقيته منزل فى الملف حكاوى قديمة جدا كانه مجلة مش جرنان
الاقتراح الرابع اللى نفسى الدستور يعمله
انه ميبقاش مجرد جرنان معارض وبس
يبقى معارض مع اقتراح بعض من الحلول
المشكلة عندنا فى مصر ان كل واحد يفضل يشتم وخلاص ويفضل يقول على كل المشاكل اللى بتواجهنا لكن دون تقديم اى حل او اى اقتراح
نفسى الدستور يبقى صوت الشعب
ويقترح للحكومة حاجات تعملها
مش يفضل يعارض وخلاص
اقتراح اخير
........
فى صفحات زى ضربة شمس
هى متتلغيش
لكن ليه تاخد صفحتين من الجرنان
وصفحات تانية المفروض كفاية عليها صفحة واحدة بس
او تتلغى
وتنزل مكانها صفحة التعليم
وصفحة للدين
اللى هما الاساس
واللى احنا محتاجينهم
..........ز
طبعا انا طولت اوى عليك
بس ما صدقت بقى انى اتكلم
لانى بجد شايفة ان الدستور بقى حاجة تانية خالص
مبقاش زى ما بدات اتابعه فى الاول خالص
........
واخيرا احب ادعو الله ان يخرج استاذ ابراهيم عيسى من ازمته
وان يكون حكمه مع ايقاف التنفيذ
اتفق معك في هذا الراي
انا اصلا كنت متابع للأصدار الأول في عام 96وكانت جامدة جدا
دلوقتي الدستور مش زي الأول
تحياتي لك
هو الحقيقه انا عمرى ما قريت جريده الدستور ولا الجرائد المصريه عموما
من زماااااااااااااااااااااااان اوى يا ابو صلاح
بس انا بقرأ لكتاب الجريده على المدونات بس انت بعدت فتره طويله اوى
يا سيدى ما تغبش تانى كده
وانا محترمه وجهه نظرك
جدا وجرأتك فى طرح النقد لجريده او لاى شئ انت بتحبه
بس ربنا يستر بقى يا صالوحه وقلمك ما يكتبش عن روح وينقد وينقد
بس عموما اشتقنالك
ان شالله ديما تكون بخير
روح
باختصار يا أدهم
العدد الاسبوعى بقى أقل دسامة بعد صدور العدد اليومى
وبالرغم من كده الدستور الاسبوعى هو الافضل و الاكثر تاثيرا
-----------
وبعدين ايه ده؟
ازاى تسمى مدونتك على اسم مدونتى؟
:)
مسا الفل
ازيك يابو صلاح ..اخبارك ايه ياعم.. كل سنه وانت طيب
والله العظيم واحشني اوي
ايه الغيبه الطويله دي .. لعل المانع يكون خير
بصراحه كده وبدون لف ودوران
ومن غير كلام كتير ملوش لازمه
ورغي زي عدمه
الدستور مبقاش الدستور
مفيش حاجه فاضله منه الا الاسم
مش عارف ايه اللي جري
انا بقالي كام مده كبيره معدتش بشتريه
لانه زي ما انت بتقول فقد جاذيته وبريقه
دلوقتي وبكل سهوله تقدر توقع العشرين عدد الجايين
حتي الناس الحلوين اللي فيه بييبوه واحد ورا واحد .. زي مثلا ايهاب الزلاقي ومحمد الدسوقي وغيرهم كتير .. وعلي فكره محمد وايهاب دمايطه ياباشا
حتي صفحه رأي اللي كانت من اجمل الصفحات اللي فيه .. غايبه بقالها كام شهر
تصدق بالله .. كانت من اجمل مافي الجرنال
وكان فيها ناس زي الفل .. عمرو الطاروطي ، مروه جمعه ، دكتور محمد ابو العز ، احمد شوقي ، نهي العربي ، هدي عبد القادر ، هيثم ابو خليل ، وغيرهم كتيير .. بجد ناس زي الفل
وخالد باشا .. شغال هو وجنوده المرتزقه في الدفاع عن امبراطوريه منير .. شكله خايف من عمرو دياب يقوله كش ملك
وصفحات تظهر وتختفي بعد الضهر
ونظام بقي قلق اوي ياباشا
اعمل حاجه ياعم .. متقفش كده
اللهم ارحمنا واعف عنا وارفع مقتك وغضبك عنا ورجعلنا الدستور زي ماكان
عايز اقول كلام كتير اوي ياباشا والله .. بس خايف من الرقابه .. انت عارف بقي
اشوفك علي خيييير
سلاااااااااام
احمد سلامه
بصراحه مش متابعه الاصدرات دي خالص
بس انت شجاع وانا معاك في كلامك دا
يلا نبقي نروح مع بعض السجن بقي
هههههههههههههه
مبروك الجروب رغم انى ما بتابعش الدستور
بس الفكرة بتاعتك جميلة و ممكن الواحد ياخد فكرة برده
عندك حق
ساندوتش التيك اواى
