Saturday, March 21, 2009

جاءنا البيان الدامى

جاءنا البيان الدامى

قرر المذيع الهمام سعيدالحلوانى الذى يعمل بقناة عشنا وشفنا الاخبارية النزول للشارع لرصد هموم الناس وذلك ضمن حلقه من حلقات برنامجه _شفت بعينى محدش قاللى_وحدث معه الاتى
___________________________________
المشهد الاول
____________________
سعيد يمسك بمنظار روسى اصيل محاولا دون جدوى رؤية اخر طابور العيش امام احد الافران ..وبعد ان دب اليأس فى نفسه وفى منظاره يقرر اجراء حوار مع احد المواطنين الواقفين بالطابور الذى يرفع يافطه مكتوب عليها _وبشر الصابرين_
سعيد : انت واقف فى الطابور من امتى ؟
المواطن : من يوم الخميس بعد الفجر هو النهارده ايه ؟
سعيد :النهارده السبت وعليك خير
المواطن : هانت ..فات الكتير ما عاد غير الكتير جدا
سعيد :تفتكر ايه سبب ازمة رغيف العيش فى مصر ؟
المواطن_بخوف_.: لو قلت الحقيقه هتحمينى يا بيه ؟
سعيد _بحماس_ : طبعا قول متخافش احنا شعارنا ان خفت متقولش وان قلت يبقى تستاهل ..قول يا راجل
المواطن : مراتى يا بيه هى السبب فى الازمه دى
سعيد : ازاى يا حمش ؟
المواطن : مهى لو كانت وافقت على الفران اللى اتقدم عشان يخطب البنت اللى حيلتنا مكانش بقى ده حالى
لكن تعمل ايه بقى فى قلة عقل الحريم ..انت قلت هتحمينى صح؟
يواجه سعيد الكاميرا سعيد : من خلال قناة عشنا وشفنا نوجه نداء للفران انه يرجع لبنت المواطن عشان يحل مشكلته لان الراجل ظهر عليه الكبر فى الطابور
سعيد _للمواطن_ : تحب تقول ايه ككلمه اخيره
المواطن :احب اقول انى شاركت فى حرب اكتوبر واقسم لك بالله ان عبور خط بارليف كان اسهل من الوقفه فى الطابور
سعيد _للكاميرا_ : وهكذا اعزائى المشاهدين راينا رجل تذوق حلاوة نصر اكتوبر وتذوق ايضا مرارة الاسر فى طابور بلا نهايه

قطع
____________________________________________________________
المشهد الثانى
_______________
يقف سعيد فى حارة من الحارات التى كتب عنها نجيب محفوظ ويجرى حوار مع حسونه احد سكان الحاره لكى يرى سيد السيد على الطبيعه
سعيد : ايه رأيك فى شخصية سى السيد اللى كتب عنها نجيب محفوظ ؟
حسونه : مش نجيب نحفوظ ده بتاع برنامج الست دى امى ؟
سعيد :_محدثا نفسه_ الظاهر ان انا اللى وقعت فى واحد امى
سعيد : طب انت شايف فى نفسك شخصية سى السيد بقوته وجبروته ؟
حسونه :_بحماس_طبعا يا بيه ده انا بضرب مراتى 3مرات بعد الاكل يوميا
سعيد : و ده يبقى ضرب ولا علاج ؟
حسونه :لازم تبقى خشن مع الجنس الناعم وياريت اكون عبرة وقدوة للمشاهدين
يرن موبايل حسونه ينظر للرقم بذعر محدثا سعيد
حسونه :ثوانى ارد على الجماعه مراتى
سعيد :اتفضل يا سى السيد عصرك
حسونه _فى الموبايل_: حاضر يا ست الكل ..اوامرك ..هو انا اقدر اقول لا..طبعا هكون قبل المغرب فى البيت..مش هتاخر ..مفيش غدا مش مهم هقضيها كشرى...ولا عشا مش مهم يا بخت من نام خفيف
سعيد :_للكاميرا_وهكذا اعزائى المشاهدين رأينا الفارق بين سى السيد نجيب محفوظ وسى السيد اليومين دول بعد ان اصابه فيروس الخضوع خوفا من الخلع
والى لقاء فى حلقه اخرى من برنامجكم شفت بعينى محدش قاللى
قطع
____________________________________________________
صالح سعيد
عمرو الطاروطى
مروه جمعه

8 comments:

فكرة من الزمن ده said...

شوف يا ادهم ولا سعيد
العنوان تحفة واسم القناة ولا البرنامج والتفاصيل كلها كوميديا سودا يعني ببساطة بوست هااايل
وكان ينفع حلقة من حلقات منن غير ميعاد لاشرف عبد الباقي

Unknown said...

ههههههههههه
لقاء العمالقة طبعا لازم يبقى قنبلة
جميله يا سعيد
واحد مطلع راسه عشان يظهر في الكاميرا بالعافيه

المـــفـــــــقــــــــوعـــــة مــرارتـهــا said...

انت قلبت سيناريوهات خالص وقطع
والكلام الكبير دا
ماشاء الله
ربنا يباركلك يارب

فكرة من الزمن ده said...

فينك وفين الجديد
طمننا عليك

صالح سعيد said...

فكره من الزمن ده
اشكرك على اهتمامك ورايك ويا رب تبقى مدونتى دايما عند حسن ظنك وبتاسف للغياب وده بيبقى راجع لظروف الشغل
تقبلى تحياتى
__________________________
لماضه
ربنا يكرمك على رايك الهيروشيمى وحلوه فكرة الكاميرا بالعافيه يا مرمر
تحياتى
___________________________
المفقوعه مرارتها
هى فعلا شكلها قلبت معايا حوارات وسياريوهات بس اوعدك بمواضيع متنوعه بعيدا عن السكه دى
شكرا على اهتمامك
تحياتى

Entrümpelung wien said...

Dank den Themen .... Ich hoffe, mehr von den Themen

عروض ازياء said...

liiiiiiiiiiiiiiiiiiiiiiiiiike

وصفات لترطيب الشعر said...

liiiiiiiiiiiiiiiiiiiiiiiiiike