تحياتى
ايه الاخبار الحلوة اللى انا سمعتها دى
بجد سعدت ليك جدا
الف الف مبروك ياصالح
ويارب يتمم لك على خير
بجد ربنا يوفقك
اخبارك اية يارب تكون تمام وكل سنة وانت طيب وعودا حميدا
جميل اوى النزعة السياسية الجميلة دى مش هقلك انى سياسية او متابعة للدستور او الخ بس انا عجبنى اسلوبك فى الكتابة والتعبير عن رايك
لماضه
ازيك يا مرمر
المشكله مش فى صفحة البريد بس
احنا بنتكلم عن الطعم
بجد
زمان تحسى انه كان عامل زى الزبدة الفلاحى
دلوقتى النخلتين يا مرمر
ايه الحل بقى؟
اوعى تقولى نطبع الجرنان فى مصنع روابى
الحل هو انه يتعمل اعادة ترتيب للاوراق
تحياتى يا مرمر
ندا منير
ازيك يا ندا
اشكرك بجد على اهتمامك ورايك
وانا اتفق معك فى اقتراحاتك وابشرك بحكم العفو عن ابراهيم عيسى
وصدقينى كل اراؤنا ستصل للمسئولين هناك
فى الدستور يعنى
وفى اى موضوع متخافيش انك تقولى رايك
تمنياتى لكى بالتوفيق
mostafa rayan
فعلا يا اخ مصطفى الاصدار الاول كان تحفه فنيه
انا كنت بشتريه واقراه قبل مروح البيت
من حلاوته بجد
وصدقنى انا متفائل انه يرجع زى الاول واحسن كمان
قول يا رب
تقبل تحياتى
روح شرقيه
مساء الفل والورد والياسمين
على ناس كنا منهم زعلانين
لكن دلوقتى خلاص
طالما اطمنا عليهم
ومن ناحية النقد
هيبقى دايركت
مباشر يعنى
مش على المدونه
وصدقينى حاولى تلاقى الدستور
وتقريه
حتى لو كان فى اسوا حالاته
ارحم من الصحف الحكوميه
لانها بتجيب مغص فكرى بعيد عنك
صدقينى انا سعيد بوجودك
عن جد يعنى
وعن ابا وجد اشتقنالكم
يا رب دايما تكونى بخير
تحياتى يا جميل
ميدو
يا اخ ميدو
انت مدونتك اللى على اسم مدونتى
ولو زعلان انا هروح بكره السجل المدنى التدوينى واغير اسمها
ولا يهمك يا ميدو
نورتنى يا معلم
احمد سلامه
بصراحه تسلم ايدك يا احمد على ردك
رد واحد بيحب الدستور بجد
صدقنى انا كنت خايف ان حد ينتقد انى اتكلم عن الكيان ده بالشكل ده
لكن الحمد لله حتى الان نحن متفقين
انه فى الامكان احسن مما كان
وانا متفق معك فى رايك
وهيوصل يا معلم
وباذن الله نشوف قريب مواضيعك فى الدستور
تحياتى
زوزو
كويس انك اعترفتى انك هتيجى معايا السجن
يا سلام يا اولاد
ده انا ساعتها هطالب بالمؤبد
وهقتل المحامى اللى هيترافع عننا
وهلغى قانون الاستئناف
طالما زوز و معايا فى السجن
نورتينى بجد
تقبلى تحياتى
عاليا حليم
فعلا يا ريت تاخدى فكره وتشاركى برايك
لانى بثق فى رايك عن جد
حلوه عن جد دى
من يوم مسمعتها من روح شرقيه وانا معلق عليها
تحسى فيها بالحزم الجديد
ولا انتى ايه رايك
عن جد
تحياتى
Gelaan
وانتى كمان عندك حق
ساندوتش التيك اواى
متجيبى حته
بذرة امل
دى اشاعات يا امول
انتى فينك من زمان
على فكره كنت هحضر اجتماع الاخوه المدونين الشرقاويه
بس كنت فى مصر للاسف
بس اوعدك انى معاكم فى اى مكان
ما عدا التخشيبه
تحياتى
PrInCeSS BeRy
اشكرك بجد على اهتمامك ورايك
وصدقينى انا اللى معجب بمدونتك وطريقة تعبيرك
تقبلى تحياتى
شارك في الحملة الشعبية للقيد بالجداول الانتخابية وادعو غيرك.
ضع بنر الحملة من علي مدونتك البنر موجود علي مدونتي
السلام عليكم ورحمة من الله وبركاته
تحياتى إلى كل المدونين الجادين وأتمنى أن يشاركونا الرأى والأجتهادات للخروج من تخبط الأراء التى كثرت عن الدين ودرء الشبهات التى تلصق الى الأسلام بتصيد بعض الأخطاء التى الصقت ببعض المفاهيم ..وعبر هذه المدونة علينا أن نبحث فى مصداقية الروايات السابقة وتخير الأجتهادات الحالية بما يخدم الأسلام وقضاياه .
مع خالص تحياتى
أمل فتحى عزت
Post a Comment